ৰাজপথত ভয়ংকৰ পথ দুৰ্ঘটনা, বাহনে মহতিয়াই নিয়ে কেইবাজনো, ৬ নিহত, ৫ সংকটজনক
আজি ২৬ এপ্ৰিল শনিবাৰে পুৱা হাৰিয়ানাৰ নুহ জিলাৰ দিল্লী-মুম্বাই ৰাষ্ট্ৰীয় ঘাইপথত সংঘটিত হৈছে এক অতিকে মৰ্মান্তিক পথ দুৰ্ঘটনা। এখন পিকআপ বাহনে মহতিয়াই নিয়ে বহ কেইগৰাকী লোকক। যাৰ ভিতৰত ৬ জনকৈ লোকে প্ৰাণ হেৰুৱাই ঘটনাস্থলীতে। আনহাতে আন ৫ গৰাকী লোকৰ অৱস্থা সংকটজনক।
ঘটনা সন্দৰ্ভত জানিব পৰা অনুসৰি, ফিৰোজপুৰ ঝিৰকা থানাৰ সীমাৰ অন্তৰ্গত দিল্লী-মুম্বাই এক্সপ্ৰেছৱে’ত এখন বেগী পিকআপ বাহনে পথত কাম কৰি থকা কেইবাগৰাকী চাফাই কৰ্মীক খুন্দা মাৰে। এই ভয়াবহ দুৰ্ঘটনাত ৬ জন অনাময় কৰ্মীৰ থিতাতে মৃত্যু হয়। আনহাতে আন পাঁচজন কৰ্মচাৰী গুৰুতৰভাৱে আহত হয়। আহত পাঁচজন কৰ্মচাৰীক ততাতৈয়াকৈ ওচৰৰ চিকিৎসালয়ত ভৰ্তি কৰোৱা হয়, য’ত তেওঁলোকক আই চি ইউত ৰখা হৈছে।
দুৰ্ঘটনা সংঘটিত হোৱাৰ লগে লগে ঘটনাস্থলীত চিঞৰ-বাখৰ লাগি যায়। স্থানীয় ৰাইজে লগে লগে আৰক্ষীক খবৰ দি আহতসকলক চিকিৎসালয়লৈ নিয়াৰ ক্ষেত্ৰত সহায় কৰে। অলপ সময়ৰ ভিতৰতে ৰাষ্ট্ৰীয় ঘাইপথত জনসমাগম ঘটে। ঘটনাস্থলীত উপস্থিত হয় এম্বুলেন্স, পথ সুৰক্ষা সংস্থাৰ বাহন আৰু আৰক্ষীৰ দল। দুৰ্ঘটনাটো ইমানেই ভয়াবহ আছিল যে, মৃতদেহ কেইটা ছিন্নভিন্ন হৈ পৰে ৰাজপথত।
আৰক্ষীয়ে জনোৱা মতে, মৃত লোককেইজনক এতিয়াও চিনাক্ত কৰিব পৰা হোৱা নাই। দুৰ্ঘটনাটোৰ আঁৰৰ কাৰণৰ তদন্ত কৰি পিকআপ চালকজনৰ বিৰুদ্ধে ব্যৱস্থা গ্ৰহণ কৰা হৈছে। আৰক্ষীয়ে জনোৱা মতে, চিচিটিভি ফুটেজ আৰু অন্যান্য প্ৰমাণৰ সহায়ত দুৰ্ঘটনাটোৰ সমগ্ৰ পৰিস্থিতি নিৰ্ণয় কৰা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
