অসম লাইভ ২৪ঃ আফগানিস্তানৰ সাম্প্ৰতিক পৰিস্থিতি সন্দৰ্ভত প্ৰধানমন্ত্ৰীৰ চৰকাৰী বাসভৱনত মঙলবাৰে অনুষ্ঠিত হয় এক উচ্চস্তৰীয় বৈঠক। নিৰাপত্তা সংক্ৰন্তীয় এই কেবিনেট কমিটিৰ বৈঠকত উপস্থিত থাকে কেন্দ্ৰীয় গৃহমন্ত্ৰী অমিত শ্বাহ, ৰাষ্ট্ৰীয় নিৰাপত্তা উপদেষ্টা অজিত দোভাল, প্ৰতিৰক্ষা মন্ত্ৰী ৰাজনাথ সিং, বিত্তমন্ত্ৰী নিৰ্মলা সীতাৰমণ আৰু কেইবাগৰাকীও শীৰ্ষ বিষয়া। আফগানিস্তানত আবদ্ধ ভাৰতীয়সকলক নিৰাপদে দেশলৈ উভতাই অনাৰ ব্যৱস্থা কৰিবলৈ চৰকাৰৰ শীৰ্ষ বিষয়াসকলক নিৰ্দেশ প্ৰদান কৰে প্ৰধানমন্ত্ৰী নৰেন্দ্ৰ মোদীয়ে। তাৰ পৰিপ্ৰেক্ষিতত কাবুলসহ আফগানিস্তানৰ আন আন চহৰলৈ পৰ্যাপ্ত বিমান প্ৰেৰণৰ আহ্বান জনায় মোদীয়ে। মঙলবাৰে বায়ুসেনাৰ বিমানযোগে কাবুলৰ পৰা ১২০ জন লোকক নিৰাপদে ভাৰতলৈ উভতাই অনা হয়। বৈঠকত প্ৰধানমন্ত্ৰী মোদীয়ে কয় যে ভাৰতে কেৱল নিজৰ নাগৰিককে নহয়, বৰঞ্চ আফগানিস্তানৰ সংখ্যালঘু হিন্দু আৰু শিখ সম্প্ৰদায়ৰ লোকে বিচাৰিলে তেওঁলোককো আশ্ৰয় প্ৰদান কৰিব ভাৰতে। ইয়াৰ উপৰি যদি কোনো আফগানলোকে ভাৰতৰ সহায় বিচাৰে সেই সন্দৰ্ভতো বিবেচনা কৰিব ভাৰতে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
