গোসাইগাঁৱৰ পৰা মিজানুৰ ৰহমানঃ সম্প্ৰতি সমগ্ৰ ৰাজ্যত চোৰাং গৰু, ম’হ সৰবৰাহ আৰু বৈদেশিক ড্ৰাগছৰ অবৈধ ব্যৱসায়, ছিণ্ডিকেট অব্যাহত থকাৰ সময়তে ৰাজ্যত আকৌ গঢ় লৈ উঠিছে ধঁপাতৰ ভয়ংকৰ ছিণ্ডিকেট।
চুবুৰীয়া ৰাজ্য পশ্চিমবংগৰ পৰা অসম ৰাজ্য চৰকাৰক কোটি কোটি টকাৰ ৰাজহ ফাঁকি দি একাংশ মাফিয়াই অব্যাহত ৰাখিছে এই ধঁপাত ছিণ্ডিকেট।
ধঁপাতৰ ছিণ্ডিকেটৰ বিৰুদ্ধে ৰাজ্যৰ আৰক্ষী প্ৰশাসনে তৎপৰ হৈ থকাৰ সময়তে গোসাঁইগাঁও মহকুমাৰ অন্তৰ্গত শিমূলটাপু আৰক্ষীয়ে অভিযান চলাই পশ্চিমবংগৰ কোচবিহাৰ জিলাৰ দিনহাটাৰ পৰা অসমৰ মাজেৰে গৈ থকা সময়ত ধঁপাত কঢ়িওৱা দুখন ট্ৰাক জব্দ কৰে।
আৰক্ষীয়ে প্ৰকাশ কৰা অনুসৰি পশ্চিমবংগৰ দিনহাটাৰ জীবন, ভোলা আৰু অংকুৰ নামৰ তিনি ধঁপাত মাফিয়াই পশ্চিমবংগৰ দিনহাটাৰ পৰা তিনিচুকীয়ালৈ বুলি কঢ়িয়াই আনিছিল ধপাঁতখিনি।
শিমূলটাপু আৰক্ষীৰ এক দলে শ্ৰীৰামপুৰস্থিত নাকা চকীত তলাচী চলাই ধঁপাত কঢ়িওৱা দুখন ট্ৰাক জব্দ কৰে। আৰক্ষীয়ে জব্দ কৰা ট্ৰাক দুখনৰ নম্বৰ AS 25 DC 0670, NL 01 AA 5617 বুলি জানিব পৰা গৈছে।
ধঁপাত কঢ়িওৱা ট্ৰাক দুখনত আৰক্ষীয়ে আটক কৰা ব্যক্তি কেইগৰাকী পশ্চিম বংগৰ কোচবিহাৰ জিলাৰ জামিনুৰ মিয়া, মনিৰুল হক, আমিনুৰ ইছলাম আৰু ধুবুৰীৰ জিলাৰ গোলকগঞ্জ থানাৰ মুখলেছুৰ ৰহমান বুলি জানিব পৰা গৈছে।
আনহাতে জব্দকৃত ধঁপাতখিনিৰ বজাৰ মূল্য আনুমানিক ৩০ লাখ টকা হ’ব বুলি আৰক্ষী সূত্ৰত প্ৰকাশ। ধঁপাত ভৰ্তি গাড়ী দুখন জব্দ কৰি থানালৈ আনি তদন্ত অব্যাহত ৰাখিছে বুলি শিমূলটাপু আৰক্ষী চকীৰ ভাৰপ্ৰাপ্ত সহকাৰী পৰিদৰ্শক সঞ্জয় কুমাৰ ৰায়ে জানিবলৈ দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ