অসম লাইভ ২৪ঃ ‘আপুনি কেতিয়াও গম নাপাব PPE KIT পৰিহিত তেওঁলোক ডাক্টৰ নে নাৰ্ছ।’ ক’ৰোনাত আক্ৰান্ত বলীউডৰ মহানায়ক অমিতাভ বচ্চনৰ হাস্পতালৰ অভিজ্ঞতা এয়া। ক’ৰোনাত আক্ৰান্ত হোৱাৰ পাছত ১১ জুলাইৰ পৰা মুম্বাইৰ নানাৱতী হাস্পতালত চিকিৎসাধীন হৈ আছে বিগ-বি। হাস্পতালৰ আইছ’লেচন ৱাৰ্ডত থকা অমিতাভ বচ্চনৰ স্বাস্থ্য সম্প্ৰতি সুস্থিৰ বুলি জনাইছে চিকিৎসকে। হাস্পতালৰ দিনকেইটা ছ’চিয়েল মিডিয়াত যথেষ্ট সক্ৰিয় হৈ আছে বিগ-বি। ছ’চিয়েল মিডিয়াৰ জৰিয়তে বিগ-বিয়ে তেওঁৰ অনুৰাগীক চিকিৎসালয়ৰ অভিজ্ঞতাৰ কথা শ্বেয়াৰ কৰিছে। অমিতাভ বচ্চনে জনাইছে যে- ‘ক’ৰোনা ভাইৰাছে মানসিকভাৱে দুৰ্বল কৰি তোলে মানুহক। নিশা গভীৰ হৈ আহিলে চিকিৎসালয়ৰ শীতল কক্ষটোত মই শুই পৰো। টোপনি আহিবৰ বাবে জোৰ কৰি চকু মুদি দিওঁ। মোৰ ওচৰত কোনো নাথাকে। সপ্তাহধৰি অন্য কোনো কাৰো সৈতে সংস্পৰ্শলৈ আহিব নোৱাৰে। নাৰ্ছ আৰু ডাক্টৰ থাকে যদিও সদায় PPE KIT পৰিহিত অৱস্থাতহে তেওঁলোকক দেখা পাওঁ। তেওঁলোকৰ উপস্থিতি একপ্ৰকাৰ ৰবটৰ দৰেহে লাগে। ঔষধ দিবৰ বাবে এটা সময়ত এগৰাকী নাৰ্ছ আহি ঔষধ দি পুনৰ ঘূৰি যায়। চিকিৎসালয়ৰ পৰা ৰোগী সুস্থ হৈ উভতি যোৱাৰ পাছতো অন্য লোকে তেওঁক অস্বাভাৱিক আচৰণ কৰে। এনেকুৱা ব্যৱহাৰ কৰে যে তেওঁ ৰোগ লৈহে ফুৰিছে। এনে ব্যৱহাৰৰ বাবে মানুহ মানসিক অৱসাদত ভোগে আৰু নিজকে অকলশৰীয়া অনুভৱ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
