অসম লাইভ২৪ঃ আজি বিটিচি প্ৰধান প্ৰমোদ বড়োৰ ওপজা দিন। কিন্তু প্ৰমোদ বড়ো কোন? কেৱল বিটিচি প্রধানেই প্ৰমোদ বড়োৰ পৰিচয় নে? এটা বাক্যত যদি প্ৰমোদ বড়োৰ পৰিচয় দিয়া হয় তেন্তে পোনতেই ক’ব লাগিব, প্ৰমোদ বড়ো এগৰাকী জাতীয়তাবাদী নেতা। ছাত্ৰ অৱস্থাৰ পৰাই ৰাজনীতিৰ লগত জড়িত প্ৰমোদ বড়োয়ে ২০০৯ চনত নিখিল বড়ো ছাত্ৰ সন্থাৰ সভাপতি ৰূপে নিৰ্বাচিত হয়। ক্ৰমাৎ স্তিমিত হৈ পৰা পৃথক বড়োলেণ্ড আন্দোলন তেখেতৰ দিনতেই পুনৰ সক্ৰিয় হৈ পৰে। এই আন্দোলনে বড়োভূমিত এক ব্যাপক জনজাগৰণৰ ৰূপ লয়। তেখেতে ছাত্ৰ ৰাজনীতিৰ সৈতে জড়িত থাকোতেই ৰাজ্যৰ সমগ্ৰ বড়োসমাজৰ মাজত শিক্ষাৰ ক্ষেত্ৰত সজাগতা অনাৰ প্ৰচেষ্টা চলায়। প্ৰমোদ বড়োৱে ছাত্ৰ ৰাজনীতিত জড়িত হোৱা দিনতেই বিশেষকৈ তেওঁলোকৰ মাতৃভাষা বড়ো মাধ্যমত শিক্ষা গ্ৰহণৰ ওপৰত গুৰুত্ব দিছিল।
কিয় বড়োলেণ্ডবাসীয়ে হাগ্ৰামতকৈ শ্ৰেষ্ঠ বিবেচনা কৰিলে প্ৰমোদ বড়োক?
প্ৰমোদ বড়োৰ জীৱনৰ বিশেষ কৃতিত্ব বুলিলে ক’ব লাগিব তৃতীয় বড়ো শান্তি চুক্তি। তেখেতে ৰাজনৈতিক জীৱনৰ অধিক সময় পাৰ কৰিছিল বড়োভূমিত স্থায়ী শান্তি প্ৰতিষ্ঠাৰ চেষ্টাত। তেখেতৰ এই প্ৰচেষ্ঠা বহুলাংশে সফল হৈছে বুলিও ক’ব পাৰি। কিয়নো বি টি আৰ চুক্তি স্বাক্ষৰিত হোৱাৰ পাছতেই এন ডি এফ বিৰ আটাইকেইটা গোটেই অস্ত্ৰ সম্বৰণ কৰিছে। ইয়াৰোপৰি তেখেতে বি টি আৰ চুক্তিৰ জড়িয়তে বি টি চি প্ৰশাসন আৰু চৰকাৰলৈ অধিক ক্ষমতা হস্তান্তৰ কৰাৰ প্ৰতিশ্ৰুতিও আদায় কৰিছে।
সংসদীয় ৰাজনীতিত সফলনে প্ৰমোদ বড়ো?
তৃতীয় বড়ো শান্তি চুক্তি সফলতাৰে সম্পাদন কৰাৰ পাছতেই প্ৰমোদ বড়োৱে সংসদীয় ৰাজনীতিত প্ৰৱেশ কৰে। নিখিল বড়ো ছাত্ৰ সন্থাৰ পৰা অৱসৰ লৈ ২০২০ চনৰ ফেব্ৰুৱাৰী মাহত ইউনাইটেড পিপলছ পাৰ্টি অৱ লিবাৰেলত যোগদান কৰে। অৰ্থাৎ চমুকৈ ইউপিপিএল। ২০২০ চনৰ ১৫ ডিচেম্বৰত বি টি চি নিৰ্বাচনত ভাগ লৈ প্ৰমোদ বড়ো নেতৃতাধীন ইউ পি পি এল দলে মুঠ ১২ খন আসন লাভ কৰাৰ বিপৰীতে ভাৰতীয় জনতা পাৰ্টিয়ে ১১ খন আসন, আৰু গণ সুৰক্ষা পাৰ্টি ১খন আসন লাভ কৰে। বিজেপি মিত্ৰজোঁটৰ সৈতে মিত্ৰতা কৰি প্ৰমোদ বড়োৱে বি টি চিত চৰকাৰ গঠন কৰে। তেওঁৰ ১৬ বছৰীয়া হাগ্ৰামা ৰাজৰ অন্ত পেলাই বি টি চিৰ মুখ্য কাৰ্যবাহী সদস্যৰ পদত অধিস্থিত হবলৈ সক্ষম হ’ল।
প্ৰমোদ বড়োয়ে বড়ো জনসাধাৰণৰ সপোন পূৰণ কৰিব পাৰিবনে?
ৰাষ্ট্ৰীয়তাবাদী দল বিজেপি আৰু বড়োভূমিৰ অবড়োসকলৰ ৰক্ষকস্বৰূপ গণ সুৰক্ষা পাৰ্টিৰ লগত সন্মিলিত চৰকাৰ গঠন কৰাৰ পাছতেই একাংশ ৰাজনৈতিক বিশ্লেষকে প্ৰশ্ন কৰিছে, প্ৰমোদ বড়োয়ে সঁচাকৈয়ে বড়োসকলৰ ৰাজনৈতিক সপোন পূৰণ কৰিব পাৰিবনে? নে তেওঁ আৰু তেওঁৰ দলে বিজেপি দলৰ আগ্ৰাসী ৰাষ্ট্ৰীয়তাবাদৰ বুকুত নিঃশেষ হৈ যাব। বড়োসকলৰ সপোন পূৰণ কৰিব পাৰিবনে ৰাষ্ট্ৰীয়তাবাদৰ হাতত ধৰি? বড়োসকলৰ প্ৰধান দাবীয়েই হৈছে নিজ জাতি আৰু ভাষাৰ উন্নতি সাধন কৰা, ভাৰতৰ আন ৰাজ্যতকৈ তুলনামূলকভাৱে অনগ্ৰসৰ বড়ো সমাজখনৰ আৰ্থ-সামাজিক উন্নতি সাধন কৰা আৰু যদি সম্ভৱ এখন পৃথক বড়ো ৰাজ্য নাইবা স্বাধীন ৰাষ্ট্ৰ গঠন কৰা। কিন্তু বড়ো সমাজৰ যি দাবী পৃথক বড়োলেণ্ড গঠন কৰা সপোনটোত প্ৰমোদ বড়োৱে হাৰ মানিছে বুলি একাংশ বড়োলোকে আপত্তি দৰ্শোৱাও পৰিলক্ষিত হৈছে। কিন্তু বি টি আৰৰ সাংবিধানিক মুৰব্বী হিচাপে কাৰ্যভাৰ গ্ৰহণ কৰি বড়ো ভাষা আৰু জাতিৰ উন্নতি সাধন কৰিবলৈ প্ৰমোদ বড়োৱে নিশ্চয়কৈ সুযোগ পাইছে। এই সুযোগৰ সদব্যৱহাৰ কৰিছেনে সেয়া বড়ো জনতাই নিশ্বয়কৈ আগন্তক সময়ৰ নিৰ্বাচনত প্ৰমাণ দিব।
মিত্ৰজোঁটক লৈ সুখীনে বড়ো জনতা?
বি টি চিৰ নতুন মিত্ৰজোঁটৰ চৰকাৰখনে বহুতো সম্ভাৱনাৰ দিশ মুকলি কৰিছে, ঠিক তেনেকৈ বহুতো দুৰ্ভাৱনাও বড়ো ৰাইজৰ মনলৈ কঢ়িয়াই ননাকৈ থকা নাই। বড়োভূমিত যদিও জাতি হিচাপে আন জাতিতকৈ বড়োসকলৰ সংখ্যাধিক কিন্তু অঞ্চলটোৰ জনবিন্যাসে এনে এটা অৱস্থা পাইছেগৈ যে, বড়োসকলে বৰ্তমান কেৱল বড়ো ভোটেৰে চৰকাৰ গঠন কৰিব পৰা অৱস্থাত নাই। বড়ো জাতীয়তাবাদক মুখ্য উদ্দেশ্য কৰি আগবঢ়া প্ৰমোদ বড়োৰ দলটোৱে ৪০ খন আসনৰ ভিতৰত কেৱল ১২ খন আসনহে লাভ কৰিবলৈ সক্ষম হৈছিল নিৰ্বাচনত। একবিংশ শতিকাৰ অসমৰ সৰ্ববৃহৎ জনজাতীয় গোষ্ঠীটোৱেই হৈছে বড়ো। পিছে বড়োসকল কেৱল সৰ্ববৃহৎ জনগোষ্ঠীয়েই নহয়, তেওঁলোকক ব্ৰহ্মপুত্ৰ উপত্যকাৰ এক প্ৰাচীনতম জনগোষ্ঠীও। আহোমসকলৰ অসম আগমণৰ আগলৈকে যদি অসমৰ ৰাজনৈতিক, সাংস্কৃতিক আৰু আৰ্থ-সামাজিক ইতিহাস লিখা হয় তেনেহ’লে এই ইতিহাসৰ ৯০ শতাংশই হ’ব বড়োসকলৰ ইতিহাস।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
