কৰ্মব্যস্ততা, বিভিন্ন কৰ্তব্য আৰু দায়িত্বৰ বোজাৰ মাজত বহু সময়ত আমি নিজেও গম নাপাওঁ যে কেতিয়া মানসিক চাপে আমাক আৱৰি ধৰে। ব্যস্ততাৰে ভৰা জীৱনত নিজকে সময় দিয়াৰ সুযোগো বহু ক্ষেত্ৰত নাথাকে। আমাৰ দেশত এনে বহু লোক আছে, যিয়ে নিজেই নাজানে যে তেওঁলোক মানসিক চাপত ভুগি আছে। কেতিয়াবা মানসিকভাৱে অতিশয় ক্লান্ত বা বিপৰ্যস্ত অনুভৱ কৰাৰ ফলত কিছুমান লোকে লাহে লাহে অকলশৰীয়াকৈ থাকিবলৈ অধিক পছন্দ কৰিবলৈ ধৰে। কিন্তু প্ৰশ্ন হয়—অকলশৰীয়াকৈ থাকিব বিচৰাটো সঁচাকৈয়ে স্বাভাৱিক নে ই কোনো মানসিক সমস্যাৰ ইংগিত? এই বিষয়ত বিভিন্ন চিকিৎসা বিশেষজ্ঞই কয় যে সাম্প্ৰতিক পৃথিৱীৰ ব্যস্ততাৰে ভৰা পৰিৱেশত জনসমাগমৰ মাজত অধিক সময় থকাৰ বাবে বহু লোকে কিছু সময়ৰ বাবে হলেও নিজাকৈ কিছু সময় কটাবলৈ ভাল পায়। কিন্তু এই অভ্যাসক লৈ বহুতে সংশয়ত ভোগে যে ই স্বাভাৱিক নে মানসিক অসুস্থতাৰ চিন।
এই সন্দৰ্ভত বিশেষজ্ঞই কি কয়?
বিশেষজ্ঞৰ মতে, অকলশৰীয়াকৈ থাকিব ভাল পোৱাটো সাধাৰণতে কোনো মানসিক ৰোগৰ লক্ষণ নহয়। বহু লোকৰ বাবে ই আত্মচিন্তা, মানসিক শান্তি আৰু আৱেগিক ভাৰসাম্য বজাই ৰখাৰ এক সুস্থ উপায়। এনে ব্যক্তিয়ে নিজৰ সৈতে সময় কটাই নিজকে অধিক ভালদৰে বুজি পায়, মানসিক চাপ হ্ৰাস কৰে আৰু পুনৰ সতেজ অনুভৱ কৰে।
কেতিয়া এই অভ্যাস চিন্তাৰ বিষয় হৈ পৰে?
বিশেষজ্ঞসকলৰ মতে কিছুমান বিশেষ লক্ষণ দেখা দিয়া ব্যক্তিৰ ক্ষেত্ৰত অকলশৰীয়াকৈ থকাৰ অভ্যাসক কেৱল স্বাভাৱিক বুলি ধৰি লোৱাটো উচিত নহয়। তেনে কিছুমান লক্ষণ হৈছে মানুহৰ সৈতে মিলামিছা বা কথা-বতৰা এৰাই চলিবলৈ ধৰা, সামাজিক কাৰ্যকলাপৰ পৰা সম্পূৰ্ণ আঁতৰি যোৱা, আত্মীয়-স্বজন বা বন্ধুৰ সৈতে সম্পৰ্ক ৰখাৰ আগ্ৰহ হেৰুৱাই পেলোৱা, অকলশৰীয়াকৈ থকাৰ ফলত দুখ, নিৰাশা বা জীৱনৰ প্ৰতি উৎসাহ হ্ৰাস পোৱা। যদি এনে আচৰণ দীৰ্ঘদিন ধৰি অব্যাহত থাকে, তেন্তে ই মানসিক স্বাস্থ্যজনিত কোনো সমস্যাৰ লক্ষণ হ’ব পাৰে। এনে অৱস্থাত এইটো বুজাটো অত্যন্ত গুৰুত্বপূৰ্ণ যে ব্যক্তিজনে নিজৰ ইচ্ছাৰে অকলশৰীয়া হৈ আছে নে মানসিক চাপ, উদ্বেগ বা অন্যান্য সমস্যাৰ বাবে নিজকে সমাজৰ পৰা আঁতৰাই ৰাখিছে।
Healthy Solitude আৰু ক্ষতিকাৰক সামাজিক বিচ্ছিন্নতা
বিশেষজ্ঞসকলৰ মতে, Healthy Solitude আৰু ক্ষতিকাৰক সামাজিক বিচ্ছিন্নতাৰ মাজত পাৰ্থক্য বুজাটো অতি প্ৰয়োজনীয়। যদি অকলশৰীয়াকৈ সময় কটোৱাৰ অভ্যাসে আপোনাৰ দৈনন্দিন জীৱন, কৰ্মক্ষেত্ৰ, সম্পৰ্ক বা মানসিক সুস্থতাত কোনো বিৰূপ প্ৰভাৱ পেলোৱা নাই, তেন্তে চিন্তাৰ কোনো প্ৰয়োজন নাই। ইয়াক সুস্থ নিসংগতা বা Healthy Solitudeবুলি কব পাৰি। কিন্তু যদি এই অভ্যাসে জীৱনৰ মানদণ্ডত প্ৰভাৱ পেলাবলৈ আৰম্ভ কৰে, তেন্তে মানসিক স্বাস্থ্য বিশেষজ্ঞৰ পৰামৰ্শ লোৱাটো অত্যন্ত জৰুৰী।
মানসিক চাপ কমোৱাৰ উপায়
যদি আপুনি অকলশৰীয়াকৈ সময় কটাবলৈ ভাল পায়, তেন্তে সেয়া ভাল কথা। কিন্তু একেবাৰে পৰিয়াল আৰু আপোনজনৰ পৰা বিচ্ছিন্ন হৈ থকাটো উচিত নহয়। সম্পৰ্কসমূহ মজবুত কৰি ৰাখিবলৈ তেওঁলোকৰ বাবেও সময় উলিয়াওক। প্ৰতিদিনে কিছু সময় খোজ কাঢ়িবলৈ ওলাই যাওক। প্ৰকৃতিৰ মাজত বা মুকলি পৰিৱেশত সময় কটালে মন স্বাভাৱিকভাৱে শান্ত হয় আৰু মানসিক চাপ হ্ৰাস পায়। যোগ আৰু প্ৰাণায়ামৰ অভ্যাসেও মন-মানসিকতা শান্ত ৰাখিবলৈ সহায় কৰে।
বিভিন্ন তথ্যৰ সহায়ত এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
