‘যথেষ্ট হ’ল, কন্যাৰ বিৰুদ্ধে অপৰাধ সহ্য কৰা নহ’ব’, কলকাতা ঘটনাত ক্ষোভ প্ৰকাশ ৰাষ্ট্ৰপতি দ্ৰৌপদী মুৰ্মুৰ
কলকাতাৰ এগৰাকী কনিষ্ঠ মহিলা চিকিৎসকৰ ধৰ্ষণ আৰু হত্যাৰ গোচৰক লৈ ৰাষ্ট্ৰপতি দ্ৰৌপদী মুৰ্মুৰ ডাঙৰ বক্তব্য ৷ এক সংবাদ সংস্থাক দিয়া সাক্ষাৎকাৰত তেওঁ কয় যে মই অতি হতাশ আৰু ভয় খাইছো। কন্যাৰ বিৰুদ্ধে অপৰাধ সহ্য কৰা নহয়।
মহিলাৰ ওপৰত হোৱা অত্যাচাৰৰ সন্দৰ্ভত ৰাষ্ট্ৰপতি মুৰ্মুৱে কয় যে যথেষ্ট হৈছে। কলকাতাত যেতিয়া ছাত্ৰ-ছাত্ৰী, চিকিৎসক আৰু নাগৰিকে প্ৰতিবাদ সাব্যস্ত কৰিছিল তেতিয়াও আন ঠাইত অপৰাধীয়ে নিজৰ অন্য চিকাৰলৈ অপেক্ষা কৰি বহি আছিল।’
কলকাতাৰ ঘটনাক লৈ শোক প্ৰকাশ কৰি ৰাষ্ট্ৰপতিগৰাকীয়ে কয় যে কোনো সভ্য সমাজত নাৰীৰ ওপৰত এনে অত্যাচাৰৰ অনুমতি দিব নোৱাৰি। সমাজখনো সৎ, ন্যায়পৰায়ণ আৰু অন্তৰ্দৃষ্টিশীল হ’ব লাগে।
ৰাষ্ট্ৰপতি মুৰ্মুৱে কয়, প্ৰায়ে নিন্দনীয় মানসিকতাৰ লোকে নাৰীক কম মানৱীয়, কম শক্তিশালী, কম সক্ষম, কম বুদ্ধিমান বুলি ভাবে। কোনো সভ্য সমাজে কন্যা-ভগ্নীৰ ওপৰত এনে অত্যাচাৰৰ অনুমতি দিব নোৱাৰে। এনে মতামত ধাৰণ কৰা মানুহে নাৰীক বস্তু হিচাপে লয়। ভয়ৰ পৰা মুক্তি পোৱাৰ বাটত অহা বাধাবোৰ দূৰ কৰাটো আমাৰ কন্যা সন্তানৰ কৰ্তব্য।
তেওঁ কয়, ‘নিৰ্ভয়াৰ পিছত যোৱা ১২ বছৰত সমাজে অগণন ধৰ্ষণ পাহৰি গৈছে, এই সামূহিক স্মৃতিভ্ৰংশ সঠিক নহয়। ইতিহাসৰ সন্মুখীন হ’বলৈ ভয় কৰা সমাজবোৰে সামূহিক স্মৃতিভ্ৰংশৰ আশ্ৰয় লয়; এতিয়া ভাৰতৰ ইতিহাসৰ মুখামুখি হোৱাৰ সময় আহি পৰিছে।
ৰাষ্ট্ৰপতি দ্ৰৌপদী মুৰ্মুৱে কয় যে সমাজখনে নিজকে কিছুমান কঠিন প্ৰশ্ন কৰা প্ৰয়োজন। কোনো সভ্য সমাজে কন্যা-ভগ্নীৰ ওপৰত এনে অত্যাচাৰৰ অনুমতি দিব নোৱাৰে।
উল্লেখ্য যে, আৰ জি কাৰ মেডিকেল কলেজ এণ্ড হস্পিতালত নৈশ কৰ্তব্য কৰি থকা কনিষ্ঠ চিকিৎসকক ৯ আগষ্টত ধৰ্ষণ কৰা হৈছিল। ইয়াৰ পিছত কনিষ্ঠ চিকিৎসকজনক নিৰ্মমভাৱে হত্যা কৰা হয়। চিকিত্সকৰ মুখ আৰু শৰীৰত আঘাত পোৱা গৈছে। এই গোচৰত অভিযুক্ত সঞ্জয় ৰায়ক গ্ৰেপ্তাৰ কৰিছে আৰক্ষীয়ে। কিন্তু আৰক্ষীৰ শিথিল মনোভাৱৰ বাবে কলিকতা উচ্চ ন্যায়ালয়ে এই গোচৰৰ তদন্ত চিবিআইক অৰ্পণ কৰিছে।
এই ঘটনাৰ প্ৰতিবাদত সমগ্ৰ দেশৰ চিকিৎসকে ধৰ্মঘটৰ আহ্বান জনাইছিল আৰু লগতে চিকিৎসকৰ সুৰক্ষা সন্দৰ্ভত আইন প্ৰণয়নৰ দাবী উত্থাপন কৰিছে। কেৱল এয়াই নহয়, কলকাতা ধৰ্ষণ কাণ্ডৰ বিৰুদ্ধে বংগকে ধৰি সমগ্ৰ দেশতে প্ৰতিবাদ সাব্যস্ত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
