প্ৰিয়ংকা গান্ধীৰ ৰাজনৈতিক কেৰিয়াৰ আৰম্ভ, এতিয়াৰ পৰা সংসদত একেলগে গান্ধী পৰিয়ালৰ ৩ সদস্য
আজিৰে পৰা প্ৰিয়ংকা গান্ধী বাদ্ৰাৰ ৰাজনৈতিক কেৰিয়াৰ আৰম্ভ। ৱাইনাডৰ সাংসদ হিচাপে আজি শপত পাঠ পঢ়ে প্ৰিয়ংকা গান্ধীয়ে। ৱাইনাডৰ পৰা চাৰি লাখৰো অধিক ভোটত জয়লাভ কৰি কংগ্ৰেছ নেত্ৰী প্ৰিয়ংকা গান্ধী বাদ্ৰাৰ সংসদীয় গণতন্ত্ৰৰ ইনিংছ আজিৰে পৰা আৰম্ভ হৈছে।
আজি তেওঁ লোকসভাত পদ আৰু গোপনীয়তাৰ শপত গ্ৰহণ কৰে। সংসদ ভৱনত উপস্থিত হোৱাৰ লগে লগে প্ৰিয়ংকা গান্ধীয়ে কয় যে তেওঁ অতি সুখী। মাতৃ ছোনিয়া গান্ধী আৰু ভাতৃ ৰাহুল গান্ধীৰ সৈতে সংসদ ভৱনত উপস্থিত হৈছিল প্ৰিয়ংকা। লোকসভাৰ অধ্যক্ষ ওম বিৰলাই শপত পাঠ পঢ়াৰ বাবে প্ৰিয়ংকাৰ নাম মতাৰ লগে লগে, হাতত সংবিধান লৈ শপত গ্ৰহণ কৰিবলৈ উপস্থিত হয় প্ৰিয়ংকা।
এতিয়াৰ পৰা গান্ধী পৰিয়ালৰ তিনিগৰাকী একেলগে সাংসদ ভৱনত উপস্থিত থাকিব পাৰিব। ৰাহুল গান্ধী ৰায়ে বৰেলীৰ সাংসদ, প্ৰিয়ংকা গান্ধী ৱাইনাডৰ পৰা নিৰ্বাচিত হোৱাৰ বিপৰীতে ছোনিয়া গান্ধী ৰাজ্যসভাৰ সাংসদ।
সোমবাৰৰ পৰা আৰম্ভ হৈছে সংসদৰ শীতকালীন অধিৱেশন। ২০ ডিচেম্বৰলৈকে চলিব এই অধিৱেশন। প্ৰিয়ংকাই এতিয়া ভাতৃ ৰাহুলৰ সৈতে একেলগে লোকসভাত কেন্দ্ৰীয় চৰকাৰক কামৰ খতিয়ান দেখুৱাব বুলি ধাৰণা কৰা হৈছে। সংসদত উপস্থিত হোৱাৰ আগতেই প্ৰিয়ংকা গান্ধীয়ে মোডী চৰকাৰৰ কাম-কাজৰ ক্ষেত্ৰত চৰকাৰক অহৰহ মন্তব্য কৰি আহিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
