জাতিগত জনগণনাক লৈ ৰাহুল গান্ধীক উদ্দেশ্যি কৰা অনুৰাগ ঠাকুৰৰ মন্তব্যক লৈ উত্তাল লোকসভা৷ মঙলবাৰে BJPৰ সাংসদগৰাকীয়ে কয়, ‘যাৰ নিজৰ জাতৰেই কোনো ঠিক নাই তেওঁ জাতিগত লোকপিয়লৰ কথা কয়৷’ অনুৰাগৰ এই মন্তব্যক লৈ লগে লগেই জাঙোৰ খাই উঠে বিৰোধী দলৰ সাংসদসকল৷
ক্ষোভত ফাটি পৰে বিৰোধী সাংসদসকলো৷ ৰাহুল গান্ধীয়ে BJP সাংসদৰ বক্তব্যৰ মাজতে বাধা প্ৰদানো কৰে৷ বিৰোধী নেতাগৰাকীয়ে লগে লগেই প্ৰত্তুত্যৰত কয়, ‘আপুনি যিমান মন যায় মোক অপমান কৰক৷ কিন্তু পাহৰি নাযাব এই সংসদতেই জাতিগত লোকপিয়ল বিল আমি পাছ কৰাম৷’ তীব্ৰ প্ৰতিবাদৰ মাজত অনুৰাগ ঠাকুৰে ছাফাই দি কয়, ‘মই কাৰো নাম লৈ এই মন্তব্য কৰা নাই৷’ লোকসভাত চিঞৰ বাখৰৰ পৰিবেশ সৃষ্টি হোৱাত স্পিকাৰৰ চেয়াৰত বহি থকা জগদম্বিকা পালে সকলোকে শান্ত হ’বলৈ আহ্বান জনায়৷ অনুৰাগ ঠাকুৰৰ বাকী বক্তব্য স্পষ্টভাৱে শুনাত বাধা হৈ পৰে বিৰোধীৰ চিঞৰ বাখৰ৷
https://x.com/AshishSinghKiJi/status/1818246185993576768
অনুৰাগ ঠাকুৰৰ মন্তব্যৰ পাছতেই ৰাহুল গান্ধীয়ে কয়, ‘যিয়ে দেশৰ পিছপৰি থকা শ্ৰেণী, দুখীয়াৰ হৈ কথা কয় তেওঁলোকক গালি গালাজ কৰাটো এওঁলোকৰ স্বভাৱ৷ আমি সকলো বুজি পাওঁ৷ ঠিক যেনেকৈ মহাভাৰতত অৰ্জুনে সকলো মূৰ পাতি মানি লৈছিল৷ আমিও কেৱল চৰাইৰ চকুযুৰিহে দেখা পাওঁ৷ আমাৰ টাৰ্গেট লোকসভাত জাতিগত লোকপিয়ল বিল পাছ কৰোৱা৷ সেয়া আমি কৰিমেই৷ আমাক যিমান মন যায় অপমান কৰক৷’ লগতে তেওঁৰ দাবী, ‘অনুৰাগ ঠাকুৰে তেওঁক টাৰ্গেট কৰি অৱমাননাকৰ বাক্য প্ৰয়োগ কৰিছে৷ কিন্তু BJP সাংসদসকলৰ পৰা ক্ষমা ভিক্ষা ৰাহুলে নিবিচাৰে৷ এদিন লোকসভাত সমাজবাদী পাৰ্টীৰ সাংসদ অখিলেশ যাদৱৰ সৈতেও তৰ্কাতৰ্কি হৈছিল অনুৰাগ ঠাকুৰৰ৷ অখিলেশে প্ৰশ্ন কৰিছিল, ‘কেনেকৈ এজনৰ জাত তুলি আপুনি কথা ক’ব পাৰে? লোকসভাত এই ধৰণৰ আচৰণ অনুচিত৷’ ইয়াৰোপৰি সংসদৰ বাজেটক লৈ বিতৰ্কৰ মাজতেই অগ্নিপথ প্ৰকল্পক লৈয়ো সৰৱ হৈছিল অখিলেশ যাদৱ৷ উত্তৰত সমাজবাদী পাৰ্টীৰ প্ৰধানৰ সৈতে উত্তপ্ত বাক্যবিনিময় হৈছিল অনুৰাগ ঠাকুৰৰ৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
