অসম লাইভ২৪ঃ ভাৰত জোড়ো যাত্ৰাৰ পাছত এইবাৰ ‘ভাৰত ন্যায় যাত্ৰা’। মণিপুৰৰ পৰা মুম্বাইলৈকে দীৰ্ঘ পথজুৰি ৰাহুলে কৰিব এই ন্যায় যাত্ৰা। ১৪ জানুৱাৰীৰ পৰা আৰম্ভ হ’ব এই যাত্ৰা। আৰু যাত্ৰাৰ অন্ত পৰিব ২০ মাৰ্চত। কংগ্ৰেছৰ সাধাৰণ সম্পাদক কে ছি বেণুগোপালে জনাইছে এই কথা।
২১ ডিচেম্বৰত কংগ্ৰেছ ৱৰ্কিং কমিটিয়ে সৰ্বসন্মতিক্ৰমে এটা মতামত দিছিল যে ৰাহুল গান্ধীয়ে উত্তৰ পূবৰ পৰা পশ্চিমলৈ যাত্ৰা আৰম্ভ কৰিব লাগে। ৰাহুল গান্ধীয়েও CWCৰ এই ইচ্ছাত সন্মতি প্ৰকাশ কৰিছে। অল ইণ্ডিয়া কংগ্ৰেছ কমিটিয়ে মণিপুৰৰ পৰা মুম্বাইলৈ ১৪ জানুৱাৰীৰ পৰা ২০ মাৰ্চলৈ ‘ভাৰত ন্যায় যাত্ৰা’ চলাব। ৬৫ দিনীয়া পদযাত্ৰাৰ সময়ত ৰাহুলে অতিক্ৰম কৰিব ৬,২০০ কিলোমিটাৰ দূৰত্ব। ১৪ খন ৰাজ্য আৰু ৮৫ খন জিলা অতিক্ৰম কৰিব এই যাত্ৰাত।
যাত্ৰাই সামৰি ল’ব লগা ১৪খন ৰাজ্যৰ ভিতৰত আছে, মণিপুৰ, নাগালেণ্ড, অসম, মেঘালয়, পশ্চিমবংগ, বিহাৰ, ঝাৰখণ্ড, উৰিষ্যা, ছত্তীশগড়, উত্তৰ প্ৰদেশ, মধ্য প্ৰদেশ, ৰাজস্থান, গুজৰাট আৰু মহাৰাষ্ট্ৰ। বেণুগোপালে জনোৱা অনুসৰি এই যাত্ৰাত ৰাহুল গান্ধীয়ে যুৱ, মহিলা আৰু প্রান্তীয় লোকসকলৰ সৈতে বাৰ্তালাপতো মিলিত হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
