প্ৰাণনাশকাৰী বৰষুণ, এতিয়ালৈকে প্ৰাণ হেৰুৱালে ১৩ জনে, ৪৯ গৰাকী বৰ্তমানেও সন্ধানহীন
কাল হৈ নামিছে বৰষুণ, ধাৰাসাৰ বৰষুণৰ বাবেই প্ৰাণ হেৰুৱালে ১৩ গৰাকীকৈ লোকে। আনহাতে বৰ্তমানেও সন্ধানহীন ৪৯ গৰাকী লোক। কোনো শুংসুত্ৰ নাই ৪৯ গৰাকীৰ। বৰষুণৰ বাবে বহু বাধা থাকিলেও সেই বাধা নেওচি উদ্ধাৰ অভিযান অব্যাহত ৰাখিছে উদ্ধাৰকাৰী দলে।
পাহাৰীয়া ৰাজ্য উত্তৰাখণ্ডত বৰষুণৰ বাবে দুৰ্যোগলৈ পৰিণত হৈছে। উত্তৰাখণ্ড আৰু হিমাচল প্ৰদেশত বৰষুণৰ ফলত বহু লোকৰ মৃত্যু হৈছে। তথ্য অনুসৰি উত্তৰাখণ্ডত এতিয়ালৈকে ১৩ জন লোকৰ মৃত্যু হৈছে। হৰিদ্বাৰত ৪ জন, তেহৰীত ৩ জন, ডেৰাডুনত ৩ জন, চামোলী, ৰুদ্ৰপ্ৰয়াগ আৰু নৈনিতালত এজনকৈ লোকৰ মৃত্যু হোৱাৰ খবৰ পোৱা গৈছে।
আনহাতে ১৬ জন লোক নিৰুদ্দেশ হোৱা বুলি জানিব পৰা গৈছে। ইফালে কেদাৰনাথত আবদ্ধ হৈ থকা ২৫৩৭জন যাত্ৰীক উদ্ধাৰ কৰা হৈছে। হেলিকপ্টাৰেৰে ৭৩৭ গৰাকী যাত্ৰীক উলিয়াই অনা হয়। উদ্ধাৰ অভিযানত চিনুক আৰু এম আই ১৭কো নিয়োগ কৰা হৈছিল।
উত্তৰাখণ্ডত হোৱা নেৰানেপেৰা বৰষুণৰ ফলত নদীৰ জলপৃষ্ঠ বৃদ্ধি পাইছে। ইয়াৰ বাবে বহু ঠাইত বান পৰিস্থিতি অব্যাহত আছে। প্ৰচণ্ড সোঁতৰ বাবে বাট-পথ উটুৱাই নিয়াৰ ফলত আবদ্ধ হৈ পৰিছে বহু লোক। উত্তৰাখণ্ডৰ দুৰ্যোগৰ ওপৰত চকু ৰাখিছে প্ৰধানমন্ত্ৰী নৰেন্দ্ৰ মোদীয়ে। ইয়াত বায়ুসেনাৰ চিনুক, এম আই ১৭ আৰু এ টি এফৰ তিনিখন টেংকাৰক উদ্ধাৰৰ বাবে প্ৰেৰণ কৰা হৈছে। মুখ্যমন্ত্রী পুষ্কৰ সিং ধামীৰ অনুৰোধত পিএমঅ’ই সকলো প্রয়োজনীয় সহায়ৰ আশ্বাস দিছে৷ বিজেপিৰ ৰাষ্ট্ৰীয় সভাপতি জে পি নাড্ডাইও পৰিস্থিতিৰ ওপৰত চকু ৰাখিছে।
বুধবাৰে মাজনিশা হিমাচল প্ৰদেশতো ধাৰাসাৰ বৰষুণে বিধ্বংসী ৰূপ ধাৰণ কৰিছে। ডাৱৰ বিস্ফোৰণে ছয় স্থানত বিপুল ধ্বংসলীলাৰ সৃষ্টি কৰিছে। ৰাজ্যত সন্ধানহীন হৈছে ৪৯জন লোক। এই পৰ্যন্ত ৫ টা মৃতদেহ উদ্ধাৰ কৰা হৈছে। ৪৭টা ঘৰ, ১০খন দোকান, ৭খন দলং, তিনিখন বিদ্যালয়, এখন ঔষধৰ দোকান, এখন বাছ ষ্টেণ্ড, ১৮খন বাহন, দুটা বিদ্যুৎ প্ৰকল্প আৰু এটা মথাউৰি জাহ গৈছে।
শিমলাৰ ৰামপুৰত সংঘটিত ডাৱৰ বিস্ফোৰণৰ ঘটনাৰ পিছত এতিয়াও ৩৬ জন নিৰুদ্দেশ হোৱা লোকৰ সন্ধান অব্যাহত আছে। এন ডি আৰ এফ, সেনা, আই টি বি পি, এছ ডি আৰ এফ, হিমাচল আৰক্ষীয়ে নলাত তালাচী অভিযান চলাই আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
