দেশজুৰি চৰ্চিত হৈ থকা ৰাম মন্দিৰ দান-পাত্ৰৰ ধন চুৰি কাণ্ডৰ তদন্তত নতুন নতুন তথ্য পোহৰলৈ আহিছে। ইতিমধ্যে ঘটনাৰে জড়িতৰ অভিযোগত এই পৰ্যন্ত ৮জন লোকক গ্ৰেপ্তাৰ কৰি ১৪ দিনৰ ন্যায়িক জিম্মালৈ প্ৰেৰণ কৰিছে। এই অভিযুক্তসকলৰ ভিতৰত অন্যতম অনুকল্প, লৱ-কুশ আৰু টিন্নু যাদৱ। ইপিনে ৰাম মন্দিৰত নিয়োজিত ৪০০জন ব্যক্তিগত নিৰাপত্তাৰক্ষীকো তদন্তকাৰী সংস্থাই টাৰ্গেটত ৰাখিছে। এই আটাইকেইজনকে তদন্তৰ আওতালৈ অনা হ’ব বুলি ইতিমধ্যে তদন্তকাৰী সংস্থাটোৱে জানিবলৈ দিছে। আযোধ্যাৰ ৰাম মন্দিৰৰ দৰ্শন পথ, প্ৰৱেশ-প্ৰস্থান দুৱাৰ আৰু দান-ধন স্থানান্তৰৰ পথত নিয়োজিত কিছুমান নিৰাপত্তাৰক্ষীৰ শিথিলতাৰ সুযোগ লৈ এই চুৰিকাণ্ড সংঘটিত হৈছিল বুলি সন্দেহ প্ৰকাশ কৰা হৈছে। এই সন্দৰ্ভত ডিউটী ৰোষ্টাৰ, CCTV ফুটেজ, প্ৰৱেশ-প্ৰস্থানৰ ৰেকৰ্ড, সংশ্লিষ্ট বিষয়াসকলৰ বক্তব্য আদি সকলো তথ্য সংগ্ৰহ কৰি বিশদ তদন্ত চলাই থকা হৈছে।
SBIৰ সৈতে হোৱা MoUৰ বহু নিয়ম ভংগৰ অভিযোগ
অযোধ্যাৰ ৰাম মন্দিৰৰ দান-পাত্ৰৰ পৰা সংগৃহীত ধনৰ গণনা সম্পূৰ্ণ স্বচ্ছ আৰু সুৰক্ষিতভাৱে সম্পন্ন কৰিবলৈ শ্ৰীৰাম জন্মভূমি তীৰ্থ ক্ষেত্ৰ ট্ৰাষ্ট আৰু ভাৰতীয় ষ্টেট বেংকৰ মাজত ২০২৫ চনৰ ফেব্ৰুৱাৰীত এখন বিস্তৃত MoU স্বাক্ষৰ হৈছিল। এই চুক্তিত ট্ৰাষ্ট আৰু বেংকৰ দায়িত্ব স্পষ্টভাৱে নিৰ্ধাৰণ কৰা হৈছিল, যাতে সমগ্ৰ প্ৰক্ৰিয়াটো স্বচ্ছ আৰু নিয়াৰিকৈ হয়। কিন্তু SITৰ তদন্তত বহু গুৰুত্বপূৰ্ণ নিয়ম নিয়মীয়াকৈ মানি চলা হোৱা নাছিল বুলি তথ্য পোহৰলৈ আহিছে।
কোনবোৰ নিয়ম ভংগ হৈছিল?
তদন্তসূত্ৰে প্ৰকাশ পোৱা তথ্য অনুসৰি MoU অনুসৰি দান-পাত্ৰ খোলা আৰু ধন গণনাৰ সময়ত ট্ৰাষ্ট আৰু SBI বিষয়াৰ যৌথ উপস্থিতি বাধ্যতামূলক আছিল। ধন গণনাত নিয়োজিত কৰ্মচাৰীৰ বাবে নিৰ্দিষ্ট ড্ৰেছ কোড নিৰ্ধাৰণ কৰা হৈছিল। SBIৰ বিষয়াসকলক প্ৰতি মাহে সলনি কৰাৰ ব্যৱস্থা আছিল, কিন্তু কেইজনমান কৰ্মচাৰী দীঘলীয়া সময় একেটা দায়িত্বতে আছিল। গণনা কক্ষত প্ৰৱেশ আৰু ওলাই যোৱা প্ৰতিজন কৰ্মচাৰীৰ নিয়মীয়া বা আকস্মিক তালাচী লোৱাৰ নিয়ম আছিল। প্ৰতিটো দান-পাত্ৰৰ ধন পৃথকভাৱে লিপিবদ্ধ কৰি ক্ৰম অনুসৰি গণনা কৰাৰ ব্যৱস্থাও আছিল। তদন্তকাৰী সংস্থাই এতিয়া এই সকলো নিয়ম কিমান পৰিমাণে পালন কৰা হৈছিল, তাৰো তদন্ত চলাই আছে। লগতে দৈনিক প্ৰতিবেদন, জমা ৰচিদ, ৰেজিষ্টাৰ আৰু আন নথি-পত্ৰসমূহো সূক্ষ্মভাৱে পৰীক্ষা কৰা হৈছে।
লৱকুশ, অনুকল্প আৰু টিন্নু যাদৱৰ সম্পত্তিৰ তালাচী
ৰাম মন্দিৰ দান পাত্ৰৰ ধন চুৰিৰ অভিযুক্তসকলৰ অন্যতম লৱকুশ, অনুকল্প আৰু টিন্নু যাদৱৰ সম্পত্তিতো তালাচী অভিযান চলাই আছে SITৰ এটা দলে। অভিযুক্ত লৱকুশৰ আয়ৰ বিপৰীতে অসমঞ্জস্য সম্পত্তিৰ তথ্য লাভ কৰিছে তদন্তকাৰী গোটটোৱে। লৱকুশই পত্নীৰ নামত ভূমি ক্ৰয় কৰি তাত এটা তিনিমহলীয়া বিলাসী অট্টালিকা নিৰ্মাণ কৰাৰো তথ্য লাভ কৰিছে SIT-এ। ইয়াৰ উপৰিও অনুকল্প আৰু আৰু টিন্নু যাদাৱৰ বেংকৰ বিভিন্ন নথিৰো পৰীক্ষা কৰিছে তদন্তকাৰী সংস্থাই। আন আন অভিযুক্তসকলোৰে সম্পত্তিৰ তালাচী চলাই থকা হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
