অসম লাইভ২৪ঃ মাজত মাত্ৰ এমাহ। ঠিক এমাহৰহে অপেক্ষা। ২২ জানুৱাৰীত উদ্বোধন হ’ব অযোধ্যাৰ ৰাম মন্দিৰ। এই মন্দিৰৰ সৈতে লাখ লাখ মানুহৰ আৱেগ মিশ্ৰিত হৈ আছে। একেই কথা এজন ভোজপালি বাবাৰো। ৰাম মন্দিৰক লৈ যাৰ অটুত ভক্তি। সেয়ে তেওঁ ভীষ্ম প্ৰতিজ্ঞা কৰিছিল। ৰাম তেওঁৰ প্ৰধান আৰাধ্য দেৱতা। ৰামৰ প্ৰতি তেওঁৰ ইমানেই ভক্তি যে অযোধ্যালৈ গৈ কেইবাদশক পূৰ্বে তেওঁ কৰিছিল এটাই প্ৰতিজ্ঞা। সেই প্ৰতিজ্ঞাত তেওঁ আজিও অটল।
ৰামৰ প্ৰতি থকা ভক্তিৰ বাবেই তেওঁ প্ৰতিজ্ঞা কৰিছিল, ৰাম মন্দিৰ নিৰ্মাণ নোহোৱালৈকে তেওঁ বিবাহত নবহে। সেই প্ৰতিজ্ঞা তেওঁ ৰাখিছে। আজিও ভোজপালি বাবা সেই প্ৰতিজ্ঞাৰেই অবিবাহিত হৈ আছে। ২২ জানুৱাৰীত ৰাম মন্দিৰৰ উদ্বোধনী অনুষ্ঠানলৈ আমন্ত্ৰণ লাভ কৰিছে তেওঁ। মাজত মাত্ৰ এমাহ। অযোধ্যাৰ ৰাম মন্দিৰত বিভিন্ন দেশৰ সাধু সন্তসকলে আমন্ত্ৰণ লাভ কৰিছে। সেই আমন্ত্ৰিত অতিথিৰ তালিকাত নিজৰ নাম দেখি উৎফুল্লিত হৈ পৰিছে ভোজপালি বাবা।
ভোজপালি বাবাৰ প্ৰকৃত নাম ৰবীন্দ্ৰ গুপ্তা। ১৯৯২ চনত এজন কৰসেৱক হিচাপে ভোজপালী বাবা অযোধ্যালৈ গৈছিল। সেই সময়ত তেওঁৰ বয়স ২১ বছৰ। তেতিয়াই ভোজপালি বাবাই প্ৰতিজ্ঞা কৰিছিল ৰাম মন্দিৰৰ উদ্বোধন নোহোৱালৈকে তেওঁ বিবাহপাশত আৱদ্ধ নহয়। তেওঁ আশা কৰা ধৰণেই ৰামমন্দিৰৰ নিৰ্মাণৰ কাম প্ৰায় সম্পূৰ্ণ হৈছে। বহুবাৰ তেওঁক ঘৰৰ মানুহে বিবাহৰ কথা কৈছিল। কিন্তু তেওঁ নিজা প্ৰতিজ্ঞাত অটল। এইবাৰ তেওঁৰ পৰিয়ালৰ মনত আশা ভোজপালি বাবাই বিবাহপাশত আৱদ্ধ হ’ব। ঘৰৰ মানুহে আশা কৰিলেও অৱশ্যে বাবাৰ বিবাহৰ বয়স ভটিয়াইছে। সেয়ে তেওঁ বিবাহপাশত আৱদ্ধ হোৱাৰ আশা খুবেই ক্ষীণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
