অসম লাইভ ২৪ঃ এতিয়াৰে বগীবিল দলঙত উঠিলেই দিব লাগিব টকা। শীঘ্ৰেই বগীবিলত মুকলি হ’ব টোলগেট। ধেমাজি-ডিব্ৰুগড় সংযোগী ১৫ নং ৰাষ্ট্ৰীয় ঘাইপথত ৰাষ্ট্ৰীয় ঘাইপথ প্ৰাধিকৰণ আৰু অসম চৰকাৰৰ গড়কাপ্তানি বিভাগে নিৰ্মাণ কৰিছে টোলগেটখন। দল-সংগঠন তথা স্থানীয় ৰাইজৰ প্ৰতিবাদকো আওকান কৰি বগীবিলত স্থাপন কৰা টোলগেটৰ নিৰ্মাণকাৰ্য ইতিমধ্যে প্ৰায় সম্পূৰ্ণ হৈ উঠিছে। কম দিনৰ ভিতৰতে বগীবিলৰ টোলগেট মুকলি কৰিব কেন্দ্ৰীয় চৰকাৰে। উজনি অসমৰ উত্তৰ আৰু দক্ষিণ দিশক সংযোগ কৰি ব্ৰহ্মপুত্ৰৰ বুকুত নিৰ্মাণ কৰা বগীবিল দলং উদ্বোধনৰ দুটা বছৰৰ পিছত দলঙৰ সমীপত টোলগেট মুকলিৰ দিশে আগবাঢ়িছে চৰকাৰ। ৰাষ্ট্ৰীয় ঘাইপথ প্ৰাধিকৰণ আৰু অসম চৰকাৰৰ গড়কাপ্তানি বিভাগৰ দ্বাৰা ১৫ নং ৰাষ্ট্ৰীয় ঘাইপথৰ বগীবিল দলঙৰ সমীপৰ দক্ষিণপাৰৰ বুঢ়াসজাত নিৰ্মাণ কৰা হৈছে এই টোলগেটটো। ৯ কোটি ৫৮ লাখ ৭১ হাজাৰ টকা ব্যয়সাপেক্ষে নিৰ্মাণ কৰা টোলগেটখন৷ ৰাজ্যত অত্যাৱশ্যকীয় সামগ্ৰীৰ মূল্যবৃদ্ধিয়ে জনসাধাৰণক কোঙা কৰি তোলাৰ সময়তে জনসাধাৰণৰ মূৰত ৰাম টাঙোন শোধাই বিজেপি চৰকাৰে বগীবিলত স্থাপন কৰা টোলগেটক লৈ ব্যাপক প্ৰতিক্ৰিয়াৰ সৃষ্টি হৈছে। শেহতীয়াকৈ বগীবিলৰ টোলগেটৰ বিৰুদ্ধে ৰাজ্যৰ জাতীয়, জনগোষ্ঠীয় সংগঠনে ব্যাপক প্ৰতিবাদ সাব্যস্ত কৰিছিল। কিন্তু জনতা আৰু জাতীয় সংগঠনৰ প্ৰতিবাদী কন্ঠক নস্যাৎ কৰি বগীবিল টোলগেট স্থাপনত বদ্ধপৰিকৰ হৈছে বিজেপি চৰকাৰ। উল্লখ্যে যে, বগীবিল দলঙৰ সমীপত স্থাপন কৰা টোলগেট মুকলিৰ লগে লগে উত্তৰ আৰু দক্ষিণপৰীয়া লোকসকলৰ মাজত ব্যাপক সমস্যাৰ সন্মুখীন হ’ব। কাৰণ উজনিৰ ধেমাজি, লখিমপুৰকে ধৰি চুবুৰীয়া ৰাজ্য অৰুণাচল প্ৰদেশৰ প্ৰায় ৬০ শতাংশ লোক ব্যৱাসায় বা চিকিৎসাৰ কামত ডিব্ৰুগড়লৈ আহে। এইসকলৰ ভিতৰত আছে অৰ্ধেকসংখ্যক লোক দৰিদ্ৰ তথা মধ্যবিত্ত পৰিয়ালৰ। তেনেস্থলত টোলগেট স্থাপনৰ লগে লগে এইসকল সাধাৰণ লোকসকলৰ মাজত হৈ পৰিব পানীত হাঁহ নচৰা অৱস্থা। কোৱা বাহুল্য যে, উত্তৰপাৰৰ পৰা ৮০ শতাংশ শাক-পাচলি বিক্ৰীৰ বাবে আনে ডিব্ৰুগড়লৈ। ইফালে, টোলগেট স্থাপনৰ লগে লগে বৃদ্ধি পাব যান-বাহনৰ ভাড়া। কাৰণ টোলগেটত প্ৰতিখন বাহনৰ বাবদ ভৰিব লাগিব ডেৰশ টকাৰ পৰা তিনিশ টকা পৰ্যন্ত। ২০১৮ চনৰ ২৫ ডিচেম্বৰত বগীবিল দলঙে উত্তৰ আৰু দক্ষিণ পাৰক সংযোগ ঘটালেও বিজেপি চৰকাৰে উন্নয়নৰ নামত টোলগেট স্থাপনৰ কাৰ্যই সম্প্ৰতি ব্যাপক প্ৰতিক্ৰিয়াৰ সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
