অসম লাইভ ২৪ ডিজিটেল ডেস্কঃ বিশ্বজুৰি ক’ৰোনাৰ সংহাৰৰ সময়তে কোভিড-১৯ ৰোগীলৈ আশাৰ ৰেঙনি কঢ়িয়াইছে ‘ৰেমডেছিভিৰ’এ৷ কোভিড-১৯ ৰোগীৰ জৰুৰীকালীন চিকিৎসাৰ বাবে ‘ৰেমডেছিভিৰ’ৰ ব্যৱহাৰত অনুমোদন জনাইছে কেন্দ্ৰীয় চৰকাৰে৷ ‘ৰেমডেছিভিৰ’ ‘গিলীড চাইন্সেছ ইংক’ৰ এণ্টিভাইৰেল ঔষধ৷ কোভিড-১৯ ৰোগীৰ চিকিৎসাৰ ক্ষেত্ৰত আনুষ্ঠানিক ক্লিনিকেল ট্ৰায়েলত অগ্ৰগতি প্ৰদর্শন কৰা প্ৰথমবিধ ঔষধেই হ’ল ‘ৰেমডেছিভিৰ’৷ কোভিড-১৯ ৰোগীৰ জৰুৰীকালীন চিকিৎসাত ‘ৰেমডেছিভিৰ’ৰ ব্যৱহাৰত ১ জুনত অনুমোদন জনাইছে দেশৰ ড্ৰাগছ কণ্ট্ৰ’লাৰ জেনেৰেলে৷ আমেৰিকাৰ খাদ্য আৰু ঔষধ প্ৰশাসনে ‘ৰেমডেছিভিৰ’ৰ ব্যৱহাৰত অনুমোদন জনাইছে এমাহ পূর্বে৷ জাপানৰ স্বাস্থ্য সেৱা নিয়ন্ত্ৰকেও ঔষধবিধৰ ব্যৱহাৰত অনুমোদন জনাইছে৷ ‘ৰেমডেছিভিৰ’ৰ উৎপাদনকাৰী সংস্থা ‘গিলীড চাইন্সেছ ইংকে’ জনোৱা মতে কোভিড-১৯ ৰোগীৰ চিকিৎসাৰ ক্ষেত্ৰত ঔষধবিধে ভাল ফল দেখুৱাইছে সেইসকলৰ ক্ষেত্ৰত যিসকলক ৫ দিনৰ বাবে দৰববিধ দিয়া হৈছে; ১০ দিনৰ বাবে দৰব দিয়াসকলৰ ক্ষেত্ৰত আশাপ্ৰদ ফলাফল লাভ কৰা হোৱা নাই৷ সেইবাবে ঔষধবিধৰ ৫দিনীয়া ব্যৱহাৰত গুৰুত্ব আৰোপ কৰা হৈছে৷ ইপিনে বিশ্বৰ বিভিন্ন ৰাষ্ট্ৰই ঔষধবিধৰ ভাল ফলাফললৈ আশাৰে বাট চাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
