এই ক্ষতস্থান জানো পাহৰিব পৰা যাব? এই ভয়ংকৰ স্মৃতি কেতিয়াও আৰু মছিব পৰা নাযাব৷ কন্যাক হেৰুৱাই এতিয়া নিঃস্ব তেওঁৰ পিতৃ-মাতৃ৷ ঘটনাৰ পাছতেই আৰ জি কৰ হাস্পতালত উপস্থিত হৈ কি দেখিছিল চিকিৎসকগৰাকীৰ পিতৃয়ে? সেই ঘটনাৰ বৰ্ণনা দিছে মৃত চিকিৎসকগৰাকীৰ পিতৃয়ে৷ লগতে তেওঁ জনাইছে যে কিয় তেওঁ আস্থা হেৰুৱাইছে মমতা চৰকাৰৰ ওপৰত৷
বিগত ৯ আগষ্টত আৰ জি কৰ মেডিকেল কলেজ হাস্পতালৰ পৰা উদ্ধাৰ হৈছিল তৰুণী চিকিৎসকৰ দেহ৷ হাস্পতালখনৰ চাৰিমহলাত থকা ছেমিনাৰ হলত পৰি আছিল চিকিৎসকগৰাকীৰ দেহ৷ কি অৱস্থাত দেখা পাইছিল পিতৃয়ে একমাত্ৰ কন্যাৰ দেহ, সেই মুহূৰ্তৰ বৰ্ণনা দিবলৈ গৈ কথা লাগি লাগি ধৰিছে পিতৃৰো৷
পিতৃয়ে কয়, ‘১১ বজাত মোলৈ এটা ফোন আহিছিল৷ মোৰ কন্যাই আত্মহত্যা কৰিছে বুলি৷ আমি খবৰ লাভ কৰি লগে লগে ১২ বজাত হাস্পতালত উপস্থিত হওঁ৷ কিন্তু তেতিয়া মই দেহটো দেখা নাপালো৷’ লগতে পিতৃয়ে কয়, ‘মই জানো মোৰ কন্যাৰ দেহ দেখাৰ পাছত মোৰ মূৰৰ ওপৰেৰে কেনে এজাক ধুমুহা বৈছিল৷ মই এতিয়া সৰ্বস্বান্ত৷ সকলো হেৰুৱাই পেলালো মই৷ মোৰ জীয়াই থাকিবলৈ সন্মুখতনো কি সপোন থাকিব৷ মোৰ এটাই আশা মোৰ কন্যাই সুবিচাৰ পাওক৷’
পিতৃয়ে লগতে কয়, ‘মোৰ কন্যাক তালৈ শিক্ষা আৰু চাকৰিৰ বাবে পঠিয়াইছিলো৷ তেওঁলোকে মোৰ কন্যাক সুৰক্ষা দিয়াত ব্যৰ্থ হৈছে৷ মইয়েই নহয় সকলো পিতৃ-মাতৃয়েই সন্তানক শিক্ষাৰ বাবে স্কুল কলেজলৈ পঠিয়াই৷ এই স্কুল কলেজক সকলো পিতৃ-মাতৃয়েই নিৰ্ভৰযোগ্য স্থান বুলি ভাৱে৷ লোহাৰ গেটৰ ভিতৰত কি হৈছে আমি একো নাজানো৷ আমি কেৱল তেওঁলোকৰ ওপৰত আস্থা ৰাখি সন্তানক এৰি আহো৷ হাস্পতালৰ ক্ষেত্ৰতো একেই৷ আমি ভৰষা কৰিয়েই সন্তানক তাত কাম কৰিবলৈ এৰি আহিছিলো৷’
কন্যাক হেৰুৱাই ভাঙি পৰা পিতৃয়ে ক্ষোভ উজাৰিছে মুখ্যমন্ত্ৰী মমতাৰ বিৰুদ্ধেও৷ তেওঁ কয়, ‘আগতে মোৰ মুখ্যমন্ত্ৰীৰ ওপৰত ভৰষা আছিল৷ কিন্তু এতিয়া মোৰ তিলমানো ভৰষা নাই৷ তেওঁ কি বিচাৰ বিচাৰিছে? তেওঁতো মোৰ কন্যাক এনেকৈ শেষ কৰাক লৈ এতিয়াও একো কৰাই নাই৷’ পিতৃয়ে ক্ষোভ উজাৰি থকাৰ সময়ত কাষতেই ৰৈ আছিল চিকিৎসকগৰাকীৰ মাতৃও৷ তেওঁয়ো মমতা চৰকাৰৰ বিৰুদ্ধে ক্ষোভ উজাৰি কয়, ‘মমতা বেনাৰ্জীৰ সকলো প্ৰকল্প, কন্যাশ্ৰী, লক্ষ্মীৰ ভাণ্ডাৰ সকলো ভাওনা৷ যিসকলে এই প্ৰকল্পৰ সুবিধা ল’ব বিচাপে তেওঁলোকেও এবাৰ ভাৱি চাব আপোনাৰ ঘৰৰ লক্ষ্মী সুৰক্ষিতভাৱে আছেনে?’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
