আৰ জি কৰ মেডিকেল কলেজ হাস্পতালত চিকিৎসকৰ গণধৰ্ষণ আৰু হত্যাকাণ্ডৰ ঘটনাত তোলপাৰ পশ্চিমবংগসহ সমগ্ৰ দেশ৷ ঘটনাৰ পাছতেই অন্যতম অভিযুক্ত ছিভিক ভলণ্টিয়াৰ সঞ্জয় ৰায়ক গ্ৰেপ্তাৰ কৰিছে আৰক্ষীয়ে৷ দেওবাৰে প্ৰেছিডেন্সি জে’লত সঞ্জয় ৰায়ৰ পলিগ্ৰাফ টেষ্ট কৰা হৈছে৷ তাতেই নিজৰ অপৰাধৰ কথা অকপটে স্বীকাৰ কৰিছে সঞ্জয়ে৷ তদন্তত এইবাৰ সঞ্জয়ৰ প্ৰসংগত আৰু এক চাঞ্চল্যকৰ তথ্য উঠিছে৷
ইণ্ডিয়া টুডেৰ এক প্ৰতিবেদনত দাবী কৰা হৈছে যে, ৩১ বছৰীয়া জুনিয়ৰ চিকিৎসকক ধৰ্ষণ কৰি হত্যা কৰাৰ পাছত নিৰ্বিকাৰ হৈ আছিল৷ লেখমাত্ৰও আতংক দেখা পোৱা নাছিল দুচকুত৷ বৰং খুবেই স্বাভাৱিক আচৰণ কৰিছিল অভিযুক্ত সঞ্জয়ে৷ ঘটনৰ পাছতেই অৰ্থাৎ ১০ আগষ্টত আৰক্ষীয়ে গ্ৰেপ্তাৰ কৰিছে সঞ্জয় ৰায়ক৷ জেৰাত নিজৰ নিয়মিত মদ্যপানৰ অভ্যাসৰ কথা স্বীকাৰ কৰিছে সঞ্জয়ে৷ সঞ্জয়ে জনাই যে মদ্যপান কৰি ৯তাৰিখে নিশা চিকিৎসকৰ ওপৰত নিৰ্যাতন চলাইছিল সঞ্জয়ে৷ চিচিটিভি ফুটেজত সেই নিশা কমপক্ষেও ১৫ জনক ছেমিনাৰ হলত সোমোওৱা দেখা গৈছিল৷ যাৰমাজত এজন হৈছে সঞ্জয়৷
আৰ জি কৰ হাস্পতালত ভৰ্তি হৈ থকা এজন ৰোগীয়ে সঞ্জয়ক চিহ্নিত কৰিছে৷ ৰোগীৰ পৰিচয়, মৃত চিকিৎসকৰ এগৰাকী বন্ধুৰ ভাতৃয়ে এই ঘটনাৰ বিৱৰণ পূৰ্বেই দিছিল৷ এই জঘন্য অপৰাধ ঘটোৱাৰ পাছত কলকাতা সশস্ত্ৰ আৰক্ষীৰ চতুৰ্থ বেটেলিয়ান বেৰেকলৈ গৈছিল সঞ্জয়৷ তাতেই সঞ্জয়ক থকাৰ ব্যৱস্থা কৰিছিল এছিচটেণ্ট ছাব ইন্সপেক্টৰ অনুপ দত্তই৷ ১০ তাৰিখে পুৱা সঞ্জয়ৰ টোপনি ভাঙিছিল যদিও আকৌ মদ্যপান কৰি শুই পৰিছিল সঞ্জয়৷
টোপনিৰ পৰা উঠাৰ পাছত সঞ্জয়ে তাৰ ছিভিক ভলণ্টিয়াৰ বন্ধু সৌৰভৰ সৈতে মধ্যাহ্নভোজনলৈ গৈছিল৷ ইয়াৰপাছতেই দুই বন্ধু মিলি যৌনপল্লীলৈ যায়৷ তাতেই আৰ জি কৰ হাস্পতালত ঘটি যোৱা ঘটনাৰ বাবে আৰক্ষীয়ে সঞ্জয়ক বিচাৰি ফুৰাৰ কথা জনায় সৌৰভে৷ প্ৰত্যুত্তৰত সঞ্জয়ে কয়, ‘চাই লম৷’ ইয়াৰপাছতেই সেই স্থান এৰি বেৰেকলৈ উভতি আহে সঞ্জয়৷ আহি আকৌ মদ্যপান কৰে৷ ইয়াৰ কিছুক্ষণ পাছতেই বেৰেকৰ পৰা নিছাগ্ৰস্থ অৱস্থাত সঞ্জয়ক গ্ৰেপ্তাৰ কৰে আৰক্ষীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
