পুনৰ কংগ্ৰেছলৈ আহিব নেকি ৰিপুন বৰা! তৃণমূল কংগ্ৰেছ ত্যাগ কৰিলে দলটোৰ ৰাজ্যিক সভাপতিগৰাকীয়ে
অসমৰ তৃণমূল কংগ্ৰেছত খহনীয়া। তৃণমূল কংগ্ৰেছ ত্যাগ কৰিলে ৰাজ্যিক সভাপতি ৰিপুণ বৰাই। ৰিপুণ বৰাৰ লগতে অসম তৃণমূল কংগ্ৰেছ ত্যাগ কৰিলে সাংগঠনিক সাধাৰণ সম্পাদক অৰূপজ্যোতি ভূঞা, প্ৰশাসনিক সাধাৰণ সম্পাদক গজেন্দ্ৰ প্ৰসাদ উপমন্যু আৰু সাধাৰণ সম্পাদক জুলফিকৰ হুছেইনে।
আসন্ন বিধানসভা নিৰ্বাচনৰ পূৰ্বেই তৃণমূল কংগ্ৰেছ ত্যাগ কৰিলে ৰাজ্যিক সভাপতি ৰিপুণ বৰাই, অসম ৰাজ্যিক তৃণমূল কংগ্ৰেছৰ সভাপতি পদৰ লগতে প্ৰাথমিক সদস্য পদৰ পৰাও পদত্যাগ কৰে বৰাই। এতিয়া পুনৰ কংগ্ৰেছলৈ আহিব নেকি প্ৰাক্তন কংগ্ৰেছীগৰাকীয়ে, তাকেই লৈ উত্থাপন হৈছে প্ৰশ্ন।
আজি ১ ছেপ্টেম্বৰ তাৰিখ দেওবাৰে বৰাই সৰ্বভাৰতীয় তৃণমূল কংগ্ৰেছৰ সভাপতি অভিষেক বেনাৰ্জীলৈ পদত্যাগ পত্ৰ প্ৰেৰণ কৰি এই কথা প্ৰকাশ কৰে। পদত্যাগ পত্ৰযোগে ৰিপুণ বৰাই কয়- মোৰ প্ৰতি মমতা দিদি তথা দলৰ শীৰ্ষ নেতৃত্বই যি আস্থা দেখুৱাই সভাপতিৰ দৰে এটা সন্মানীয় পদত অধিষ্ঠিত কৰাইছিল, তাকলৈ মই সদায় কৃতজ্ঞ। বিজেপিৰ শাসন ৰোধ কৰাৰ বাবে মই মোৰ বিবেকক সুধি তৃণমূল কংগ্ৰেছত যোগ দিছিলো।
অসম লাইভৰ সৈতে হোৱা কথোপকথনত নেতাগৰাকীয়ে কয় – কাৰো প্ৰতি মোৰ আক্ষেপ নাই। কংগ্ৰেছৰ পৰা গৈ যোগদান কৰিছিলো। পশ্চিমত টিএমচিয়ে যি দৰে বিজেপিৰ বিৰুদ্ধে যুঁজ দিছিল, সেই উদ্দেশ্যে লৈ অসমতো বিজেপিৰ বিৰুদ্ধে যুঁজ দিবলৈ টিএমচিত যোগ দিছিলো। কিন্তু অসমত ৰাইজে টিএমচিক গ্ৰহণ নকৰে। বেংগলৰ দল বুলি ৰাইজে ভাবে। আমি চেষ্টা কৰিও বুজাব নোৱাৰিলো যোৱা আঢ়ৈ বছৰে।
আনহাতে অন্য দলত যোগদান কৰাৰ ক্ষেত্ৰত তেখেতে কয়- কংগ্ৰেছতে হওক বা আন দলতে হওক এতিয়াই যোগদানৰ কথা ভবা নাই । সকলোৰে লগত আলোচনা কৰিব লাগিব।
কংগ্ৰেছ মোৰ পুৰণি ঘৰ ,সেয়ে ঘুৰি যোৱাত আপত্তি নাই। কিন্তু কংগ্ৰেছে মোক বিছাৰিবও লাগিব। অৱশ্যে বিজেপি বিৰোধী স্থিতিত সদায় থাকিম।
উল্লেখ্য যে, ২০২২ চনৰ ১৭ এপ্ৰিলত ভাৰতীয় জাতীয় কংগ্ৰেছ এৰি তৃণমূল কংগ্ৰেছত যোগদান কৰিছিল ৰিপুণ বৰাই। আজি ১ ছেপ্টেম্বৰ ২০২৪ তাৰিখে দলটো ত্যাগ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
