মনোকামনা পূৰণ নহল! নতুন বছৰত মাতৃক চাৰপ্ৰাইজ দিয়া নহ’ল ঋষভৰ! দুৰ্ঘটনাত পতিত ঋষভ পণ্টৰ স্বাস্থ্য শেহতীয়া আপডেট কি?

অসম লাইভ২৪ঃ নিজেই গাড়ী চলাই নতুন বছৰত মাতৃৰ চাৰপ্ৰাইজ দিবলৈ দিল্লীৰ পৰা ডেৰাডুনলৈ ৰাওনা হৈছিল ক্ৰিকেটাৰ ঋষভ পণ্ট৷ কিন্তু মাতৃক চাৰপ্ৰাইজ দিয়া নহ’ল ঋষভৰ৷ ভয়াৱহ পথ দুৰ্ঘটনাত পতিত হৈছে ভাৰতীয় তাৰকা ক্ৰিকেটাৰ ঋষভ৷ দিল্লী-ডেৰাডুন হাইৱেত ৰুৰকিৰ ওচৰত নাৰচন বৰ্ডাৰত দুৰ্ঘটনাত পতিত হৈছে পণ্টৰ বাহন৷ ডিভাইডাৰত খুন্দা লগাৰ ফলতেই এই দুৰ্ঘটনা৷ দুৰ্ঘটনাত গুৰুতৰভাৱে আঘাতপ্ৰাপ্ত হৈছে ঋষভ৷

ৰুৰকিৰ এখন হাস্পতালত প্ৰথমে ভৰ্তী কৰোৱা হৈছিল ঋষভক৷ তাৰ পাছতেই ততাতৈয়াকৈ উন্নত চিকিৎসাৰ বাবে দিল্লীলৈ লৈ যোৱা হয় ঋষভক৷ ইপিনে বাহনখন দুৰ্ঘটনাত পতিত হোৱাৰ পাছতেই দাউদাউকৈ জ্বলি উঠে৷ স্থানীয় লোকৰ তৎপৰতাতেই লগে লগেই চিকিৎসালয়ত ভৰ্তী হয় ঋষভ৷

বাংলাদেশৰ খেল শেষ কৰি ডুবাইত মহেন্দ্ৰ সিং ধোনীৰ সৈতে খ্ৰীষ্টমাছ পাৰ্টী কৰি দিল্লীলৈ ওভতিছিল পণ্ট৷ তাৰ পাছতেই নতুন বছৰৰ প্ৰথম দিনটো পৰিয়ালৰ সৈতে কটাবলৈ ডেৰাডুনস্থিত নিজা বাসগৃহলৈ যাত্ৰা কৰিছিল পণ্ট৷ মাতৃক চাৰপ্ৰাইজ দিয়াৰ লগতে পৰিয়ালৰ সৈতে ফুৰিবলৈ যোৱাৰ পৰিকল্পনাও আছিল ঋষভৰ৷

দুৰ্ঘটনাৰ খবৰ ভাইৰেল হৈ পৰাৰ পাছতেই ক্ৰিকেটজগতত সৃষ্টি হৈছে চাঞ্চল্যৰ৷ উইকেটকীপাৰ-বেটাৰ ঋষভৰ দ্ৰুত আৰোগ্য কামনাৰে সামাজিক মাধ্যমত সকলোৱে পষ্ট কৰা পৰিলক্ষিত হৈছে৷ অৱশ্যে শেহতীয়াকৈ চিকিৎসকে প্ৰকাশ কৰা প্ৰতিবেদনত উল্লেখ থকা অনুযায়ী ঋষভৰ স্বাস্থ্য বৰ্তমান সুস্থিৰ৷ আঘাত গুৰুতৰ যদিও চিকিৎসকে তেওঁৰ মানসিক দৃঢ়তাই অচিৰেই তেওঁক সুস্থ কৰি তুলিব বুলি প্ৰকাশ কৰিছে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ