অসম লাইভ২৪ঃ কেনে হয় মৃত্যুৰ সিপাৰৰ জগত? নাজানে কোনোৱে, জীৱনকালত নেদেখেও কোনোৱে৷ কিন্তু মৃত্যুৰ সিপাৰৰ কথাবোৰ কল্পনাত ভাঁহে৷ আপোনাৰ-মোৰ সকলোৰে৷ একেই স্বপ্ন দেখিছিল ফুটবল সম্ৰাট পেলেও৷ ২০২০ চনৰ ২৫ নৱেম্বৰত পৃথিৱীক বিদায় জনাইছিল ফুটবলৰ ৰাজকুমাৰ মাৰাডোনাই৷ মাৰাডোনাৰ মৃত্যুত ভাঙি পৰিছিল ফুটবল সম্ৰাটগৰাকীও৷
ফুটবলৰ ৰাজকুমাৰ মাৰাডোনাৰ মৃত্যুৰ দিনা পেলেই কৰিছিল এটা বিশেষ টুইট। এই টুইটোত মাৰাডোনাই পেলেৰ কপালত চুমা দি থকা এখন ফটোও আছিল। ফটোখন শ্বেয়াৰ কৰি পেলেই লিখিছিল, ‘স্বৰ্গত আমি আকৌ ল’গ হম৷ একেলগে ফুটবল খেলিম।’ পেলেৰ সেই ইচ্ছাই যেন ২০২২ ৰ ৩০ ডিচেম্বৰৰ দিনা সচাঁ হ’ল। মাৰাডোনাৰ সৈতে ফুটবল খেলিবলৈ স্বৰ্গমুখী হ’ল পেলেও৷
উল্লেখ্য যে, কৰ্কটৰ সৈতে যুঁজি অৱশেষত ৮২ বছৰ বয়সত শেষ নিশ্বাস ত্যাগ কৰিলে মহান ফুটবলাৰগৰাকীয়ে। পেলেৰ মৃত্যুৰ পাছতে বহু চৰ্চা ইতিমধ্যে আৰম্ভ হৈছে। ইয়াৰ ভিতৰতে বিশেষভাৱে চৰ্চিত হৈছে পেলেৰ এই পুৰণি টুইটতো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
