কান্ধৰ আঘাতেৰেই IPLৰ শেষৰকেইখনমান মেচৰ বাবে খেলপথাৰত নমা ৰাজস্থান ৰয়েলছৰ কেপ্টেইন ৰিয়ান পৰাগৰ অস্ত্ৰোপচাৰ সফলভাৱে সম্পন্ন হয় যায়। ছচিয়েল মিডিয়া হেণ্ডেলত এই কথা প্ৰকাশ কৰে ৰিয়ান পৰাগৰ মাতৃ আৰু ক্ৰিকেটাৰজনৰ মেনেজাৰে। দীৰ্ঘদিনৰ পৰা কান্ধৰ আঘাতৰ সমস্যাৰে যুঁজি আছিল ৰিয়ান পৰাগ। প্ৰথমবাৰৰ বাবে টীম ইণ্ডিয়াত জিম্বাবুৱেৰ বিৰুদ্ধে অভিষেক ঘটোৱাৰ পিছৰে পৰা কান্ধৰ আঘাতে জুৰুলা কৰিছিল অসম সন্তান ৰিয়ান পৰাগক। শ্ৰীলংকাৰ বিৰুদ্ধে T20 আৰু ODI শৃংখলাত খেলাৰ পিছতে আঘাতৰ বাবে জাতীয় দলৰ পৰা বাদ পৰিছিল ৰিয়ান। বিগত IPLৰ পূৰ্বে আঘাতৰ সমস্যাৰ পৰা কিছু সকাহ পালেও টুৰ্নামেণ্টখনৰ শেষৰকেইখন মেচৰ সময়ত পুনৰ ৰিয়ানৰ সেই পুৰণি আঘাতটোৱে উক দিছিল। শ্ৰীলংকাত চলি থকা ইণ্ডিয়া Aৰ ৫০ অভাৰৰ শৃংখলাটোত সহঃ অধিনায়কৰ দায়িত্ব পায়ো আঘাতৰ বাবে বাদ পৰিছিল ৰাজস্থান ৰয়েলছৰ কেপ্টেইনজন। শেষ মুহূৰ্তত ৰিয়ানৰ ঠাইত CSKৰ অধিনায়ক ঋতুৰাজ গাইকোৱাদে ইণ্ডিয়া Aৰ দলটোত স্থান লাভ কৰিবলৈ সক্ষম হৈছিল।
ক’ত সম্পন্ন হ’ল ৰিয়ান পৰাগৰ অস্ত্ৰোপচাৰ?
আঘাতৰ উপশম পাবলৈ ৰিয়ানে IPL শেষ হোৱাৰ পিছতে অস্ত্ৰোপচাৰৰ সিদ্ধান্ত লয়। মুম্বাইৰ কোকিলাবেন ধীৰুভাই আম্বানি হাস্পতালত সম্পন্ন হয় ৰিয়ান পৰাগৰ কান্ধৰ অস্ত্ৰোপচাৰ। হাস্পতালখনৰ ডাঃ দিনশ্ব’ পাৰ্ডিৱালাৰ তত্বাৱধানত সম্পন্ন হোৱা অস্ত্ৰোপচাৰৰ পিছতে ক্ৰিকেটাৰজনে অনুৰাগীসকলৰ ধন্যবাদ জনাই কয়- শেষত এই যুঁজত কান্ধখনেই জিকিল। যিসকলে মোৰ খবৰ লৈ আছে তেওঁলোকক অশেষ ধন্যবাদ জনাইছো। কান্ধৰ এই আঘাতে বিগতে দুটা বছৰত মোক বহু কঠিন পৰীক্ষাৰ সন্মুখীন কৰাইছিল। ইয়াৰ মাজতে বহু ভাল দিন আহিছিল, বহুসময় হতাশাৰেও ভৰি পৰিছিল মন। কেতিয়াবা এখন মেচ সম্পূৰ্ণ কৰাটোও মোৰ বাবে এক তীব্ৰ প্ৰত্যাহ্বান হৈ পৰিছিল।
কেতিয়ালৈ খেলপথাৰত নামিব ৰিয়ান পৰাগ?
আজি সম্পন্ন হৈ যোৱা অস্ত্ৰোপচাৰৰ পিছত আৰু কিছুদিন চিকিৎসাধীন হৈ থাকিব লাগিব ক্ৰিকেটাৰগৰাকী। অস্ত্ৰোপচাৰৰ পিছত সম্পূৰ্ণৰূপে সুস্থ হোৱাৰ পিছত আৰম্ভ হ’ব rehab প্ৰক্ৰিয়া। rehab প্ৰক্ৰিয়া সম্পূৰ্ণ হোৱাৰ পিছতে কিছুদিন অনুশীলন কৰাৰ পিছতহে খেলপথাৰত নামিব পাৰিব ৰিয়ান পৰাগ। ইয়াৰ বাবে BCCI পৰা লাভ কৰিব লাগিব সেউজ সংকেত।
এই লেখাটো যুগুটাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
