প্ৰেম সপ্তাহৰ আৰম্ভণি হয় গোলাপেৰে৷ শুকুৰবাৰ অৰ্থাৎ ৭ ফেব্ৰুৱাৰীৰ পৰা আৰম্ভ হৈছে ভেলেণ্টাইন উইক৷ আজি ৰজ’ ডে৷ কিন্তু জানেনে গোলাপ যেনেকৈ ভিন্নৰঙী তেনেকৈ ভিন্নৰঙী গোলাপৰ আছে ভিন্ন অৰ্থ৷ কোন ৰঙৰ গোলাপৰ মাজত লুকাই থাকে কোনটো ৰঙীন বাৰ্তা?
নানান ৰঙৰ গোলাপে দিয়ে নানান বাৰ্তা৷ ৰঙা গোলাপ যদি হয় প্ৰেম ভালপোৱা আদৰৰ প্ৰকাশ তেন্তে অন্য ৰঙৰ গোলাপৰ মাধ্যমেৰে আপুনি কি কি বাৰ্তা আপোনজনলৈ এৰিব পাৰে? জানি থওক কোন ৰঙৰ গোলাপে দিয়ে কি বাৰ্তা?
গোলপীয়া গোলাপ
ৰঙা গোলাপ প্ৰেমৰ প্ৰতীক৷ তেনেদৰে গুলপীয়া গোলাপে ভালপোৱা, কৃতজ্ঞতা, স্বীকৃতি বুজায়৷ কেৱল প্ৰেমিক বা প্ৰেমিকাই নহয়, গোলপীয়া গোলাপ আপুনি বন্ধু বা অন্য কোনো আত্মীয়কো দিব পাৰে৷ যাক আপুনি ধন্যবাদ জনাব খোজে তেওঁকো এই গোলাপ দিব পাৰে৷ কৃতজ্ঞতা জনাবলৈকে এই গোলাপ দিয়া হয়৷
বগা গোলাপ
সাধাৰণতে দেখা যায় যে শোকজ্ঞাপনৰ ক্ষেত্ৰত বগা গোলাপ ব্যৱহাৰ কৰা হয়৷ কিন্তু বগা কেৱল শোকৰ বাবেই নহয়৷ বগা সকলো সময়তেই শান্তিৰ প্ৰতীক৷ যদি কাৰোবাৰ সৈতে কাজিয়া হৈ থাকে তেন্তে বগা গোলাপেৰে আপুনি সম্পৰ্কৰ হাতখন আগুৱাই দিব পাৰে৷ ইয়াৰোপৰি কাৰোবাক খুব মিছ কৰিলেও তেওঁলৈ বগা গোলাপ পঠিয়াব পাৰে৷
কমলা ৰঙৰ গোলাপ
ভালপোৱাৰ ধৈৰ্য্য খুবেই প্ৰয়োজন৷ প্ৰেম বুজাবলৈ ৰঙা গোলাপ ব্যৱহাৰ কৰা হয়৷ গভীৰতা বুজোৱাৰ বাবে কমলা ৰঙৰ গোলাপ দিব পাৰে৷ কাৰোবাক অনুপ্ৰাণিত কৰিবলৈকো এই গোলাপ আপুনি দিব পাৰে৷
হালধীয়া গোলাপ
যি কোনো সম্পৰ্কতেই বন্ধুত্ব অপৰিহাৰ্য৷ হালধীয়া গোলাপ বন্ধুত্বৰ প্ৰতীক৷ সুস্বাস্থ্যৰ শুভেচ্ছা জনাবলৈকো হালধীয়া গোলাপ ব্যৱহাৰ কৰিব পাৰে৷ আপোনাৰ বন্ধুৱে যদি কোনো নতুন কাম আৰম্ভ কৰিব খোজে তেন্তে তেওঁক শুভেচ্ছা জনাবলৈকে এই গোলাপ দিব পাৰে৷
বেঙুনীয়া গোলাপ
নানান গোলাপৰ মাজত আকৰ্ষণীয় গোলাপ হৈছে বেঙুনীয়া গোলাপ৷ সাধাৰণতে এই গোলাপ ৰয়েল সন্মান বুজাবলৈ ব্যৱহাৰ কৰা হয়৷ আপোনাৰ সংগীক সন্মান জ্ঞাপনৰ বাবে এই গোলাপ দিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
