২০০০ চনত তেওঁ উত্তৰ কোৰিয়ালৈ গৈছিল৷ সেই সময়তো তেওঁ ৰাছিয়াৰ প্ৰেছিডেণ্টেই আছিল৷ তাৰপিছত এদিন দুদিনকৈ বছৰ বাগৰি ২৪ বছৰ হ’ল৷ এই ২৪ বছৰ প্ৰশান্ত মহাসাগৰৰ বুকুৱেদি বহু পানী বাগৰিল৷ বিশ্বৰ বিভিন্ন দেশৰ সম্পৰ্কৰ ৰাসায়নো সলনি হ’ল৷ কেইবাখনো দেশৰ মাজত যুদ্ধও হ’ল৷ অৱশেষত ২৪ বছৰৰ পাছত আকৌ হঠাৎ উত্তৰ কোৰিয়াত উপস্থিত হৈছে ভ্লা়ডিমিৰ পুটিন৷
বৰ্তমান কিম জং উনৰ দেশত আছে পুটিন৷ উত্তৰ কোৰিয়ালৈ পুটিনক স্বাগত জনাইছে খোদ কিমেই৷ বিমানবন্দৰত উপস্থিত হৈ পুৰণি বন্ধুক সাবটি আনিছে কিমে৷ কিন্তু হঠাৎ কিয় কিমৰ দেশত ভৰি থৈছে ৰাছিয়াৰ প্ৰেছিডেণ্টে? নেপথ্যত কোনো বৃহৎ অংক আছে নেকি? এই যাত্ৰাক লৈ চিন্তিত এতিয়া ৱাছিংটনো৷
বুধবাৰে পুৱা ছুনন আন্তৰ্জাতিক বিমানবন্দৰত উপস্থিত হৈছে পুটিন৷ বিমানবন্দৰৰ পৰা তেওঁক স্বাগত জনাবলৈ উপস্থিত আছিল উত্তৰ কোৰিয়াৰ একনায়কত্ববাদী শাসক কিম জং উন৷ উত্তৰ কোৰিয়াত উপস্থিত হোৱা পুটিনত আলিংগন কৰি দেশলৈ আদৰে কিমে৷ ৰাছিয়ান ষ্টেট নিউজ এজেন্সিয়ে দুই ৰাষ্ট্ৰনেতাৰ ভিডিঅ’ প্ৰকাশ কৰিছে৷ স্থানীয় সময় হিচাপে দুপৰীয়া ২ বজাত দুই ৰাষ্ট্ৰনেতা বৈঠকতো মিলিত হৈছে৷ কিন্তু কি বিষয়ক লৈ আলোচনা চলিছে সেয়াহে বৰ্তমানলৈকে জানিব পৰা হোৱা নাই৷
উল্লেখ্য যে বিগত ২ বছৰতকৈ বেছি সময় ধৰি ইউক্ৰেইনৰ সৈতে যুদ্ধ চলি আছে ৰাছিয়াৰ৷ এই অৱস্থাত পুটিনৰ উত্তৰ কোৰিয়া যাত্ৰাত দুই দেশৰ মাজত অস্ত্ৰ লৈ চুক্তি হ’ব পাৰে বুলিও আশংকা কৰিছে আমেৰিকা আৰু আমেৰিকাৰ বন্ধু দেশসমূহে৷ যদিও ৰাছিয়াই জনাইছে যে কোৰিয়াৰ সৈতে তেওঁলোকৰ অংশীদাৰিত্বক লৈহে নতুন চুক্তি স্বাক্ষৰিত হ’ব৷ ১৯৬১ চনৰ পুৰণি চুক্তি সলনি কৰা হ’ব৷ সেই চুক্তিত স্বাক্ষৰ কৰিবৰ বাবেই পুটিনে কোৰিয়ালৈ যাত্ৰা কৰিছে৷ এই চুক্তিত তেওঁলোকে ৰখা প্ৰধান চুক্তি হৈছে কোনো দেশে অসুবিধাত পৰিলে এখন দেশে আনখন দেশৰ কাষত বন্ধু হৈ থিয় দিব৷
পুটিনৰ এই যাত্ৰাক লৈ মঙলবাৰে আমেৰিকাৰ বৈদেশিক সচিব এণ্টনি ব্লিনকেনে কৈছিল, ‘ইউক্ৰেইনৰ সৈতে যুদ্ধ চলি আছে৷ তেওঁলোকক সেয়ে অস্ত্ৰৰ প্ৰয়োজন হৈছে৷ অস্ত্ৰৰ প্ৰয়োজন পুৰণ কৰিব পৰা দেশৰ কাষত সেয়ে ৰাছিয়াই যাবলৈ আৰম্ভ কৰিছে৷ পুটিনৰ দেশক উত্তৰ কোৰিয়াই অস্ত্ৰও যোগান ধৰিব পাৰে৷’
ব্লিনকিনৰ এই মন্তব্যক সমৰ্থন কৰি NATOৰ মহাসচিব জেন্স ষ্টলটেনবাৰ্গে কয়, ‘এইবাৰ হয়তো উত্তৰ কোৰিয়াৰ বিভিন্ন মিছাইল পৰীক্ষা আৰু পাৰমাণবিক পৰীক্ষাক সমৰ্থন জনাব ৰাছিয়াই৷’ বিগত বছৰৰ ছেপ্টেম্বৰত ৰাছিয়া গৈছিল কিম৷ এইবাৰ পুটিন আহিছে উত্তৰ কোৰিয়ালৈ৷ ইয়াৰ পূৰ্বে ২০০০ চনত পিয়ংইয়ং আহিছিল পুটিন৷ সেইসময়ত উত্তৰ কোৰিয়াৰ শাসক আছিল কিমৰ প্ৰয়াত পিতৃ কিম জং ইল৷ পুটিনৰ এই যাত্ৰাৰ পূৰ্বে ৰাছিয়াৰ কোনো এজন প্ৰেছিডেণ্টেই উত্তৰ কোৰিয়ালৈ যোৱা নাছিল৷ পিতৃৰ পাছত এইবাৰ পুত্ৰ কিমে ৰাছিয়াৰ সৈতে সম্পৰ্ক দৃঢ় কৰিছে৷ আজিৰ দিনটো উত্তৰ কোৰিয়াত কটাই ভিয়েটনামলৈ উৰা মাৰিব পুটিন৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
