অসম লাইভ২৪ঃ হৰাৰ কথা কোনেনো ভাৱিছিল? বিশ্বজয়ৰ মাত্ৰ কেইগজমান দূৰত্বত আহি থমকি ৰ’ল টীম ইণ্ডিয়া। বিশ্বজয়ৰ কেইগজমান দূৰত্বত আধৰুৱা হৈ ৰ’ল ৰোহিত শৰ্মা, বিৰাট কোহলীকে ধৰি ১৪০ কোটি ভাৰতীয়ৰ সপোন। আহমেদাবাদত মেচ হাৰি নৰেন্দ্ৰ মোদী ষ্টেডিয়ামত কান্দোনত ভাঙি পৰিছিল ভাৰতীয় দলৰ প্ৰায়কেইজন খেলুৱৈ। টীম ব্লুৰ যন্ত্ৰণাকাতৰ এই সময়ত যন্ত্ৰণা ভগাই লৈ বিশেষ পোষ্ট শ্বেয়াৰ কৰিছে ক্ৰিকেটৰ ঈশ্বৰ শচীন তেণ্ডুলকাৰেও। সোমবাৰে বিয়লি এক্স হেণ্ডেলত এটা বিশেষ পোষ্ট দিছে মাষ্টাৰ ব্লাষ্টাৰে।
তেওঁ লিখিছে, ‘ক্ৰিকেটাৰ আৰু তেওঁলোকৰ শুভাকাংশীসকলৰ যন্ত্ৰণাক মই অনুভৱ কৰিব পাৰিছো। তেওঁলোকৰ মনত যি ধুমুহা চলিছে সেই কথা ভাৱিয়েই দুখ লাগিছে।’ ইয়াৰোপৰি বিশ্ব চেম্পিয়ন অষ্ট্ৰেলিয়াৰ দলটোক শুভেচ্ছা জনাইছে শচীন তেণ্ডুলকাৰে। শচীনে অষ্ট্ৰেলিয়াৰ দলটোক শুভেচ্ছা জনাই লিখিছে, ‘ষষ্ঠবাৰৰ বাবে ট্ৰফী জয় কৰা কেংগাৰু ব্ৰিগেডক অভিনন্দন। সকলোতকৈ গুৰুত্বপূৰ্ণ দিনটোত তেওঁলোকে ভাল খেলিছে।’
https://x.com/sachin_rt/status/1726451622413517308?s=20
উল্লেখ্য যে, ফাইনেলত হাৰিলেও বিশ্বকাপত অবিশ্বাস্য খেল দেখুওৱাইছে ৰোহিত ব্ৰিগেডে। ফাইনেলত উঠা কাহানিও সহজ কথা হ’ব নোৱাৰে। লেথাৰিকৈ ১০খন মেচ খেলি ১০খনতেই জয়লাভ কৰি ফাইনেলত প্ৰৱেশ কৰিছে ভাৰতীয় দলে। সামাজিক মাধ্যমত ভাৰতীয় দলৰ এই সফলতাক ভূয়সী প্ৰশংসা কৰিছে ক্ৰিকেটৰ ঈশ্বৰ শচীনে। তেওঁ লিখিছে, ‘টিম ইণ্ডিয়াক অলেখ শুভকামনা। কেৱল এদিনৰ বাবে তোমালোক ভাঙি নপৰিবা। এদিনৰ পৰাজয়ৰ কথা বাদ দিয়া। আটাইকেইখন টুৰ্নামেণ্টত অবিশ্বাস্য পাৰ্ফৰমেন্স তোমালোকে দেখুৱাইছা। পৰাজয় খেলৰেই এক অংশ। ২০২৩ৰ বিশ্বকাপত তোমালোকে যি পাৰ্ফৰমেন্স দেখুৱাইছা সেয়া বিশ্বৰ ক্ৰিকেটপ্ৰেমীয়ে মনত ৰাখিব।’
বিশ্বকাপৰ ফাইনেল উপভোগ কৰিবলৈ দেওবাৰে পুৱাই আহমেদাবাদত উপস্থিত হৈছিল মাষ্টাৰ ব্লাষ্টাৰ। খেল আৰম্ভ হোৱাৰ পূৰ্বে ৰোহিতবাহিনীক শুভেচ্ছা জনোৱাৰ ছবিও সামাজিক মাধ্যমত ভাইৰেল হৈছিল। কেৱল সেয়াই নগয় বিৰাট কোহলিক তেওঁ ছহী কৰা এটা জাৰ্ছীও উপহাৰ হিচাপে দিছিল। ফাইনেল খেলত টছত জয়লাভ কৰি ভাৰতক প্রথম বেট ধৰিবলৈ আহ্বান জনায় অষ্ট্ৰেলিয়া দলৰ অধিনায়ক পেট কামিন্সে। ফাইনেলত অৰ্ধ শতৰান কৰে বিৰাট আৰু কে এল ৰাহুলে। তেওঁলোকৰ বেটৰ পৰাই আহিছিল ৫৮-৬৬ৰান। মেচত ৪৭ ৰানৰ ইনিংছ খেলে ৰোহিত শৰ্মাইয়ো। কিন্তু এইকেইগৰাকীক বাদ দি ভাৰতীয় বেটাৰ কোনোৱেই ফাইনেলত ভাল ফল দেখুওৱাব নোৱাৰিলে। পিছলৈ বেট ধৰি অষ্ট্ৰেলিয়াই ৪৩ অভাৰত ২৪১ ৰান লৈ জয়ৰ খিতাপ নিজৰ হাতলৈ আনে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
