NEET প্ৰশ্নকাকত ফাদিল কেলেংকাৰীৰ বিৰুদ্ধে দেশজুৰি ছাত্ৰ-ছাত্ৰী আৰু সাধাৰণ জনতাৰ মাজত ক্ষোভ ক্ৰমাগতভাৱে বৃদ্ধি পোৱা দেখা গৈছে। ককৰোচ জনতা পাৰ্টিৰ নেতৃত্বত ২০ জুলাইত দিল্লীৰ যন্তৰ মন্তৰৰ পৰা সংসদ অভিমুখে এক প্ৰতিবাদী সমদল উলিওৱা হয়। এই সময়ছোৱাত আৰক্ষীয়ে প্ৰতিবাদকাৰী ছাত্ৰ-ছাত্ৰীৰ ওপৰত লাঠিচাৰ্জ কৰাৰ লগতে কন্দুৱা গেছো নিক্ষেপ কৰাৰ অভিযোগ উত্থাপিত হৈছে। এই ঘটনাৰ পাছতে বহু চলচ্চিত্ৰ তাৰকায়ো ছাত্ৰ-ছাত্ৰীৰ সমৰ্থনত মাত মতা দেখা গৈছে।
ছলমান খানৰ আন্দোলন সন্দৰ্ভত প্ৰতিক্ৰিয়া
সমগ্ৰ দেশৰ লগতে মুম্বাইতো এই বিষয়ত প্ৰতিবাদ অনুষ্ঠিত হয়, য’ত কেইবাগৰাকীও চলচ্চিত্ৰ অভিনেতা-অভিনেত্ৰী, কলা-কুশলী উপস্থিত আছিল। এই আন্দোলন সন্দৰ্ভত শেহতীয়াভাৱে বলিউডৰ ‘ভাইজান’ ছলমান খানেও নিজৰ মত প্ৰকাশ কৰিছে। সামাজিক মাধ্যম ‘X’ত এটা দীঘল পোষ্টৰ জৰিয়তে এই আন্দোলনৰ ঘটনাক অতি গুৰুত্বপূৰ্ণ বিষয় বুলি অভিহিত কৰে আৰু ছাত্ৰ-ছাত্ৰীৰ আন্দোলনৰ শলাগ লয়। লগতে এই বিষয়টো ছাত্ৰ-ছাত্ৰী আৰু শিক্ষা ব্যৱস্থাৰ সৈতে জড়িত, সেয়েহে ইয়াৰ ৰাজনৈতিকৰণ কৰা উচিত নহয় বুলিও মন্তব্য কৰে।
প্ৰতিবাদৰ সময়ত হোৱা উত্তেজনাক লৈ কি মন্তব্য ছলমানৰ?
দিল্লীৰ প্ৰতিবাদৰ সময়ত সৃষ্টি হোৱা উত্তেজনা আৰু হিংসাত্মক পৰিস্থিতিক লৈ উদ্বেগ প্ৰকাশ কৰি ছলমান খানে Xত উল্লেখ কৰে এইদৰে- “এইটো এটা সম্পূৰ্ণ শান্তিপূৰ্ণ আন্দোলন আছিল। ইয়াৰ হিংসাত্মক ৰূপ লোৱাটো দেখি মই গভীৰভাৱে দুখিত। এই ঘটনাত আঘাতপ্ৰাপ্ত ছাত্ৰ-ছাত্ৰী আৰু তেওঁলোকৰ পৰিয়ালৰ প্ৰতি মোৰ সমবেদনা থাকিল।” প্ৰশ্নকাকত ফাদিলৰ বিষয়ত কঠোৰ স্থিতি গ্ৰহণ কৰি তেওঁ আৰু কয়, “প্ৰশ্নকাকত ফাদিলৰ ঘটনাটো এটা অত্যন্ত গুৰুতৰ সমস্যা। আমাৰ দেশৰ ছাত্ৰ-ছাত্ৰীয়ে এটা উন্নত শিক্ষা ব্যৱস্থাৰ দাবীত একত্ৰিত হোৱাটো আৰু তেওঁলোকৰ অভিভাৱকসকলে পূৰ্ণ সমৰ্থন জনোৱাটো দেখি মই আনন্দিত।”
‘ছাত্ৰ আন্দোলন ৰাজনীতিকৰণ অপহৰণ হ’ব নালাগে’
ছাত্ৰ-ছাত্ৰীৰ সাহস আৰু দায়বদ্ধতাৰ প্ৰশংসা কৰি ছলমান খানে কয় যে-এই আন্দোলন সঠিক দিশত আগবাঢ়িছে আৰু দেশৰ নতুন প্ৰজন্মই ভৱিষ্যতে ভাৰতৰ নাম উজ্জ্বল কৰিব। লগতে তেওঁ এই বিষয়ত ৰাজনীতি নকৰিবলৈ আহ্বান জনায়। তেওঁৰ ভাষাত, “এইটো ছাত্ৰ-ছাত্ৰী আৰু শিক্ষা ব্যৱস্থাৰ মাজৰ বিষয়। ইয়াৰ ৰাজনৈতিক অপহৰণ হ’ব নালাগে। ইয়াৰ সম্পূৰ্ণ কৃতিত্ব আমাৰ দেশৰ ছাত্ৰ-ছাত্ৰীৰ প্ৰাপ্য। মোৰ পূৰ্ণ বিশ্বাস আছে যে চৰকাৰেও তেওঁলোকক সম্পূৰ্ণ সমৰ্থন আগবঢ়াব আৰু এক শক্তিশালী শিক্ষা ব্যৱস্থা গঢ়ি তুলিব। এইটো সকলোৰে বাবে লাভজনক পৰিস্থিতি।”
‘শিক্ষাক নতুন ট্ৰেণ্ড আৰু ফেশ্যন হিচাপে গঢ়ি তোলা উচিত’
পোষ্টৰ শেষত দেশৰ যুৱ প্ৰজন্মৰ বাবে এক ইতিবাচক দৃষ্টিভংগী আগবঢ়াই ছলমান খানে লিখে, “শিক্ষাই আগন্তুক সময়ৰ নতুন ট্ৰেণ্ড আৰু ফেশ্যন হ’ব লাগে। ভাৰতীয় শিক্ষা ব্যৱস্থা ইমানেই জনপ্ৰিয় হ’ব লাগে যে বিদেশৰ লোকেও ভাৰতলৈ শিক্ষা গ্ৰহণ কৰিবলৈ আহিব আৰু আমাৰ দেশ এখন বৃহৎ শিক্ষা কেন্দ্ৰ হিচাপে পৰিগণিত হ’ব। যিসকলে শিক্ষা লাভ কৰিব বিচাৰে, ঈশ্বৰে তেওঁলোক সকলোৰে মংগল কৰক।”
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
