উত্তৰপ্ৰদেশৰ ঝাঞ্চি মেডিকেল কলেজত ভয়াৱহ অগ্নিকাণ্ড৷ অগ্নিকাণ্ডৰ ফলত অন্তত ১০জন শিশুৰ মৃত্যু হৈছে বুলি জনা গৈছে৷ প্ৰাথমিক অনুমান যে শ্বৰ্ট ছাৰ্কিটৰ ফলতেই অগ্নিকাণ্ডৰ সুত্ৰপাত৷ বৰ্তমানলৈকে ৪৪গৰাকী সদ্যোজাতক উদ্ধাৰ কৰা হৈছে বুলি জনা গৈছে৷
শুকুৰবাৰে নিশা এই ঘটনা সংঘটিত হৈছে মহাৰাণী লক্ষ্মীবাঈ মেডিকেল কলেজত৷ দুৰ্ঘটনাত গভীৰ শোকপ্ৰকাশ কৰিছে উত্তৰপ্ৰদেশৰ মুখ্যমন্ত্ৰী যোগী আদিত্যনাথে৷ প্ৰত্যক্ষদৰ্শীয়ে জনাইছে যে মেডিকেল কলেজৰ নিউনেটাল ইনছেনটিভ কেয়াৰ ইউনিটত শুকুৰবাৰে নিশা এই জুই লাগে৷ ধোঁৱাই আৱৰি ধৰে চৌপাশ৷ লগে লগেই আৰম্ভ হয় দৌৰাদৌৰি৷ অগ্নিনিৰ্বাপক বাহিনী অহাৰ পূৰ্বে চিকিৎসক আৰু স্বাস্থ্যকৰ্মীয়ে ৱাৰ্ডৰ কাঁচ ভাঙি শিশুসকলক উদ্ধাৰ কৰিবলৈ আৰম্ভ কৰে৷ কিছুসময়ৰ পাছতেই সেই স্থানত অগ্নিনিৰ্বাপক বাহিনী উপস্থিত হয়৷ ঝাঞ্চিৰ জিলাপ্ৰশাসক অবিনাশ কুমাৰে কয়, ‘নিশা ১০ বাজি ৩৫ মিনিটত এই জুই লাগিছে৷ শিশুসকলৰ দুটা ইউনিটৰ মাজত এটাত জুই লাগে৷ সম্ভৱত শ্বৰ্ট চাৰ্কিটৰ ফলতেই জুই লাগিছে৷ ৪৪টা শিশুক নিৰাপদে বাহিৰ কৰি অনা হৈছে৷’ উদ্ধাৰ কৰা ৪৪ টা শিশুৰ মাজত ১৬জনৰ অৱস্থা অতি সংকটজনক৷ আটাইকেইটা শিশুৱে এতিয়া অন্য হাস্পতালত চিকিৎসাধীন হৈ আছে৷
হাস্পতালতেই কান্দোনত ভাঙি পৰিছে মৃতকৰ পৰিয়াল৷ দুৰ্ঘটনাত মৃত শিশুৰ পৰিয়ালক সমবেদনা জনাইছে উত্তৰপ্ৰদেশৰ মুখ্যমন্ত্ৰী যোগী আদিত্যনাতে৷ এক্স হেণ্ডেলত তেওঁ লিখিছে, ‘ঝাঞ্চিৰ মেডিকেল কলেজত হোৱা দুৰ্ঘটনাত মৃত্যু হোৱা শিশুসকলৰ মৃত্যুৰ ঘটনা মৰ্মান্তিক আৰু হৃদয়বিদাৰক৷ আহত শিশুসকলৰ দ্ৰুত আৰোগ্য কামনা কৰিছো৷’ ইতিমধ্যেই চৰকাৰৰ তৰফৰ পৰা মৃত শিশুৰ পৰিয়াললৈ ৫লাখৰ ক্ষতিপূৰণ ঘোষণা কৰিছে যোগী চৰকাৰে৷ আহতসকলকো ৫০ হাজাৰকৈ দিয়া হ’ব৷
এই অগ্নিকাণ্ডৰ ঘটনা চকুৰ সন্মুখতে দেখা কেইবাগৰাকীও ব্যক্তিয়ে সংবাদমাধ্যমৰ আগত মুখ খুলিছে৷ নিজ সন্তানক চকুৰ সন্মুখতে শেষ হৈ যোৱা দেখিছে পিতৃ-মাতৃয়ে৷ কেনেকৈ আইচিইউৰ গ্লাছ ভাঙি শিশুসকলক উদ্ধাৰ কৰিছে পিতৃ-মাতৃয়ে সেই কথাও প্ৰকাশ কৰিছে সংবাদমাধ্যমৰ সন্মুখত৷
লেলিহান জুইৰ শিখাই আৱৰি ধৰা আইচিউতেই কুলদীপ নামৰ এজন ব্যক্তিয়ে নিজৰ সন্তানক উদ্ধাৰৰ বাবে সোমাই গৈছিল৷ তাতেই তেওঁ এটা দুটাকৈ কেইবাটাও শিশুক জুইৰ বাহিৰলৈ ওলিয়াই আনে৷ অন্য শিশুসকলক উদ্ধাৰ কৰি থাকোতেই নিজৰ সন্তানকেই হেৰুৱাই পেলাই কুলদ্বীপে৷
কুলদ্বীপে এই সন্দৰ্ভত কয়, ‘মোৰ সন্তানক মই ৰক্ষা কৰিব নোৱাৰিলো৷ মোৰ পত্নী আৰু মা বিধ্বস্ত হৈ পৰিছে৷ মই ক্ৰন্দনৰত শিশুসকলক দেখি ৰৈ থাকিব নোৱাৰি উদ্ধাৰত নামি পৰিছিলো৷ এজন চিকিৎসকে মোক এনেকৈ জুইৰ মাজত সোমাই যোৱা দেখি ওলাই আহক বুলি কৈছিল৷ তেতিয়া মই চিকিৎসকক কৈছিলো আপোনাৰ সন্তান হ’লে এনেকৈ মৰিবলৈ এৰি দিব পাৰিলেহেতেননে?’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
