খাদ্যত মাইক্ৰপ্লাষ্টিক প্ৰদূষণৰ সমস্যাক লৈ উদ্বেগ বাঢ়িছে বিশ্বজুৰি৷ মানুহৰ স্বাস্থ্য সুৰক্ষাৰ পক্ষে এয়া খুবেই বিপজ্জনক৷ ভাৰতৰ খাদ্যপণ্যৰ গুণমান নিয়ন্ত্ৰক সংস্থা বা এফ এছ এছ এ আইয়ে জনাইছে যে, নিমখ, চেনী আৰু কেইবাধৰণৰ মছলাৰ পেকেটত পোৱা গৈছে ক্ষুদ্ৰাতিক্ষুদ্ৰ প্লাষ্টিকৰ কণা বা মাইক্ৰপ্লাষ্টিক৷ আনকি যি প্লাষ্টিকৰ বটলৰ পৰা পানী খাই তাতো মিহলি হৈ থাকে লক্ষ লক্ষ অণু প্লাষ্টিক৷ আপুনি খোৱা টি বেগতো থাকে প্লাষ্টিক বুলি শেহতীয়া গৱেষণাত প্ৰকাশ পাইছে তথ্য৷
অটনমাছ ইউনিভাৰ্ছিটি অফ বাৰ্ছলোনাক লৈ এই গৱেষণা কৰি তেওঁলোকে সমীক্ষাৰ ৰিপৰ্ট জনাইছে৷ কেৱল বাৰ্ছেলোনাৰ এই বিশ্ববিদ্যালয়ে নহয়, বিশ্বৰ আৰু বহু গৱেষণা সংস্থাই এই দাবী কৰিছে যে সকলো নহলেও প্ৰায় কেইবাটাও ব্ৰেণ্ডৰ টি বেগতেই প্লাষ্টিকৰ সূক্ষ্ম সূক্ষ্ম কণা পোৱা যায়৷ কেৱল সেয়াই নহয় আৰু নানান ৰাসায়নিকৰ সন্ধানো পোৱা গৈছে ইয়াত৷ যি মানৱশৰীৰৰ বাবে বিপজ্জনক৷
বিজ্ঞানীয়ে কৈছে কিছু টি বেগ তৈয়াৰ হয় প্লাষ্টিকৰ পৰাই৷ সাধাৰণতে তিনি ধৰণৰ প্লাষ্টিক ব্যৱহাৰ কৰা হয়৷ পলিপ্ৰপেলিন, নাইলন-৬ আৰু ছেলুলজ৷ প্লাষ্টিকৰ টি বেগ যেতিয়া গৰম পানীত ডুবোৱা হয় তেতিয়া তাৰ পৰা সূক্ষ্ম প্লাষ্টিকৰ কণা পানীত মিহলি হৈ যায়৷ দাবী কৰা হৈছে যে পলিপ্ৰপেলিন দি যি টিবেগ তৈয়াৰ কৰা হয় সেই টি বেগ এবাৰ পানীত ডুবালে তাৰপৰা প্ৰায় ১২০ কোটি প্লাষ্টিকৰ কণা বাহিৰলৈ ওলাই পানীত মিহলি হৈ পৰে৷ ছেলুলজৰে তৈয়াৰ কৰা টি বেগৰ পৰা বাহিৰ হৈ আহে প্ৰায় ১৩ কোটি মাইক্ৰপ্লাষ্টিক৷ অৰ্থাৎ প্ৰতিটো চুমুকতেই প্লাষ্টিক শৰীৰত সোমাই যায়৷
বাৰ্ছিলোনা ইউনিভাৰ্ছিটিৰ গৱেষক ৰিকাৰ্ডো মাৰ্কোছ ডাউডৰ কথাত, মাইক্ৰপ্লাষ্টিকৰ সুক্ষ্ম নেনোপ্লাষ্টিকো পোৱা গৈছে কেইবাটাও টি বেগত৷ অৱশ্যে তাত কোনো ব্ৰেণ্ডৰ কথা তেওঁলোকে উল্লেখ কৰা নাই৷ গৱেষকে সতৰ্ক কৰি দিছে যে যদি ঘনে ঘনে চাহ খোৱাৰ অভ্যাস থাকে তেন্তে প্ৰতিবাৰেই টি বেগ ডুবাই চাহ তৈয়াৰ কৰে তেতিয়া সতৰ্ক হওক৷ কাৰণ লাখ লাখ প্লাষ্টিকৰ কণা মিহলি চাহ খালে খুব সোনকালেই সেয়া তেজত মিহলি হৈ পৰে৷ অৱশ্যে ভাৰতত এই বিষয়ক লৈ এতিয়াও কোনো গৱেষণা কৰা নাই ফুড ছেফটি এণ্ড ষ্টেণ্ডাৰ্ডছ অফ ইণ্ডিয়াই৷
মাইক্ৰপ্লাষ্টিক দিনৰ পাছত দিন শৰীৰত সোমাই তেজত মিহলি হৈ থাকিলে বিভিন্ন জটিল ৰোগ হ’ব পাৰে৷ প্লাষ্টিক তেজত মিহলি হ’লে ইনছুলিনৰ ক্ষৰণত প্ৰভাৱ পৰে৷ যিয়ে পৰবৰ্তী সময়ত ডায়বেটিছৰ কাৰণ হৈ উঠিব পাৰে৷ কেৱল সেয়াই নহয়, প্লাষ্টিকে শৰীৰত হৰমণৰ ভাৰসাম্যতো সাল সলনি আনে৷ অধিক মাত্ৰাত প্লাষ্টিক কণা শৰীৰত জমা হ’লে পুৰুষৰ ক্ষেত্ৰত শুক্ৰাণুৰ পৰিমান কমি যায়৷ মহিলাৰ বিভিন্ন হৰমণ ক্ষৰণত বাধা তৈয়াৰ হয়৷ বিশেষকৈ ইষ্ট্ৰজেন হৰমনৰ কাৰ্যকাৰিতা কমি যাব পাৰে৷ তাৰপৰা লিভাৰৰ সমস্যা, হাৰ্টৰ ৰোগ, কিডনিৰ জটিল অসুখ হোৱাৰ আশংকাও থাকে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
