ডিজিটেল ডেস্কঃ মাতৃক ভগৱান বুলি কোৱা হয়। এগৰাকী মাতৃৰ বুকুৰ পৰা সন্তানক স্বয়ং ভগৱানেও কাঢ়ি নিব নোৱাৰে বুলি কোৱা হয়। আৰু প্ৰচলিত সেই কথাষাৰেই যেন প্ৰমাণ হল দেৰগাঁৱৰ সেই ভয়ংকৰ দুৰ্ঘটনাটোত। বনভোজ খাবলৈ মাতৃৰ সৈতে সেই অভিশপ্ত বাছখনত গৈছিল এটি ৩বছৰীয়া শিশুও। পুৱতি নিশা বাছত উঠি মাতৃৰ বুকুত টোপনি গৈছিল কণমাণিজনী। মাতৃৰ সৈতে গভীৰ নিদ্ৰাত থকাৰ সময়তে সংঘটিত হৈছিল সেই ভয়ংকৰ দুৰ্ঘটনাতো।
কিন্তু নিয়তিৰ কি বিধান! ১৫গৰাকীকৈ সহযাত্ৰী মৃত্যু হোৱাৰ লগতে ৩১গৰাকীকৈ লোক গুৰুতৰভাৱে আহত হোৱা বাছখনত এই মাতৃ আৰু কন্যাৰ বিশেষ একো হানি নহল। আচৰিত কথাটো হৈছে যে, মাতৃৰ বুকুত শুই থকা সেই কণমাণিজনীৰ গাত একো আঘাতৰ চিনেই নাই। সেয়েহে হয়তো গ্ৰামাঞ্চলত সকলোৱে কয় যে, মাক মানেই বাঘিনী। মাকৰ বুকুৰ পৰা সন্তানক কোনো শক্তিয়ে কাঢ়ি নিব নোৱাৰে।
উল্লেখ কৰা প্ৰয়োজন যে, দুৰ্ঘটনাটো সংঘটিত হোৱাৰ সময়ত গভীৰ টোপনিত থকা মাতৃগৰাকীয়ে সহযাত্ৰীৰ মৰণকাতৰ চিঞৰ শুনিহে সাৰ পাইছিল। আৰু সাৰ পায়ে দেখিছিল তচ-নচ হৈ যোৱা বাছখন। বৰ্তমান ৭গৰাকী যাত্ৰীৰ অৱস্থা সুস্থিৰ যদিও বাকীসকলৰ অৱস্থা গুৰুতৰ বুলি জানিব পৰা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
