যাত্ৰী ভৰ্তি বাছৰ অতিকে ভয়ংকৰ দুৰ্ঘটনা- ১২ নিহত ৪০ আহত, নিহতৰ সংখ্যা বৃদ্ধিৰ আশংকা
দীপাৱলীৰ পূৰ্বে আজি ধনতেৰাছৰ দিনটোত ৰাজস্থানত সংঘটিত হৈছে এক অতিকে শোকাৱহ পথ দুৰ্ঘটনা। যি দুৰ্ঘটনাত ঘটনাস্থলীতে প্ৰাণ হেৰুৱাই ১২ গৰাকী লোকে। আনহাতে ৪০ গৰাকী লোক আহত। মৃতকৰ সংখ্যা বৃদ্ধিৰ আশংকা
ৰাজস্থানৰ পৰা আহিছে এক দুৰ্ঘটনাৰ ডাঙৰ খবৰ। ৰাজ্যখনৰ ছিকাৰত এখন যাত্ৰী ভৰ্তি বাছে উৰণীয়া সেঁতুৰ দেৱালত প্ৰচণ্ড জোৰে খুন্দা মৰাৰ ফলতে এই দুৰ্ঘটনা হয়।
দুৰ্ঘটনাত এতিয়ালৈকে ১২ জন লোকে প্ৰাণ হেৰুৱাইছে, আনহাতে বহু লোক গুৰুতৰভাৱে আহত হৈছে। তথ্যৰ ভিত্তিত আৰক্ষী উপস্থিত হৈ আহতসকলক চিকিৎসালয়ত ভৰ্তি কৰে। সংকটজনক অৱস্থাত কেইবাজনো লোক। যাৰ বাবে আৰক্ষীয়ে মৃত্যুৰ সংখ্যা বৃদ্ধি পাব পাৰে বুলি আশংকা ব্যক্ত কৰিছে।
এই দুৰ্ঘটনা সংঘটিত হৈছে ছিকাৰৰ লক্ষ্মনগড় চহৰৰ সমীপত। যাত্ৰীৰে ভৰা এখন ব্যক্তিগত বাছ সুজানগৰৰ পৰা নৱালগড়লৈ গৈ আছিল। এই সময়ছোৱাতে দ্ৰুতবেগী বাছখনে নিয়ন্ত্ৰণ হেৰুৱাই উৰণীয়া সেঁতুৰ প্ৰকাণ্ড দেৱালত খুন্দা মাৰে, যাৰ বাবে যাত্ৰীসকলৰ মাজৰ হাঁহি ফুৰ্তি মুহুৰ্ততে কান্দোনলৈ পৰিণত হয়।
দেৱালৰ সৈতে সংঘৰ্ষ ইমানেই ভয়াৱহ যে বাছখনৰ সন্মুখৰ অংশ সম্পূৰ্ণৰূপে ক্ষতিগ্ৰস্ত হয়। দুৰ্ঘটনা সংঘটিত হোৱাৰ পিছত স্থানীয় লোকে ঘটনাস্থলীত উপস্থিত হৈ আৰক্ষীক এই বিষয়ে অৱগত কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
