সাংসদ হ’বলৈ গৈ আছে প্ৰাক্তন প্ৰধানমন্ত্ৰী ইন্দিৰা গান্ধীৰ ঘাতকৰ পুত্ৰ
প্ৰাক্তন তথা দেশৰ প্ৰথম মহিলা প্ৰধানমন্ত্ৰী ইন্দিৰা গান্ধীৰ ঘাতক তথা হত্যাকাৰীৰ পুত্ৰইও দেশত হ’বলগীয়া লোকসভা নিৰ্বাচনত প্ৰতিদ্বন্দ্বিতা কৰাৰ কথা ঘোষণা কৰিছে। পঞ্জাৱৰ পৰা নিৰ্বাচন খেলিব ইন্দিৰা গান্ধীক প্ৰাণে মৰা এজন হত্যাকাৰীৰ পুত্ৰই।
পাঞ্জাৱৰ ফৰিদকোটৰ পৰা লোকসভা নিৰ্বাচনত প্ৰতিদ্বন্দ্বিতা কৰাৰ কথা বৃহস্পতিবাৰে ঘোষণা কৰে হত্যাকাৰী বেঅন্ত সিঙৰ পুত্ৰ সৰবজিৎ সিঙে (৪৫)। সৰবজিৎ সিঙে এই সন্দৰ্ভত কয় যে ফৰিদকোটৰ বহু লোকে তেঁওক নিৰ্বাচনত অৱতীৰ্ণ হোৱাৰ বাবে অনুৰোধ কৰিছিল। সেই অনুৰোধকেই সন্মান জনাই নিৰ্দলীয় প্ৰাৰ্থী হিচাপে নিৰ্বাচনত প্ৰতিদ্বন্দ্বিতা কৰিব।
সৰবজিতৰ পিতৃ বেঅন্ত সিং আছিল প্ৰাক্তন প্ৰধানমন্ত্ৰী ইন্দিৰা গান্ধীৰ নিৰাপত্তাৰক্ষী। অপাৰেচন ব্লু ষ্টাৰৰ পিছত সমগ্ৰ দেশৰ শিখসকলৰ মাজত ইন্দিৰা গান্ধীৰ প্ৰতি ক্ষোভৰ সৃষ্টি হৈছিল।
তেতিয়াৰ প্ৰধানমন্ত্ৰীৰ নিৰাপত্তা উপদেষ্টাসকলে তেওঁক নিৰাপত্তাৰ কামত নিয়োজিত শিখ জোৱানক আঁতৰাই পেলাবলৈ পৰামৰ্শ দিছিল যদিও তেওঁ নাকচ কৰিছিল। ইয়াৰ সুযোগ লৈ ১৯৮৪ চনৰ ৩১ অক্টোবৰত প্ৰধানমন্ত্ৰীৰ বাসগৃহত ইন্দিৰা গান্ধীক গুলীয়াই হত্যা কৰে বেঅন্ত সিং আৰু সতৱন্ত সিঙে।
সেই ঘটনাত প্ৰধানমন্ত্ৰী বাসগৃহত নিয়োজিত বাকী নিৰাপত্তাৰক্ষীয়ে থিতাতে বেঅন্ত সিঙক হত্যা কৰাৰ বিপৰীতে সতৱন্ত সিঙক জীৱিত অৱস্থাত বন্দী কৰা হয়। পিছত তেওঁকো মৃত্যুদণ্ড দিয়া হয়।
ইন্দিৰা গান্ধীৰ হত্যাৰ পিছত শিখসকলে বেঅন্ত সিঙৰ পৰিয়ালক তুলি লৈছিল। ১৯৮৯ চনত বেঅন্ত সিঙৰ পত্নী বিমল কৌৰে ৰোপাৰৰ পৰা নিৰ্বাচনত প্ৰতিদ্বন্দ্বিতা কৰি জয়ী হৈছিল। আনহাতে ভথিণ্ডাৰ পৰা সাংসদ নিৰ্বাচিত হৈছিল বেঅন্তৰ পিতৃ।
শিখসকলৰ মাজত থকা আৱেগৰ সুবিধাৰে সৰাবজিৎ সিঙে ২০০৪ চনতো ভাথিণ্ডা আসনৰ পৰা লোকসভা নিৰ্বাচনত প্ৰতিদ্বন্দ্বিতা কৰিছি ১.১৩ লাখ ভোট লাভ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
