অসম লাইভ২৪ঃ নিৰ্বাচনী প্ৰতিশ্ৰুতি মানি দেওবাৰৰ পৰা কৰ্ণাটকত আৰম্ভ হ’ব মহিলাৰ বাবে বিনামূলীয়া বাছ সেৱা। কৰ্ণাটক কংগ্ৰেছে নিৰ্বাচনী ইস্তাহাৰতেই এই কথা উল্লেখ কৰিছিল। প্ৰতিশ্ৰুতি মানি কালিৰে পৰা কৰ্ণাটকত মহিলাৰ বাবে ফ্ৰি বাছসেৱা আৰম্ভ হ’ব। সূত্ৰৰ খবৰ অনুসৰি কৰ্ণাটকৰ সমূহ চৰকাৰী বাছতেই এই সেৱা উপলব্ধ হ’ব। এই কাৰ্যক নিজেই পৰ্যবেক্ষণ কৰিছে নৱনিৰ্বাচিত মুখ্যমন্ত্ৰী ছিদ্দাৰামাইয়াই। এই বাছ সেৱা মুকলিৰ প্ৰথম দিনটোত নিজেই কণ্ডাক্টৰ হৈ মহিলাৰ হাতত টিকটো তুলি দিব ছিদ্দাৰামাইয়াই।
কৰ্ণাটক প্ৰশাসনে জনোৱা অনুসৰি দেওবাৰে পুৱাই এই সেৱা মুকলি কৰা হ’ব। ৰাজ্যৰ মুখ্যমন্ত্ৰীকে ধৰি কেইবাজনো মন্ত্ৰীৰ উপস্থিতিত এই সেৱা মুকলি কৰা হ’ব। কংগ্ৰেছ দলে জনোৱামতে এই প্ৰকল্পৰ নাম দিয়া হৈছে ‘শক্তি’।
উল্লেখ্য যে, কৰ্ণাটক কংগ্ৰেছে বিধানসভা নিৰ্বাচনৰ পূৰ্বে ভোটাৰক দিয়া পাঁচ প্ৰতিশ্ৰুতিৰ ভিতৰত এয়াও অন্যতম। কংগ্ৰেছৰ সফলতাৰ আঁৰতো এই ৫ প্ৰতিশ্ৰুতিয়েই বুলি বিজেপিয়েও স্বীকাৰ কৰি লৈছে। কংগ্ৰেছে দিয়া এই সুবিধা কৰ্ণাটকৰ প্ৰত্যেকজন লোকেই জাতি, ধৰ্ম, বৰ্ণ নিৰ্বিশেষ লাভো কৰিব। দেশৰ ক্ৰমবৰ্ধমান মূল্যবৃদ্ধিয়ে সাধাৰণ লোকক মাধমাৰ শোধোৱাৰ সময়তে কংগ্ৰেছে দিয়া এই সুবিধাই ৰাজ্যৰ জনতাক আকৃষ্ট কৰাও পৰিলক্ষিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
