আমেৰিকাৰ নিৰ্বাচনৰ ঠিক পূৰ্বে আকৌ যৌন কেলেংকাৰীৰ অভিযোগ উঠিছে ৰিপাবলিকান নেতা ডোনাল্ড ট্ৰাম্পৰ বিৰুদ্ধে৷ প্ৰাক্তন মডেল ষ্টেছি উইলিয়ামছৰ পাছত এইবাৰ ট্ৰাম্পৰ বিৰুদ্ধে যৌন কেলেংকাৰীৰ অভিযোগ আনিছে প্ৰাক্তন মিছ ছুইজাৰলেণ্ড প্ৰতিযোগী ব্ৰিটিছ কিউলে৷ প্ৰাক্তন মাৰ্কিন প্ৰেছিডেণ্টৰ বিৰুদ্ধে অভিযোগ আনি প্ৰাক্তন মডেলগৰাকীয়ে কয়, ‘১৯৯৩ চনত নিউয়ৰ্কত নিজৰ হোটেলৰ ৰুমত ব্যক্তিগত কথা পতাৰ চলেৰে তেওঁক মাতি শ্লীলতাহানি কৰিছিল ট্ৰাম্পে৷
কিউলৰ অভিযোগ, ঘৰত সোমায়েই ট্ৰাম্পে জোৰকৈ সাবটি ওঁঠত চুমা খায়৷ তেওঁৰ হাত শৰীৰৰ বিভিন্ন স্থানত বগাই যায়৷ ইয়াৰ পাছতেই পোছাক খোলাৰো চেষ্টা কৰে ট্ৰাম্পে৷ ঘটনাৰ আকস্মিকতাত স্তম্ভিত হৈ লৰালৰিকৈ তাৰ পৰা পলোৱাৰ দৰে ওলাই আহিছিল কিউল৷
এক সাক্ষাৎকাৰত সেই দিনটোৰ ঘটনাৰ বিৱৰণ দি ১৯৯২ চনৰ মিছ ছুইজাৰলেণ্ড বিউটি পেজেণ্টৰ প্ৰতিযোগী কিউলে লগতে কয় যে, ছুইজাৰলেণ্ডৰ মানুহৰ মনত আমেৰিকা মানেই এক বিশাল বেপাৰ৷ তাৰপাছতেই যেতিয়া ট্ৰাম্পৰ নাম আহে তেতিয়া সকলোৱে মুখ মেলি চাই৷ মানহাটনৰ প্লাজা হোটেলত ৫০গৰাকী প্ৰতিযোগীক এটা ইভেণ্টলৈ লৈ যোৱা হৈছিল৷ প্ৰতিযোগীসকলৰ সৈতে আলাপ কৰিবলৈ আহিছিল ট্ৰাম্প৷ সাক্ষাৎকাৰৰ সময়ত মোৰ নামতো ভুলকৈ উচ্চাৰণ কৰিছিল৷ ১০-১৫ মিনিটৰ সাক্ষাৎকাৰতেই ট্ৰাম্পে কিউলক পছন্দ কৰি পেলাইছিল৷ প্ৰেছ লঞ্চ অনুষ্ঠানৰ পাছত এগৰাকী কৰ্মচাৰীক লৈ ট্ৰাম্পে কিউলক আমন্ত্ৰণ কৰে৷
ছুইচ সৌন্দৰ্য প্ৰতিযোগীৰ অভিযোগ, ‘জানিছিলো বিকৃত মানুহটোৰ সন্মুখত নিজকে শান্ত ৰাখিব নোৱাৰিলে খুব ভয়ানক সময়ে সেইদিনা মোৰ বাবে অপেক্ষা কৰিছিল৷ মই আকৌ দেশলৈ উভতি যে আহিম তাতো অশংকা আহিছিল৷ মই প্ৰাণটো মুঠিতে লৈ তাৰ পৰা পলাইছিলো৷’ অৱশ্যে এই অভিযোগক সম্পূৰ্ণ মিছা বুলি দাবী কৰিছে ট্ৰাম্পৰ প্ৰেছ চেক্ৰেটাৰি কেৰোলিন লিভিটে৷ আগন্তুক ৫ নৱেম্বৰৰ নিৰ্বাচনৰ পূৰ্বে প্ৰাক্তন মডেলৰ এই অভিযোগ জনমানসত প্ৰভাৱ পেলাব পাৰে বুলি অনুমান কূটনীতিবিদে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
