ৰাজ্যৰ বিভিন্ন প্ৰান্তৰ মুঠ ২১টা মন্দিৰৰ অব্যৱহৃত সোণ গলাই পেলালে তামিলনাডু চৰকাৰে৷ হাজাৰ কিঃগ্ৰাঃৰ বেছি ওজনৰ সোণ গলোৱা হৈছে৷ এই সোণ পৰিণত কৰা হৈছে ২৪ কেৰেটৰ সোণলৈ৷ সেইসমূহ বেংকত থৈ বছৰি ১৮ কোটি টকা উপাৰ্জন কৰিছে ৰাজ্য চৰকাৰে৷ কেৱল সুদৰ বাবদতেই এই ধন লাভ কৰি আছে তামিলনাডু চৰকাৰে৷ তামিলনাডু বিধানসভাত বৃহস্পতিবাৰে এই তথ্য জনাইছে ৰাজ্যৰ হিন্দু ধৰ্মীয় সম্পত্তি বিষয়ক মন্ত্ৰী পি পে ছেকৰ বসুৱে৷ বিধানসভাত মন্ত্ৰীয়ে দিয়া তথ্য অনুসৰি ৰাজ্যৰ ২১টা মন্দিৰত ভক্তসকলৰ দানৰ যি সমস্ত সোণ অব্যৱহৃত অৱস্থাত পৰি আছিল সেয়া প্ৰথমে পৃথক কৰা হৈছে৷
২০২৫ চনৰ ৩১ মাৰ্চ পৰ্যন্ত এই অব্যৱহৃত মুঠ সোণৰ পৰিমাণ ১০৭৪ কিঃগ্ৰাঃতকৈ কিছু বেছি৷ তাৰ মাজত তিৰুচিৰাপল্লীৰ অৰুলমিগু মাৰিয়াম্মান মন্দিৰৰ পৰাই আহিছে ৪২৪.২৬ কেজি সোণ৷ মুম্বাইৰ চৰকাৰী কাৰখানাত এই সোণ গলোৱা হৈছে৷ তাতেই তৈয়াৰ হৈছে সোণৰ বিস্কুট৷ ভাৰতীয় ষ্টেট বেংকৰ নিৰ্দিষ্ট বিমা প্ৰকল্পত এই সোণ জমা ৰখা হৈছে৷ বছৰি ১৭.৮১ কোটি সুদ পোৱা গৈছে সেই সোণৰ পৰা৷
তামিলনাডু চৰকাৰে জনাইছে যে মন্দিৰৰ সোণৰ পৰা পোৱা সুদৰ অৰ্থৰে মন্দিৰৰেই উন্নয়নত ব্যৱহাৰ কৰা হৈছে৷ ৰাজ্যৰ সমস্ত মন্দিৰৰ পৰিকাঠামোগত উন্নয়ণ, ৰক্ষণাবেক্ষণ আৰু বিভিন্ন পূজাপাৰ্বনত এই ধন খৰচ হৈছে৷ সমগ্ৰ প্ৰক্ৰিয়াৰ স্বচ্ছতা বজায় ৰাখিবলৈ তিনিটা আঞ্চলিক কমিটি গঠন কৰিছে চৰকাৰে৷ প্ৰতিখন কমিটিতেই ৰখা হৈছে এজন অৱসৰপ্ৰাপ্ত ন্যায়াধীশ৷ সোণ বিনিয়োগৰ প্ৰকল্পৰ তত্ত্বাবধানৰ দায়িত্বত আছে তেওঁলোক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
