অসম লাইভ২৪ঃ বাঢ়িছে সমূদ্ৰৰ জলস্তৰ৷ টোপনি হেৰাইছে থাইলেণ্ডবাসীৰ৷ সলনি হ’ব পাৰে থাইলেণ্ডৰ ৰাজধানীও৷ পৰিস্থিতি যদি এনেকৈয়ে থাকে তেন্তে থাইলেণ্ডৰ ৰাজধানী বেংককৰ পৰা অন্য স্থানলৈ লৈ যাব লগা হ’ব বুলিও একপ্ৰকাৰে খাটাং হৈ পৰিছে থাইলেণ্ড প্ৰশাসন৷ সংবাদ সংস্থা এএফপিক বুধবাৰে এই উদ্বেগৰ খবৰ জনাইছে থাইলেণ্ডৰ জলবায়ু সংক্ৰান্তিয় কাৰ্যালয়ৰ এগৰাকী ছিনিয়ৰ অফিচাৰে৷ ধাৰাবাহিকভাৱে যি ছবি দেখা গৈছে সেই ছবিক লৈ শংকিত হৈছে থাইলেণ্ডবাসী৷
জলবায়ু বিশেষজ্ঞসকলৰ একাংশৰ অনুমান, এই শতাব্দী শেষ হোৱাৰ পূৰ্বেই সমুদ্ৰৰ তলিত সোমাই পৰিব বেংকক চহৰ৷ বৰ্ষাকালত থাইলেণ্ডৰ ৰাজধানীৰ বেছিভাগ চহৰেই প্লাবিত হৈ আছে৷ সেয়ে চিন্তা বাঢ়িছে জলবায়ু বিশেষজ্ঞসকলৰো৷ থাইলেণ্ড চৰকাৰে জলবায়ু পৰিবৰ্তন আৰু পৰিবেশ বিভাগৰ ডেপুটি ডাইৰেক্টৰ জেনেৰেল পাভিচ কেছাভাওঙে সাৱধান বাণী দি কয়, ‘বৰ্তমান উষ্ণায়নৰ যি পৰিস্থিতি সেই পৰিস্থিতিত বিশ্বৰ সৈতে খোজ মিলাব নোৱাৰিব বেংককে৷ আমি ইতিমধ্যেই ১.৫ডিগ্ৰী চেলছিয়াছ বেছিতেই আছো৷ এই পৰিস্থিতিত আমি অভিযোজনৰ বিষয়েও ভাৱিব লাগিব৷ এই পৰিস্থিতিত থাকিলে আমি অচিৰেই সাগৰ তলিত ডুব যাম৷’
নেদাৰলেণ্ডৰ দৰে বেংকক চহৰতো ডাইক নিৰ্মাণৰ চিন্তাভাৱনা চলাইছে স্থানীয় প্ৰশাসনে৷ কিন্তু এই ক্ষেত্ৰত চিন্তাভাৱনা কৰি আগুৱাই যোৱা উচিত বুলি জনাইছে পাভিছে৷ তেওঁৰ মতে সমগ্ৰ বিষয়টোৱেই অনুমানৰ ভিত্তিহে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
