চিকিৎসা বিজ্ঞানৰ যুগান্তকাৰী আৱিষ্কাৰ! অচিৰেই উপলব্ধ হ’ব কেতিয়াও বুঢ়া নোহোৱা ঔষধ

চিকিৎসা বিজ্ঞানৰ আটাইতকৈ গুৰুত্বপূৰ্ণ লক্ষ্যসমূহৰ ভিতৰত এটা হৈছে ‘ৰিভাৰ্ছ-এজিং’ অৰ্থাৎ বয়স বৃদ্ধিৰ প্ৰভাৱ ৰোধ কৰা দৰৱ উদ্ভাৱন কৰা। এই ক্ষেত্ৰত এক যুগান্তকাৰী পদক্ষেপ লোৱা হৈছে। ইতিমধ্যে প্ৰথমবাৰৰ বাবে মানুহৰ ওপৰত বয়সৰ বৃদ্ধিৰ প্ৰভাৱ  ৰোধ কৰিব পৰা এক বিশেষ ইনজেকচনৰ পৰীক্ষণ আৰম্ভ হৈছে। আমেৰিকাৰ ব’ষ্টনত অৱস্থিত বায়’টেক ষ্টাৰ্টআপ লাইফ বায়’ছায়েন্সে জনাইছে যে তেওঁলোকৰ প্ৰথমজন ৰোগীক ইতিমধ্যে চেলুলাৰ ৰিপ্ৰ’গ্ৰামিং ভিত্তিক ইনজেকচন প্ৰয়োগ কৰা হৈছে। পৰীক্ষাৰ অংশ হিচাপে এই ইনজেকচন গ্লুকোমা ৰোগত আক্ৰান্ত এজন ব্যক্তিৰ এটা চকুত প্ৰয়োগ কৰা হৈছে। এই ট্ৰায়েলৰ মূল উদ্দেশ্য হৈছে বয়স বৃদ্ধিৰ ফলত দুৰ্বল হৈ পৰা কোষসমূহক পুনৰ সজীৱ, সক্ৰিয় আৰু যুৱ অৱস্থালৈ ঘূৰাই অনা। আগন্তুক ছয় মাহ ধৰি বিজ্ঞানীসকলে এই চিকিৎসাৰ ফলাফল আৰু সম্ভাৱ্য পাৰ্শ্ব-প্ৰতিক্ৰিয়াসমূহ সুক্ষ্মভাৱে পৰ্যৱেক্ষণ কৰিব।

ইতিমধ্যে এন্দুৰ আৰু বান্দৰৰ ওপৰত সফল পৰীক্ষণ সম্পন্ন

চিকিৎসক আৰু বিজ্ঞানীসকলে এতিয়া কেইবামাহ ধৰি পৰীক্ষণ কৰা ৰোগীজনৰ স্বাস্থ্যৰ ওপৰত সূক্ষ্ম নজৰ ৰাখিব, যাতে নিশ্চিত হ’ব পৰা যায় যে এই প্ৰযুক্তি মানুহৰ শৰীৰৰ বাবে সম্পূৰ্ণৰূপে নিৰাপদ হয় নে নহয়। এই থেৰাপীত প্ৰথমে ৰোগীৰ চকুত এক বিশেষ জিন থেৰাপী ইনজেকচন প্ৰয়োগ কৰা হয়। ইয়াৰ পিছত কেইসপ্তাহমান ধৰি বিশেষ ধৰণৰ এণ্টিবায়’টিক ঔষধ গ্ৰহণৰ প্ৰক্ৰিয়া চলোৱা হয়। এই এণ্টিবায়’টিক ঔষধে শৰীৰৰ ভিতৰত উপস্থিত তিনিটা চিকিৎসামূলক জিনৰ বাবে এক প্ৰকাৰৰ “অন-ছুইচ” হিচাপে কাম কৰে। ফলস্বৰূপে এই জিনসমূহে কোষক পুনৰ প্ৰ’গ্ৰাম কৰি অধিক যুৱ আৰু সক্ৰিয় অৱস্থালৈ ঘূৰাই নিবলৈ আৰম্ভ কৰে। ইয়াৰ আগতে এন্দুৰ আৰু বান্দৰৰ ওপৰত চলোৱা পৰীক্ষাত এই পদ্ধতিয়ে সফলভাৱে দৃষ্টিশক্তি পুনৰ উদ্ধাৰ কৰিবলৈ সক্ষম হৈছিল।
এই থেৰাপীৰ বাবে মানুহৰ চকুক বাছনি কৰাৰ মূল কাৰণ হৈছে যে চকু শৰীৰৰ আন অংগসমূহৰ তুলনাত অধিক পৃথক আৰু সুৰক্ষিত। ফলত সম্ভাৱ্য পাৰ্শ্ব-প্ৰতিক্ৰিয়াসমূহ সহজে চিনাক্ত আৰু পৰ্যবেক্ষণ কৰিব পৰা যায়।

পৰীক্ষা সফল হ’লে এজিং থেৰাপীয়ে নতুন যুগৰ সূচনা কৰিব

লাইফ বায়’ছায়েন্সেছৰ মুখ্য কাৰ্যবাহী বিষয়া জেৰী মেকলাফলিনে এই সন্দৰ্ভত কয় যে-এই মুহূৰ্তটো কেৱল তেওঁলোকৰ কোম্পানী বা এজিং বায়’লজিৰ বাবেই নহয়, সমগ্ৰ চিকিৎসা বিজ্ঞানৰ বাবেও এক সম্ভাৱ্যভাৱে যুগান্তকাৰী আৰু পৰিৱৰ্তনশীল পদক্ষেপ হিচাপে বিবেচিত হ’ব। যদি এই ক্লিনিকেল ট্ৰায়েল সফল হয়, তেন্তে এজিং থেৰাপীৰ ক্ষেত্ৰত এক নতুন যুগৰ আৰম্ভণি হ’ব পাৰে। ইয়াৰ চূড়ান্ত লক্ষ্য হৈছে সমগ্ৰ শৰীৰৰ কোষসমূহক পুনৰ যুৱ আৰু সক্ৰিয় কৰি তোলা, যাতে বয়স বৃদ্ধিৰ লগে লগে DNAৰ কাৰ্যক্ষমতা আৰু জিন এক্সপ্ৰেছনৰ ধৰণ উন্নত কৰিব পৰা যায়।
কোটিপতি বিনিয়োগকাৰী আৰু ঔষধ কোম্পানীসমূহৰ আগ্ৰহ। এই অত্যাধুনিক প্ৰযুক্তিত আমাজনৰ প্ৰতিষ্ঠাপক জেফ বেজ’ছ আৰু অ’পেন এআইৰ CEO ছেম অল্টমেনকে ধৰি বহু প্ৰভাৱশালী বিনিয়োগকাৰীয়ে ধন বিনিয়োগ কৰিছে। তদুপৰি এলাই লিলি আৰু মাৰ্কৰ দৰে বিশ্বখ্যাত ঔষধ নিৰ্মাতা কোম্পানীসমূহেও এই ক্ষেত্ৰত নিজৰ বিনিয়োগ বৃদ্ধি কৰিছে। মানুহৰ ওপৰত পৰীক্ষা আৰম্ভ হোৱাৰ পূৰ্বে এই গৱেষণা কেৱল এন্দুৰ আৰু বান্দৰৰ মাজতেই সীমাবদ্ধ আছিল। এতিয়া প্ৰথমবাৰৰ বাবে এই যুগান্তকাৰী গৱেষণাই মানুহৰ ওপৰতো প্ৰয়োগৰ পৰ্যায়ত উপনীত হৈছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ