জ্ঞানব্যাপী মছজিদ-সম্পৰ্কীয় আইনী বিতৰ্কৰ মাজতে এতিয়া পুনৰ বিশ্বৰ সপ্তম আশ্চৰ্য তাজমহলক লৈ নতুন বিতৰ্কৰ সূচনা হৈছে। এলাহাবাদ উচ্চ ন্যায়ালয়ত চলি থকা এখন আবেদনৰ শুনানিৰ সময়ত আদালতে কেন্দ্ৰীয় চৰকাৰ আৰু ভাৰতীয় পুৰাতত্ত্ব সৰ্বেক্ষণ (ASI)ক বিষয়টোৰ ওপৰত নিজৰ স্থিতি স্পষ্ট কৰি তথ্যভিত্তিক উত্তৰ দাখিল কৰিবলৈ নিৰ্দেশ দিয়াৰ পাছতে তাজমহল পুনৰ ৰাজনৈতিক, ঐতিহাসিক আৰু আইনী মহলৰ আলোচনাৰ কেন্দ্ৰবিন্দু হৈ পৰিছে। এই গোচৰটোত আবেদনকাৰী পক্ষই দাবী কৰিছে যে– তাজমহলত আচলতে ‘তেজু মহালয়া’ নামৰ এটা প্ৰাচীন শিৱ মন্দিৰ আছিল, যাক মোগল সম্ৰাট শ্বাহজাহানে পৰৱৰ্তী সময়ত সমাধিসৌধলৈ ৰূপান্তৰিত কৰিছিল। এই দাবীৰ সমৰ্থনত তাজমহল চৌহদত বৈজ্ঞানিক সমীক্ষা, আধুনিক প্ৰযুক্তিৰে অনুসন্ধান আৰু প্ৰয়োজন অনুসৰি খননকাৰ্য চলোৱাৰ দাবীও উত্থাপন কৰা হৈছে।
কি কয় ভাৰতীয় পুৰাতত্ত্ব সৰ্বেক্ষণে
অৱশ্যে এই দাবীসমূহ এতিয়াও আদালত বা ভাৰতীয় পুৰাতত্ত্ব সৰ্বেক্ষণ (ASI)-এ সত্য বুলি স্বীকৃতি দিয়া নাই। অধিকাংশ স্বীকৃত ইতিহাসবিদ আৰু পুৰাতত্ত্ব বিশেষজ্ঞৰ মতে, তাজমহল ১৭শ শতিকাত মোগল সম্ৰাট শ্বাহজাহানে তেওঁৰ পত্নী মুমতাজৰ স্মৃতিত নিৰ্মাণ কৰা সমাধিসৌধ। এই বিষয়ত ASI-এ পূৰ্বেও তাজমহলক মোগল যুগৰ স্থাপত্য নিদৰ্শন বুলি অভিহিত কৰি ‘তেজু মহালয়া’ তত্ত্বৰ সমৰ্থনত কোনো বিশ্বাসযোগ্য পুৰাতাত্ত্বিক প্ৰমাণ নাই বুলি আদালতত নিজৰ স্থিতি প্ৰকাশ কৰিছিল। ইয়াৰ পূৰ্বে আগ্ৰাৰ এখন নিম্ন আদালতে তাজমহলৰ সমীক্ষা সম্পৰ্কীয় আবেদন খাৰিজ কৰিছিল। কিন্তু সেই সিদ্ধান্তক প্ৰত্যাহ্বান জনাই আবেদনকাৰী পক্ষ এলাহাবাদ উচ্চ ন্যায়ালয়ৰ দ্বাৰস্থ হয়। শুনানিৰ সময়ত ন্যায়াধীশ ৰোহিত ৰঞ্জন আগৰাৱালে কেন্দ্ৰীয় চৰকাৰ আৰু ASIক বিষয়টোৰ ওপৰত বিশদ তথ্য, পুৰাতাত্ত্বিক নথি-পত্ৰ, ঐতিহাসিক ৰেকৰ্ড আৰু চৰকাৰী স্থিতি আদালতৰ সন্মুখত দাখিল কৰিবলৈ নিৰ্দেশ দিয়ে।
কি কয় এলাহবাদ উচ্চ ন্যায়ালয়ে?
আদালতে বৰ্তমানলৈকে তাজমহলত সমীক্ষা বা খননকাৰ্য চলোৱাৰ কোনো চূড়ান্ত নিৰ্দেশ জাৰি কৰা নাই। বৰঞ্চ আদালতে প্ৰথমে চৰকাৰ আৰু ASI-ৰ ব্যাখ্যা বিচাৰিছে, যাতে উপলব্ধ ঐতিহাসিক আৰু পুৰাতাত্ত্বিক তথ্যৰ ভিত্তিত বিষয়টো মূল্যায়ন কৰিব পৰা যায়। আবেদনকাৰী পক্ষৰ অধিবক্তাৰ মতে, যদি চৰকাৰ বা ASI-এ সন্তোষজনক আৰু তথ্যসমৃদ্ধ উত্তৰ দিব নোৱাৰে, তেন্তে আদালতে বৈজ্ঞানিক পদ্ধতিৰে সমীক্ষা অথবা প্ৰয়োজন অনুসৰি সীমিত পৰিসৰত খননৰ দাবী বিবেচনা কৰিব পাৰে। কিন্তু এই বিষয়ত এতিয়াও কোনো নিৰ্দেশ জাৰি হোৱা নাই।
তাজমহল নে তেজু মহালয়া?
উল্লেখযোগ্য যে তাজমহলক ‘তেজু মহালয়া’ বুলি দাবী কৰাৰ ধাৰণাটো বহু দশক ধৰি বিতৰ্কৰ বিষয় হৈ আহিছে। বিশেষকৈ লেখক পি. এন. ওকৰ গ্ৰন্থসমূহৰ জৰিয়তে এই তত্ত্ব প্ৰচাৰ লাভ কৰিছিল। কিন্তু ভাৰতৰ বিভিন্ন আদালতে পূৰ্বে এনে দাবীক সমৰ্থন কৰিব পৰাকৈ কোনো নিশ্চিত ঐতিহাসিক বা পুৰাতাত্ত্বিক প্ৰমাণ পোৱা হোৱা নাই বুলি মন্তব্য কৰিছে। ASI-এও একাধিকবাৰ এই দাবী নাকচ কৰিছে। এতিয়া সকলোৰে দৃষ্টি এলাহাবাদ উচ্চ ন্যায়ালয়ৰ পৰৱৰ্তী শুনানিৰ ওপৰত। কেন্দ্ৰীয় চৰকাৰ আৰু ASI-এ আদালতত কি তথ্য আৰু ব্যাখ্যা দাখিল কৰে, তাৰ ওপৰতে এই গোচৰৰ পৰৱৰ্তী দিশ বহু পৰিমাণে নিৰ্ভৰ কৰিব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
