অপূৰ্ণ হোৱা স্বপ্ন বুকুত বান্ধিয়েই বিদায় ক্ৰিষ্টিয়ানো ৰোনাল্ডোৰ

কেৰিয়াৰৰ বিদায় বেলাত উপস্থিত হৈছে বিশ্ব ফুটবলৰ ইতিহাসত অসংখ্য গৌৰৱোজ্জ্বল অধ্যায় ৰচনা কৰা কিংবদন্তি খেলুৱৈ ক্ৰিষ্টিয়ানো ৰোনাল্ডো ড’ছ ছাণ্ট’ছ এভেইৰ’ চমুকৈ CR7। অনুৰাগীৰ বাবে এই বাক্যশাৰীয়ে হৃদয় ভাঙিলেও এয়া যেন প্ৰকৃতিৰেই এক নিষ্ঠুৰ নিয়ম। পেলে, মাৰাডোনায়ো এদিন বিদায় লৈছিল। বিগত সপ্তাহত বিদায় ল’লে ক্ৰোৱেছিয়ান লুকা মাড্ৰিচ, ব্ৰাজিলৰ নেইমাৰেও। আচলতে  ফুটবলৰ খেলপথাৰত কোনোৱেই চিৰস্থায়ী নহয়, কিন্তু অনুৰাগীৰ হৃদয়ৰ পৰা কেতিয়াও মচি নাযায় কিছুমান কিংবদন্তি খেলুৱৈৰ নাম। কেৱল ফুটবলেই নহয়, প্ৰতিবিধ খেলৰ ক্ষেত্ৰতেই প্ৰযোজ্য প্ৰকৃতিৰ এই নিয়ম।

কোনেও স্পৰ্শ কৰিব নোৱাৰা ঈৰ্ষণীয় সফলতা, ফুটবলৰ ঈশ্বৰপ্ৰদত্ত শৈলী, অনুৰাগীৰ সীমাহীন মৰম-ভালপোৱা লাভ কৰাৰ পিছতো যেন অপূৰ্ণ হৈ ৰ’ল সোণালী আখৰেৰে লিখা ক্ৰিষ্টিয়ানো ৰোনাল্ডোৰ এই কেৰিয়াৰ। সকলো পায়ো দিব নোৱাৰিলে বিশ্বকাপৰ সেই সোণালী ট্ৰফীত চুমুক, যি প্ৰতিজন পেছাদাৰী ফুটবলাৰৰে শ্ৰেষ্ঠতম সপোন। পৰ্তুগালৰ হৈ ৬ টাকৈ বিশ্বকাপত অংশ লোৱা ৰোনাল্ডোৱেই হৈছে বিশ্বকাপৰ দৃষ্টিকোনেৰে দেশখনৰ সবাতোকৈ অভিজ্ঞ খেলুৱৈ। ৰোনাল্ডোৱে ২৭ খন বিশ্বকাপ মেচত পৰ্তুগালক প্ৰতিনিধিত্ব কৰিছে।

আৰ্লিংটনৰ ডালাছ ষ্টেডিয়ামত আজি অনুষ্ঠিত Round of 16ৰ এই ৰোমাঞ্চকৰ মেচখনৰ অধিকাংশ সময় দুয়োটা দলে সমানে যুঁজ দি থাকিলেও অন্তিম মুহূৰ্তত ভাগ্যই স্পেইনৰ পক্ষ লয়। মেচখনৰ অন্তিম মুহূৰ্তত স্পেইনৰ মেৰিনোৱে দিয়া গ’লটোৰ লগে লগে বহু বছৰৰ কঠোৰ পৰিশ্ৰম, অসীম আত্মবিশ্বাস আৰু দেশৰ হৈ বিশ্বকাপ জয়ৰ যি সপোন ৰোনাল্ডোৱে বুকুত সজাই ৰাখিছিল, সেয়া অৱশেষত অপূৰণীয় হৈয়ে ৰোৱাটো নিশ্চিত হৈ পৰে আৰু ইয়াৰ লগে লগে অৱশ্যাম্ভী বিদায়ৰ সংকেত লাভ কৰি সেমেকি উঠি ৰোনাল্ডোৰ দুচকু।

মেচখনত স্পেইনৰ ৰক্ষণভাগৰ দৃঢ়তা আছিল অতি প্ৰশংসনীয়। মেৰিনোৰ এই গ’লটোৰে সুদীৰ্ঘ ১৬ বছৰৰ বিৰতিৰ মূৰত কোৱাৰ্টাৰ ফাইনেলত প্ৰৱেশ কৰিলে স্পেইন। কোৱাৰ্টাৰত স্পেইনে মুখামুখি হ’ব আন এটা শক্তিশালী ইউৰোপিয়ন দল বেলজিয়ামৰ।

৪১ বছৰীয়া কিংবদন্তি ফুটবলাৰ ৰোনাল্ডোৰ এইটোৱেই শেষৰটো বিশ্বকাপ, আধুনিক ফুটবলৰ অন্যতম সাফল্যৰ অধিকাৰী ফুটবলাৰ ৰোনাল্ডোৰ ইতিহাসৰ জোলোঙাত সকলো আছে মাথোঁ নাই বিশ্বকাপৰ ট্ৰফীটো। কেতিয়াবা কিছুমান সপোন পূৰণ নহয়, কিন্তু সেই সপোন পূৰণৰ লক্ষ্যৰে কৰা অসীম কষ্ট, অধ্যাৱসায় আৰু সপোনৰ পম খেদা যাত্ৰাৰ বাবে জনপ্ৰিয় হৈ ৰয় একো একোজন ব্যক্তি বা মানুহ। ফুটবল ইতিহাসত, অনুৰাগীৰ হৃদয়ত ৰোনাল্ডোও ৰৈ যাব এনেকৈয়ে চিৰদিন…।

এই প্ৰতিবেদন যুগুতাইছে মানসজ্যোতিয়ে