এটাৰ পাছত আনটো পেজাৰ বিস্ফোৰণত তছনছ লেবানন৷ ইয়াৰ সৈতে লেবাননৰ বিভিন্ন স্থান আৰু ছিৰিয়াতো পেজাৰ বিস্ফোৰণৰ ঘটনা সংঘটিত হৈছে৷ বিভিন্ন সংবাদমাধ্যম সূত্ৰৰ খবৰ অনুসৰি এই আক্ৰমণত অন্তত ৯জনৰ মৃত্যু হৈছে৷ আহতৰ সংখ্যা ৪হাজাৰতকৈ বেছি৷ হাস্পতালসমূহতো এতিয়া হাহাকাৰ পৰিস্থিতি৷ চাৰিওফালে কেৱল হাহাকাৰ পৰিস্থিতি৷
পেজাৰ আক্ৰমণৰ নেপথ্যত ইজৰাইলকেই কাঠগড়াত তুলিছে ইৰাণৰ সহায়পুষ্ট সশস্ত্ৰ গোষ্ঠী হিজবুল্লাই৷ চৰকাৰী সূত্ৰৰ খবৰ অনুসৰি এই আক্ৰমণত হিজবুল্লাহৰ একাধিক সদস্যৰ মৃত্যু হৈছে৷ মৃতকৰ তালিকাত আছে এগৰাকী কিশোৰীও৷ ইৰাণৰ ৰাষ্ট্ৰদূতো আহত হৈছে এই আক্ৰমণত৷ পেজাৰ আক্ৰমণৰ দায় ইজৰাইলৰ গাত ঠেলি পুনৰ আক্ৰমণৰ ধমকি দিছে হিজবুল্লাই৷ এই আক্ৰমণ সম্পৰ্কে বৰ্তমান পৰ্যন্ত ইজৰাইলৰ তৰফৰ পৰা কোনো বিবৃতি দিয়া নাই৷
পেজাৰ কি?
পেজাৰ হ’ল যোগাযোগ মাধ্যমৰ অন্যতম এক ডিভাইছ৷ মোবাইল ফোনৰ বিকল্প হিচাপে পেজাৰৰ ব্যৱহাৰ কৰা হয়৷ সাধাৰণতে বিভিন্ন জঙ্গিগোষ্ঠীয়ে এই ডিভাইছ ব্যৱহাৰ কৰে৷ পেজাৰৰ লোকেছন ট্ৰেক কৰিব নোৱাৰি৷ হাত বা জেপত লৈয়েই ফুৰিব পাৰি এই পেজাৰ৷ সেই পেজাৰৰ মাজতেই বিস্ফোৰক ৰাখি বিস্ফোৰণ ঘটোৱা বুলি দাবী কৰা হৈছে৷
সামাজিকমাধ্যমত এই আক্ৰমণৰ কিছু ভিডিঅ’ও ভাইৰেল হৈ পৰিছে৷ দাবী কৰা হৈছে যে লেবাননৰ ৰাজধানী আৰু তাৰ সংলগ্ন এলেকাৰ ৰাস্তাৰ কাষে কাষে পৰি আছে মানুহ৷ কাৰোবাৰ হাত নাই যদি কাৰোবাৰ ভৰি নাই৷ কোনোৱে আকৌ মুখমণ্ডলত গুৰুতৰ আঘাত পাইছে৷
পৰিয়ালৰ লোকসকলে এতিয়া আঘাতপ্ৰাপ্তসকলক হাস্পতাললৈ লৈ দৌৰাদৌৰি কৰাৰ দৃশ্যও ভাইৰেল হৈ পৰিছে সামাজিক মাধ্যমত৷ সামান্য সময়ৰ অন্তৰালতেই এই বিস্ফোৰণ সংঘটিত হৈছে৷ এই বিস্ফোৰণত বিধ্বস্ত লেবানন আৰু চিৰিয়াৰ জনজীৱন৷ উল্লেখ্য যে সম্প্ৰতি ইৰানৰ মাটিত হামাছৰ শীৰ্ষনেতা ইছমাইল হানিয়া আৰু হিজবুল্লা সশস্ত্ৰ বাহিনীৰ শীৰ্ষ কমাণ্ডাৰ নামেহ নাছেৰৰ মৃত্যু হৈছে৷ দুই নেতাৰ মৃত্যুৱে আকৌ এবাৰ উত্তপ্ত কৰি তুলিছে পশ্চিম এছিয়া৷
উল্লেখ্য যে ইজৰাইল আৰু হিজবুল্লাহৰ মাজত সৰু বৰ সংঘৰ্ষ লাগিয়েই থাকে৷ কেতিয়াবা যদি ৰকেট আক্ৰমণ, কেতিয়াবা আকৌ ড্ৰোণ আক্ৰমণ৷ দুইপক্ষৰ আক্ৰমণত উত্তপ্ত হৈ থাকে পশ্চিম এচিয়া৷ ইয়াৰ সৈতে ইৰাণেও বিভিন্ন ধৰণে আক্ৰমণৰ লক্ষ্য কৰি লৈ থাকে ইজৰাইলক৷ এই ঘটনাসমূহৰ মাজত এইবাৰ পেজাৰ এটাকে সকলোকে আকৌ এবাৰ ব্যতিব্যস্ত কৰি তুলিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
