আফ্ৰিকাৰ দেশ মৰক্কোৰ পৰা ইউৰোপৰ স্পেইনৰ চেউটালৈ হঠাতে হাজাৰ হাজাৰ প্ৰব্ৰজনকাৰীৰ আগমনে স্পেইনৰ নিৰাপত্তাৰ প্ৰতি ভাবুকি সৃষ্টি কৰিছে। স্পেইনৰ স্থানীয় প্ৰশাসনে এই ঘটনাৰ পিছতে ৰাষ্ট্ৰীয় জৰুৰীকালীন অৱস্থা ঘোষণা কৰিছে। ইয়াৰ লগে লগে ইউৰোপত অবৈধ প্ৰব্ৰজনক লৈ ৰাজনৈতিক যুদ্ধ পুনৰ তীব্ৰতৰ হৈছে। উত্তৰ আফ্ৰিকাত অৱস্থিত স্পেইনৰ অধীনত থকা স্বায়ত্তশাসিত চহৰ চেউটাত মৰক্কোৰ পৰা হাজাৰ হাজাৰ প্ৰব্ৰজনকাৰীয়ে সাগৰ আৰু সীমান্তৰ বাধা অতিক্ৰম কৰি ইউৰোপীয় সংঘত প্ৰৱেশ কৰে। সূত্ৰ অনুসৰি মাত্ৰ ৩ দিনৰ ভিতৰতে হোৱা এই আগমনৰ বাবে চেউটা প্ৰশাসনে মাদ্ৰিদক ৰাষ্ট্ৰীয় জৰুৰীকালীন অৱস্থা ঘোষণা কৰিবলৈ আহ্বান জনায়।
পৰিস্থিতিৰ ভয়াৱহতাৰ প্ৰতি লক্ষ্য ৰাখি স্পেইন চৰকাৰে চেউটাত সেনা, অসামৰিক বাহিনী, অতিৰিক্ত আৰক্ষী বাহিনী নিয়োগ কৰিছে। প্ৰশাসনে কয় যে সীমান্তৰ পৰিস্থিতি অসাধাৰণ আৰু শৃংখলা ঘূৰাই আনিবলৈ অতিৰিক্ত সম্পদৰ প্ৰয়োজন। ইফালে এই সন্দৰ্ভত স্পেইন আৰু মৰক্কোৰ মাজত আলোচনা অব্যাহত আছে। দুয়োখন দেশে অবৈধভাৱে প্ৰৱেশ কৰা প্ৰব্ৰজনকাৰীক ক্ষিপ্ৰতাৰে ঘূৰাই নিয়াৰ বাবে সমন্বয় বৃদ্ধি কৰিবলৈ সন্মত হৈছে।
উল্লেখ্য যে উত্তৰ আফ্ৰিকাত অৱস্থিত স্পেইনৰ সৰু ভূখণ্ড চেউটা মৰক্কোৰ সীমাৰে লাগি আছে। এয়া আফ্ৰিকাৰ সৈতে ইউৰোপীয় সংঘৰ একমাত্ৰ স্থল সীমান্ত। ফলস্বৰূপে বছৰ বছৰ ধৰি ইউৰোপীয় নাগৰিক হ’বলৈ চেষ্টা কৰা প্ৰব্ৰজনকাৰী আৰু মানৱ সৰবৰাহকাৰীৰ বাবে ই এক ডাঙৰ ট্ৰেনজিট পইণ্ট হৈ আহিছে।
এই সংকটে ইউৰোপৰ ৰাজনীতিকো উত্তপ্ত কৰি তুলিছে। ইটালীৰ প্ৰধানমন্ত্ৰী জৰ্জিঅ’ মেল’নীয়ে কয় যে-অনিয়ন্ত্ৰিত অবৈধ প্ৰব্ৰজনে ইউৰোপৰ নিৰাপত্তাৰ প্ৰতি প্ৰত্যক্ষ ভাবুকি কঢ়িয়াই আনিছে। তেওঁ কয় যে-ইটালীয়ে এই বিষয়টোক গুৰুত্ব সহকাৰে লৈছে আৰু আনকি প্ৰয়োজন হ’লে স্পেইনৰ সৈতে শ্বেংগেন ব্যৱস্থা স্থগিত ৰখাৰ দৰে পদক্ষেপৰো বিবেচনা কৰিব পাৰে। অৱশ্যে এয়া কেৱল ইটালীৰ পৰা অহা ৰাজনৈতিক সতৰ্কবাণীহে, ইউৰোপৰ বাকী দেশসমূহে এতিয়ালৈ এই সন্দৰ্ভত আগবঢ়োৱা নাই কোনো ধৰণৰ মন্তব্য।
ইফালে, আমেৰিকাৰ ৰাষ্ট্ৰপতি ড’নাল্ড ট্ৰাম্প প্ৰশাসনেও ইউৰোপৰ প্ৰব্ৰজন নীতিক সমালোচনা কৰি এই পৰিঘটনাৰ প্ৰতি সঁহাৰি জনায়। হোৱাইট হাউছে কয় যে ইউৰোপীয় দেশসমূহে বৃহৎ পৰিসৰৰ অবৈধ প্ৰব্ৰজনক উৎসাহিত কৰা নীতিসমূহ পুনৰ বিবেচনা কৰা উচিত।
এই সংকট কেৱল স্পেইনতে সীমাবদ্ধ নহয়। চেউটা ইউৰোপীয় সংঘৰ বাহ্যিক সীমান্তৰ অংশ, গতিকে ইয়াৰ পৰিস্থিতিয়ে সমগ্ৰ ইউৰোপৰ সীমান্তৰ নিৰাপত্তা, শৰণাৰ্থী নীতি আৰু শ্বেংগেন ব্যৱস্থাত প্ৰভাৱ পেলাব পাৰে। এই কাৰণেই এই বিষয়টো এতিয়া ইউৰোপৰ আভ্যন্তৰীণ নিৰাপত্তা আৰু ৰাজনীতিৰ অন্যতম জৰুৰী বিষয় হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
