আজিকালি মোবাইল এপ বা বেংকৰ পৰা ব্যক্তিগত ঋণ লোৱাটো অতি সাধাৰণ কথা। ঋণ লোৱা টকাখিনি নিমিষতে আপোনাৰ বেংক একাউণ্টত জমা হৈ যায়। কিন্তু প্ৰকৃত মানসিক চাপ আৰম্ভ হয় যেতিয়া কোনো কাৰণত আপুনি চাকৰি হেৰুৱাই পেলায়, আপোনাৰ ব্যৱসায় কেতিয়াবা ভালকৈ নচলে বা আন কোনো কাৰণত আৰ্থিক অনাটনৰ সন্মুখীন হয় আৰু ফলস্বৰূপে EMIবোৰ সময়মতে দিয়া নহয় বা দিবলৈ থাকি যায়। পৰিস্থিতি বেয়া হ’লে এজন সাধাৰণ মানুহৰ মনত আটাইতকৈ ডাঙৰ ভয়টো হ’ল- ঋণ পৰিশোধ নকৰিলে আপুনি জেললৈ যাবলাগীয়া হব পাৰে নেকি? ইয়াৰ সহজ আৰু স্পষ্ট উত্তৰটো হ’ল ‘নালাগে’। কেৱল ঋণ পৰিশোধ নকৰাটো অপৰাধ নহয়। আপোনাৰ পৰিস্থিতিয়েই নিৰ্ভৰ কৰে আপুনি EMI দিব পাৰিছে নে নাই। উদাহৰণস্বৰূপে পৰিস্থিতি বেয়া হোৱাৰ বাবে যদি EMI দিব পৰা নাই, তেন্তে সেই কাৰণে আপোনাক জেললৈ পঠিয়াব নোৱাৰি।
যদি আপুনি ধাৰাবাহিকভাৱে আপোনাৰ EMI পৰিশোধ কৰিব নোৱাৰে, তেন্তে বেংকে তৎক্ষণাত কোনো কঠোৰ ব্যৱস্থা গ্ৰহণ নকৰে। প্ৰথমে কল আৰু মেছেজৰ জৰিয়তে ধন পৰিশোধ কৰিবলৈ সোঁৱৰাই দিয়া হয়। তাৰ পিছত, আইনী জাননী প্ৰেৰণ কৰা হয়। যদিহে ধনখিনি দীৰ্ঘদিন ধৰি পৰিশোধ নকৰাকৈ থাকে, তেন্তে বেংকে আপোনাৰ ঋণ একাউণ্টক “NPO” বুলি গণ্য কৰে। ইয়াৰ ফলত আপোনাৰ চিবিল স্ক’ৰত যথেষ্ট প্ৰভাৱ পৰে। ইয়াৰ অৰ্থ হ’ল ভৱিষ্যতে নতুন ঋণ বা ক্ৰেডিট কাৰ্ড লাভ কৰাত আপুনি যথেষ্ট অসুবিধাৰ সন্মুখীন হ’ব। ইয়াৰ পিছত বেংকে আইনী আশ্ৰয় ল’ব পাৰে আৰু আদালতৰ জৰিয়তে নিজৰ ধন আদায়ৰ প্ৰক্ৰিয়া আৰম্ভ কৰিব পাৰে। যদি আপুনি জামিন হিচাপে কিবা এটা প্ৰতিশ্ৰুতি দিছে, তেন্তে তাৰ বিৰুদ্ধেও ব্যৱস্থা লোৱা হ’ব পাৰে।
অৱশ্যে ঋণ লোৱাৰ সময়ত তথ্য জালিয়াতিৰ ক্ষেত্ৰতহে জেলৰ শাস্তি সম্ভৱ। উদাহৰণস্বৰূপে, কোনোবাই জাল নথি-পত্ৰ ব্যৱহাৰ কৰি ঋণ লাভ কৰিছিল, চাকৰি বা উপাৰ্জনৰ বিষয়ে বেংকক মিছা তথ্য দিয়া বা ইচ্ছাকৃতভাৱে ধন লৈ পলায়ন কৰা। এনে ক্ষেত্ৰত বেংকে পোনপটীয়াকৈ আৰক্ষীৰ ওচৰলৈ গৈ FIR দাখিল কৰিব পাৰে, যাৰ ফলত অপৰাধমূলক গোচৰৰ সৃষ্টি হয়। অৰ্থাৎ ইচ্ছাকৃতভাৱে বেংকক প্ৰতাৰণা কৰা আৰু বাধ্যবাধকতাৰ বাবে ধন পৰিশোধ নকৰাটো সম্পূৰ্ণ বেলেগ দুটা কথা।
ঋণ পৰিশোধ নকৰাসকলৰ মাজত আটাইতকৈ ডাঙৰ আশংকা হৈছে ৰিকাভাৰী এজেণ্ট। কিন্তু ভাৰতীয় ৰিজাৰ্ভ বেংকৰ নিয়মাৱলীই সাধাৰণ মানুহক সম্পূৰ্ণ ক্ষমতা প্ৰদান কৰে। ৰিকাভাৰী এজেণ্টে আপোনাক ফোন কৰি তেওঁলোকৰ ধন বিচাৰিব পাৰে, আনকি আপোনাৰ ঘৰ বা কাৰ্যালয়লৈও আহিব পাৰে। কিন্তু কোনো কাৰণতে তেওঁলোকে আপোনাক গালি-গালাজ কৰা বা ভাবুকি দিয়াৰ অনুমতি নাই। মাজনিশা বা অদ্ভুত সময়ত ফোন কৰিও হাৰাশাস্তি কৰিব নোৱাৰে। যদি কোনো এজেণ্টে তেওঁলোকৰ সীমা অতিক্ৰম কৰে বা আপোনাক অপমান কৰিবলৈ চেষ্টা কৰে তেন্তে আপুনি নিঃসংকোচে আৰক্ষী বা RBIৰ ওচৰত অভিযোগ দাখিল কৰিব পাৰে। এই বিষয়ত আইন সম্পূৰ্ণৰূপে আপোনাৰ পক্ষত আছে।
মানুহে প্ৰায়ে ভয়ত বেংকৰ ফোন ৰিচিভ কৰাৰ পৰা বিৰত থাকে। এইটো এটা ডাঙৰ ভুল। তেনে কৰিলে সমস্যাটো হ্ৰাস হোৱাৰ পৰিৱৰ্তে বৃদ্ধি পায়। যদি আপুনি অনুভৱ কৰে যে আপুনি আৰু EMI দিব পৰা নাই, তেন্তে পোনে পোনে বেংকলৈ যাওক। বেংকৰ বিষয়াসকলক আপোনাৰ প্ৰকৃত সমস্যাটো মুকলিকৈ বুজাওক। বহু ক্ষেত্ৰত বেংকে সহায় কৰে। প্ৰয়োজন হ’লে তেওঁলোকে আপোনাৰ EMI হ্ৰাস কৰিব পাৰে, ঋণ পৰিশোধৰ সময় বৃদ্ধি কৰিব পাৰে বা কেইমাহমানৰ বাবে মৰেটৰিয়ামৰ প্ৰস্তাৱ দিব পাৰে। কেতিয়াবা এককালীন নিষ্পত্তিও উপলব্ধ হয়, যিয়ে আইনী হেঁচা চিৰদিনৰ বাবে নাইকিয়া কৰে আৰু আপোনাৰ মানসিক চাপৰ পৰা উপশম দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
