মানুহৰ বাবে চেলুন বা বিউটী পাৰ্লাৰ দেশৰ চুকে-কোণে, অলিয়ে-গলিয়ে আছে। সেয়া একেবাৰে সাধাৰণ কথা, কিন্তু ম’হ, গো-ধন আৰু অন্যান্য দুগ্ধজাত জীৱ-জন্তুৰ মেকআপ আৰু গ্ৰুমিঙৰ ব্যৱস্থা কৰা পাৰ্লাৰৰ কথা কেতিয়াবা শুনিছেনে? হাৰিয়ানাৰ কাইথাল জিলাত মুকলি হৈছে এনে এখন অনন্য বিউটী পাৰ্লাৰ। যিয়ে সম্প্ৰতি সমগ্ৰ দেশ আৰু ছ’চিয়েল মিডিয়াত চৰ্চাৰ বিষয় হৈ পৰিছে।
এই অনন্য বিউটী পাৰ্লাৰখন মুকলি কৰিছে কৈথাল বাসিন্দা সন্দীপ জাখোলিয়ে। সন্দীপৰ মতে, মানুহে যেনেকৈ ঘৰতে নিজৰ কুকুৰ-মেকুৰীৰ গ্ৰুমিঙৰ যত্ন লয়, তেনেকৈয়ে দুগ্ধজাত জীৱ-জন্তুৰ পৰিষ্কাৰ-পৰিচ্ছন্নতা আৰু ৰক্ষণাবেক্ষণ সমানেই গুৰুত্বপূৰ্ণ। বিউটী পাৰ্লাৰখন খোলাৰ লগে লগে কাষৰ অঞ্চলৰ পৰা পশুধনৰ গৰাকীয়ে নিজৰ জীৱ-জন্তুবোৰৰ সৌন্দৰ্য্যবৰ্ধন কৰিবলৈ অহৰহ এই অভিনৱ গ্ৰুমিং সেৱাত ভিৰ কৰিছে।
এই পাৰ্লাৰত জীৱ-জন্তুৰ বাবে বিভিন্ন ধৰণৰ বিশেষ গ্ৰুমিং সেৱা আগবঢ়োৱা হয়। জীৱ-জন্তুৰ শিং পৰিষ্কাৰ আৰু পলিচ কৰিবলৈ বিশেষ সঁজুলি ব্যৱহাৰ কৰা হয়, যাৰ ফলত পশুধনবোৰক আৰু অধিক আকৰ্ষণীয় দেখা যায় বুলি মন্তব্য কৰিছে পশুধনৰ গৰাকীসকলে। গৰাকীয়ে বিচাৰিলে পশুধনৰ শিংবোৰৰো আকৃতি দিয়া হয়। পশুধনৰ মালিকসকলে প্ৰায়ে ম’হ আৰু ম’হৰ দীঘল নোমবোৰ ট্ৰিম কৰে। ইয়াৰ ফলত গৰমৰ পৰা সকাহ পোৱা যায় বুলি মন্তব্য কৰিছে বিউটী পাৰ্লাৰখনৰ স্বত্বাধিকাৰী সন্দীপে। লগতে ইয়াৰ ফলত পশুধনসমূহ পৰিষ্কাৰ-পৰিচ্ছন্ন হৈ থাকে আৰু বেমাৰৰ পৰা ৰক্ষা পৰে। পশু মেলা আৰু প্ৰতিযোগিতালৈ নিয়াৰ আগতে পশুধনৰ মালিকে ইয়ালৈ আনি বিশেষ ৰূপ দিয়ে।
নান্দনিকতাৰ উপৰিও এই পাৰ্লাৰত পশুধনৰ স্বাস্থ্যৰ প্ৰতিও তীক্ষ্ণ দৃষ্টি দিয়া হয়। বিশেষজ্ঞসকলে জীৱ-জন্তুৰ খুৰা পৰিষ্কাৰ কৰি ট্ৰিম কৰে, যাৰ ফলত পশুধনৰ খোজ কঢ়াত সহজ হয় আৰু খুৰাৰ ৰোগৰ সংক্ৰমণ ৰোধ হয়। কোনো দুৰ্ঘটনাত যদি কোনো পশুধনৰ শিং ভাঙি যায় বা ক্ষতিগ্ৰস্ত হয়, তেন্তে কৃত্ৰিম শিং লগোৱা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
