পুনৰ ৰে’ল দুৰ্ঘটনা, বাগৰি পৰিল ১৫ টাৰো অধিক ডবা, ২ জন নিহত, ২০ জন গুৰুতৰভাৱে আহত
দেশত সংঘটিত হৈছে আন এক ভয়ংকৰ ৰে’ল দুৰ্ঘটনা। ঝাৰখণ্ডত হাওৰা-মুম্বাই এক্সপ্ৰেছ ৰেলপথৰ পৰা ওলাই অহাৰ লগ লগে মাল টনা ট্ৰেইনৰ সৈতে সংঘৰ্ষ হয়। যাৰ ফলত প্ৰায় ১৫ টা ডবা ৰে’ল ৰেলপথৰ পৰা বাগৰি পৰে।
এই দুৰ্ঘটনাত বৰ্তমানলৈ দুজন লোকৰ মৃত্যু হোৱাৰ লগতে ২০ জনতকৈ অধিক লোক গুৰুতৰভাৱে আহত হৈছে। আহত সকলক ততাতৈয়েকৈ উদ্ধাৰ কৰি চিকিৎসাৰ বাবে চিকিৎসালয়ত ভৰ্তি কৰোৱা হৈছে।
আজি ৩০ জুলাই মঙলবাৰে পুৱা প্ৰায় ৪.৪৫ মান বজাত ঝাৰখণ্ডৰ চক্ৰধৰপুৰৰ ৰাজখৰস্ৱান আৰু বদাবাম্বোৰ মাজত সংঘটিত হয় এই ট্ৰেইন দুৰ্ঘটনাটো।
১২৮১০ নং হাওৰা-চি এছ এম টি এক্সপ্ৰেছ ৰে’লখন গৈ থকা অৱস্থাত চক্ৰধৰপুৰ সংমণ্ডলৰ ৰাজখৰস্ৱান পশ্চিম আউটাৰ আৰু বাৰাবাম্বুৰ মাজত চক্ৰধৰপুৰৰ সমীপত ৰেলপথৰ পৰা বাগৰি পৰে।
ৰেলপথৰ পৰা ওলাই অহাৰ পিছত বগীবোৰ কাষৰ ট্ৰেকত থিয় হৈ থকা এখন মাল ট্ৰেইনৰ সৈতে সংঘৰ্ষত লিপ্ত হয়। দুৰ্ঘটনাটোৰ তথ্য পোৱাৰ লগে লগে জি আৰ পি আৰু ৰে’লৱেৰ বিষয়াসকলে সেই স্থানত উপস্থিত হয়। ৰে’লৱেৰ চিকিৎসা দলো সেই স্থানলৈ আহি আহতসকলক প্ৰাথমিক চিকিৎসা প্ৰদান কৰে।
আহতসকলক চক্ৰধৰপুৰৰ ৰে’লৱে হাস্পতালত ভৰ্তি কৰোৱা হৈছে। চক্ৰধৰপুৰ ৰে’ল সংমণ্ডলৰ জ্যেষ্ঠ ডিচিএম আদিত্য কুমাৰ চৌধুৰীয়ে এই দুৰ্ঘটনা নিশ্চিত কৰে।
চক্ৰধৰপুৰ ৰেলৱে সংমণ্ডলৰ পৰা ৰিলিফ ট্ৰেইন সেই স্থানত উপস্থিত হৈছে। ঘটনাস্থলীত উপস্থিত থাকে এম্বুলেন্স আৰু আৰক্ষীৰ দল।
দুৰ্ঘটনাটোৰ তথ্য পোৱাৰ লগে লগে চেৰাইকেলাৰ উপাযুক্তও সেই স্থানত উপস্থিত হয়। যাত্ৰীসকলে জনোৱা মতে, টাটানগৰৰ পৰা বদাবাম্বো পাৰ হৈ যোৱাৰ লগে লগে ৰে’লখন হঠাতে তীব্ৰ শব্দৰে ৰেলপথৰ পৰা বাগৰি যায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
