অসম লাইভ৪ঃ উত্তৰকাশীৰ ভঙা সুৰংগৰ অন্ধকাৰত বৰ্তমানো আৱদ্ধ হৈ আছে ৪১ জন শ্ৰমিক। অৱসৰৰ সময় কটাবলৈ তেওঁলোকলৈ তাছ পঠিয়াই দিয়া হৈছে। ইয়াৰোপৰি লেথাৰিকৈ চলি আছে সুৰংগ খনন অভিযান। সুৰংগৰ বাহিৰত অপেক্ষা কৰি আছে ৪১ শ্ৰমিকৰ পৰিয়ালে। এই অপেক্ষাৰ সময় টুটি আহিছে, অচিৰেই তেওঁলোকক বাহিৰলৈ ওলিয়াই আনিব পৰা যাব বুলি জনাইছে উদ্ধাৰকাৰী দলে।
বিগত ১২ নৱেম্বৰৰ পৰাই উত্তৰকাশী জীলাৰ ব্ৰহ্মতাল-যমুনাত্ৰী ৰাষ্ট্ৰীয় ঘাইপথৰ ওপৰত চিল্কিয়াৰা আৰু ডণ্ডালহগাঁৱৰ মাজত নিৰ্মীয়মাণ সুৰংগৰ প্ৰায় ৪কিঃমিঃ এলেকা হঠাৎ খহি পৰে। ভঙা সুৰংগৰ ভিতৰতেই আৱদ্ধ হৈ পৰে কৰ্মৰত ৪১ গৰাকী শ্ৰমিক। সেই ঘটনাৰ ১২ দিন সম্পূৰ্ণ হৈছে। বৰ্তমানো উদ্ধাৰ কৰিব পৰা হোৱা নাই শ্ৰমিকসকলক। ৰাজ্য আৰু কেন্দ্ৰ উভয় চৰকাৰেই ৪১ শ্ৰমিকক নিৰাপদে উলিয়াই আনিবলৈ যথাসাধ্য চেষ্টাও চলাই আছে। উদ্ধাৰকাৰীৰ তৰফৰ পৰা জনোৱা অনুসৰি বৃহস্পতিবাৰেই এইসকল শ্ৰমিকক বাহিৰলৈ উলিয়াই আনিব পৰা যাব।
বুধবাৰে উদ্ধাৰকাৰী দলে জনোৱা অনুসৰি এই কামৰ বাবে প্ৰায় ১৫-১৬ঘণ্টা সময়ৰ প্ৰয়োজন হ’ব। শ্ৰমিকসকল যাতে এই সময়ত কোনো কাৰণতে মানসিকভাৱে ভাঙি নপৰে তাৰবাবে সকলো চেষ্টাই অব্যাহত ৰাখিছে উদ্ধাৰকাৰী দলে। খাদ্য, পানী সকলোবোৰ প্ৰয়োজনীয় সামগ্ৰী তেঁওলোকক যোগান ধৰি থকা হৈছে। ইতিমধ্যে উদ্ধাৰকাৰী দলে তেওঁলোকক বাহিৰলৈ অচিৰেই আহিব সেই কথা জনোৱাৰ পাছতেই আনন্দ উল্লাসেৰে সময় কটাইছে ভিতৰত আৱদ্ধ শ্ৰমিকে। আশাৰ কিৰণে তেওঁলোকক আকৌ এবাৰ উজলাই তুলিছে। শ্ৰমিকসকল মাটিৰ তলত থকাৰ বাবে শাৰীৰিক অসুস্থতাইয়ো কিছু পৰিমানে দেখা দিছে যাৰবাবে তেওঁলোকক বাহিৰলৈ অনাৰ লগে লগেই হাস্পতালত ভৰ্তী কৰাবৰ বাবে সাজু কৰি ৰখা হৈছে ৪১ খনকৈ এম্বুলেঞ্চো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
