সাধাৰণতে শীতকালত আমাৰ শৰীৰৰ অলসতা বৃদ্ধি পায়৷ ইমানেই নহয়, শীতকালত হাত, ভৰি, কঁকালকে আদি কৰি শৰীৰৰ বিভিন্ন অংশত জঠৰতাও বৃদ্ধি পোৱা পৰিলক্ষিত হয়৷
ইফালে শীতকালত টোপনিৰ পৰা সাৰ পোৱাৰ পিছতো বিচনা ত্যাগ কৰিবলৈ মন নাযায়৷ এলাহে আগুৰি ধৰে৷
কিন্তু তলত উল্লেখ কৰা আসনসমূহ কৰিলে শীতকালৰ এই অলসতা আৰু জঠৰতাসমূহৰ পৰা উপশম পোৱা যায়৷
১. ত্রিকোণাসন
শীতকালত হাত, ভৰি, কঁকাল আদি বিষৰ পৰা উপশম লাভ কৰিবলৈ এই আসন হৈছে অতি ফলপ্ৰসু আসন৷ এই আসন অৰ্থাৎ ব্যায়ামে হজমী ক্ষমতাও বৃদ্ধি কৰে৷ আৰু লগতে ইয়ে কোষ্ঠকাঠিন্যৰ সমস্যাৰ পৰাও মুক্তি দিয়ে৷
কেনেকৈ কৰিব?
প্ৰথমে আপুনি দুয়োখন ভৰি পৃথক কৰি পোনকৈ থিয় হ’ব। এইবাৰ দুয়োফালে আপোনাৰ হাত দুখন মেলি দিয়ক। তাৰপিছত শৰীৰটো বাওঁফালে বেঁকা কৰক আৰু বাওঁহাতেৰে বাওঁ ভৰিৰ আঙুলি স্পৰ্শ কৰক। সোঁহাতখন একেবাৰে পোন কৰি আনটোৰ ফালে ৰাখিব। আঁঠু দুটা ভাঙিব নালাগে। এনেকৈ দহলৈ গণনা কৰক। এইবাৰ দুয়োখন হাত চিধাকৈ ৰাখি পোনকৈ থিয় হওঁক। সোঁহাতেৰে সোঁভৰিৰ আঙুলিটো একেধৰণে স্পৰ্শ কৰক। এই আসন তিনিবাৰকৈ কৰক।
২. ভুজঙ্গাসন
এই আসনে আমাৰ শৰীৰত তেজৰ প্ৰৱাহ সক্ৰিয় কৰি ৰখাত সহায় কৰে। ইয়াৰ বাহিৰেও ই আমাৰ শৰীৰৰ শক্তি বৃদ্ধি কৰে, বিশেষকৈ কঁকালৰ। শৰীৰৰ নমনীয়তাও বৃদ্ধি কৰে। গতিকে শীতকালৰ অলসতা আঁতৰি যায়।
কেনেকৈ কৰিব?
প্ৰথমে তলমূৱাকৈ শুই লওক। এতিয়া আপোনাৰ ভৰি দুখন আৰু কপাল মাটিত স্পৰ্শ কৰিবলৈ দিয়ক। ভৰি দুখন একেলগে ৰাখিব যাতে গোৰোহা দুয়োটা লাগি থাকে। এইবাৰ আপোনাৰ হাত দুখন কান্ধৰ ওচৰত ওলোটাকৈ ৰাখক। নিশ্চিত কৰিব যাতে কিলাকুটি দুটা সমান্তৰাল থাকে। হাত দুখন ওপৰত নিৰ্ভৰ কৰি আপোনাৰ শৰীৰৰ ওপৰৰ অংশ আগলৈ তুলি লওক। কঁকাল উঠাব নালাগে। দহলৈ গণনা কৰক আৰু স্বাভাৱিক অৱস্থালৈ ঘূৰি আহক। অলপ সময় ৰৈ ৰৈ তিনিবাৰ এই আসন কৰক।
৩. শলভাসন
এই আসনে আমাৰ স্নায়ু আৰু পেশীবোৰ সক্ৰিয় ৰখাত সহায় কৰে। ইয়াৰ বাহিৰেও ই আমাৰ কান্ধ আৰু ডিঙিৰ শক্তি বৃদ্ধি কৰে।
কেনেকৈ কৰিব?
প্ৰথমে তলমুৱাকৈ শুৱক। ইয়াৰ পিছত আপোনাৰ থুঁতৰিৰে মাটিত স্পৰ্শ কৰক। ভৰি দুখন প্ৰসাৰিত কৰক আৰু গোৰোহা দুটা স্পৰ্শ কৰক। আপোনাৰ হাতদুখন উৰুৰ ওলোটাকৈ ৰাখক। এইবাৰ প্ৰথমে বাওঁ ভৰিখন পোন কৰক আৰু ইয়াক অলপ ওপৰলৈ উঠাওক আৰু পাঁচলৈ গণনা কৰক আৰু ইয়াক তললৈ নমাই আনিব। একেদৰে সোঁভৰিখন ওপৰলৈ উঠাওক আৰু ইয়াক তললৈ নমাই আনিব। এইবাৰ, দুয়োখন ভৰি একেলগে দাঙক। দহলৈকে গণনা কৰক আৰু ভৰিদুখন তললৈ নমাই আনিব। একেৰাহে তিনিবাৰ এই আসনো কৰক।
৪. পশ্চিমোত্তাসন
পিঠি, হেমষ্ট্ৰিঙ আৰু মূৰৰ বিষৰ বাবে এই আসন যথেষ্ট উপকাৰী৷
কেনেকৈ কৰিব?
আপোনাৰ ভৰি দুখন আগলৈ আনি লওক। এইবাৰ আপোনাৰ হাত দুখন দুয়োফালে মেলি শৰীৰটো লাহে লাহে ভৰিৰ আগলৈ ঠেলি দিয়ক। ইয়াৰ পিছত ভৰিৰ তলুৱা স্পৰ্শ কৰিবলৈ চেষ্টা কৰক আৰু মূৰটো আঁঠুৰ ওপৰত ৰাখিব। পাঁচৰ পৰা দহবাৰ দীঘলকৈ উশাহ লোৱাৰ পিছত আপুনি কঁকাল, হেমষ্ট্ৰিঙত টান অনুভৱ কৰিব। এইদৰে আপুনি তিনিবাৰমান কৰক৷
নিয়মীয়াকৈ এই আসনসমূহ কৰিলে শীতকালৰ অলসতাৰ পৰা আপুনি মুক্তি পাব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
