দেশৰ ৭৩ সংখ্যক গণৰাজ্য দিৱস উদযাপন কৰি থকাৰ সময়তে বুধবাৰে জন্মু আৰু কাশ্মীৰত নিৰাপত্তাৰক্ষীৰ চকুৰ সন্মুখৰ পৰা পলায়ন কৰে দুগৰাকীকৈ দুৰ্ধৰ্ষ সন্ত্ৰাসবাদী৷
ঘটনাৰ বিৱৰণীৰ মতে বুধবাৰে নিশা দক্ষিণ কাশ্মীৰৰ শ্ব’পিয়ান এলেকাত নিৰাপত্তাৰক্ষী আৰু দুজনীয়া সন্ত্ৰাসবাদী গোট এটাৰ মাজত সংঘৰ্ষৰ সূত্ৰপাত হয় আৰু দুগৰাকী নিৰাপত্তাৰক্ষীক গুলীয়াই আহত কৰি পলায়ন কৰে দুই সন্ত্ৰাসবাদীয়ে৷
আৰক্ষী মহাপৰিদৰ্শক বিজয় কুমাৰে সংবাদ মাধ্যমক জনোৱা অনুসৰি বুধবাৰে সন্ধিয়া নিৰাপত্তাৰক্ষীয়ে নগ্ৰাম এলেকাত দুগৰাকী সন্ত্ৰাসবাদীৰ আত্মগোপন কৰি থকাৰ খবৰ লাভ কৰে৷
সেই খবৰ লাভ কৰিয়ে নিৰাপত্তাৰক্ষীৰ এটা দলে সন্ত্ৰাসবাদীৰ সন্ধানত অভিযান আৰম্ভ কৰে আৰু নিশা এজন বিদেশী সন্ত্ৰাসবাদীসহ দুগৰাকী সন্ত্ৰাসবাদীয়ে নিৰাপত্তাৰক্ষীৰ ওপৰত অতৰ্কিতে আক্ৰমণ কৰে৷ ইয়াৰ প্ৰত্যুত্তৰ নিৰাপত্তাৰক্ষীয়ে সন্ত্ৰাসবাদী দুগৰাকীলৈ লক্ষ্য কৰি গুলী বৰ্ষণ কৰে৷
কিন্তু আন্ধাৰৰ সুযোগ লৈ দুয়োগৰাকী সন্ত্ৰাসবাদীয়ে ঘটনাস্থলীৰ পৰা পলায়ন কৰে৷ ইফালে আহত দুই জোৱানক চিকিৎসালয়ত ভৰ্তি কৰোৱা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
