মছজিদৰ শৌচাগাৰৰ বাবে খান্দি থোৱা গাঁতত পৰি কৰুণ মৃত্যু দুই কনমানিৰ
বৰপেটাত সংঘটিত হৈছে এক অতিকে কৰুণ ঘটনা। দুই কনমানিৰ অকাল মৃত্যুৱে শোকৰ বন্যা বোৱাইছে বৰপেটাৰ বালাভিঠাত। শৌচাগাৰৰ গাঁতত পৰি মৃত্যু হয় দুই কনমানি শিশুৰ।
ঘটনা সন্দৰ্ভত জানিব পৰা অনুসৰি , বালাভিঠাৰ এটা মছজিদত কালি সন্ধিয়া খেলি আছিল দুই কনমানি। খেলি থাকোতেই হঠাৎ নিখোজ হয় শিশু দুটি। বহু বিচাৰ খোচাৰ কৰিয়ো কতো কোনো সন্ধান নাপাই অভিভাৱকে।
নিশাৰ ভাগলৈহে ঘৰৰ ওচৰৰে কোনো লোকে মছজিদৰ পাছফালে যাওঁতে তাত থকা নতুনকৈ খন্দা শৌচাগাৰৰ গাঁতৰ কাষত প্ৰত্যক্ষ কৰে দুয়োৰ চেণ্ডেল। কাষ চাপি গৈ দেখে গাঁতটোৰ ভিতৰত পানীত উপঙি আছে শিশু দুটিৰ নিথৰ দেহ।
লগে লগে হুৱাদুৱা লাগি যায় চাৰিওফালে। বহু লোকে ভৰি পৰি ঘটনাস্থলী। গাঁতটো নতুনকৈ খন্দা আছিল যদিও বেয়া বতৰৰ বাবে হৈ থকা নেৰানেপেৰা বৰষুণৰ বাবে পানীৰে ভৰি পৰিছিল গাঁতটো।
যাৰ বাবে সেই পানীতেই পৰি মৃত্যু হয় দুয়োটি শিশুৰ। পাছত স্থানীয় লোকে গাঁতটোৰ পৰা উদ্ধাৰ কৰে শিশু দুটিৰ নিথৰ দেহ। শিশু দুটি আব্দুল হাবিব আৰু আব্দুল হক। দুয়োৰে বয়স ক্ৰমে ৫ আৰু ৬ বছৰ।
শিশু দুটিৰ মৃত্যুৰ খবৰ লাভ কৰাৰ লগে লগে নিশাই ঘটনাস্থলীত বালাভিঠা আৰক্ষী উপস্থিত হৈ মৃতদেহ দুটা ৰাইজৰ হাতৰ পৰা চমজি লৈ মৰণোত্তৰ পৰীক্ষাৰ বাবে বৰপেটা মেডিকেল কলেজলৈ প্ৰেৰণ কৰে। আনহাতে কনমানি শিশু দুয়োটিৰ মৃত্যুত শোকে আবৰি ধৰিছে দুয়োখন ঘৰৰ লগতে সমগ্ৰ অঞ্চল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
