বৃহৎ প্ৰস্তুতিৰে ইউক্ৰেইনক আক্ৰমণ কৰিবলৈ গৈ ৰাছিয়াইও ইয়াৰ পৰিমাণ ভুগিবলৈ আৰম্ভ কৰিছে৷ ইতিমধ্যে বিশ্ব সম্প্ৰদায়ে ৰছিয়াৰ বিৰুদ্ধে আৰোপ কৰা অৰ্থনৈতিক অৱৰোধ আৰু সকীয়নিলৈ ভ্ৰূক্ষেপ নকৰি ৰাষ্ট্ৰপতি ভ্লাদিমিৰ পুটিনে ইউক্ৰেইন আক্ৰমণ কৰিবলৈ নিজ দেশৰ সৈন্য বাহিনীক নিৰ্দেশ দিলে৷
ইয়াৰ পিছতে বৃহস্পতিবাৰৰ পুৱতি নিশাৰ পৰাই ৰাছিয়ান সেনাই ইউক্ৰেইনৰ ওপৰত ক্ষেপণাস্ত্ৰ, যুদ্ধ বিমান আদিৰে আক্ৰমণ কৰিছে৷ ৰাছিয়াই দাবী কৰা মতে ৰাছিয়ান সেনাই কেৱল ইউক্ৰেইনৰ অস্ত্ৰভাণ্ডাৰ, সামৰিক ঘাটি আৰু বিমান ঘাটিসমূহতহে আক্ৰমণ কৰিছে৷
ইউক্ৰেইনৰ স্থানীয় সংবাদ পত্ৰ অনুসৰি ৰাজধানী কীয়েভত বিস্ফোৰণৰ ভীষণ শব্দ শুনিবলৈ পোৱা গৈছে৷ সেয়া বোমা বৰ্ষণৰ লগতে গোলাবৰ্ষণৰ শব্দ বুলি দাবী কৰিছে স্থানীয় সংবাদ পত্ৰসমূহে৷
ইফালে ৰাছিয়াৰ আক্ৰমণ প্ৰতিৰোধ কৰিবলৈ প্ৰত্যাক্ৰমণ কৰিছে ইউক্ৰেইনৰ সেনাই৷ ইউক্ৰেইনে দাবী কৰিছে যে ইতিমধ্যে ইউক্ৰেইনৰ সেনাৰ প্ৰত্যাক্ৰমণত ৫০ৰো অধিক দখলদাৰী ৰাছিয়ান সৈন্যৰ মৃত্যু হৈছে৷
বিভিন্ন দিশৰ পৰা ৰাছিয়াৰ পদাতিক সেনাই সীমান্ত অতিক্ৰম কৰি ইউক্ৰেইনত আক্ৰমণ কৰাৰ কিছু সময়ৰ পিছতে ইউক্ৰেইনে এই দাবী কৰিছে৷ ক্ৰিমিয়ান সীমান্ততো তিনি ৰাছিয়ান সৈন্যক ইউক্ৰেইনৰ সৈন্য হত্যা কৰা বুলি দাবী কৰিছে৷
ইতিপূৰ্বে ইউক্ৰেইনে এখন হেলিকপ্টাৰসহ পাঁচখন ৰাছিয়ান যুদ্ধ বিমান গুলীয়াই ভূপতিত কৰা বুলি দাবী কৰিছিল৷
ৰাছিয়ান প্ৰতিৰক্ষা মন্ত্ৰালয়ে ইউক্ৰেইনৰ অসামৰিক আৰু যুদ্ধ বিমানসহ অস্ত্ৰভাণ্ডাৰো ধ্বংস কৰা দাবী কৰিছে৷
আনহাতে, ইউক্ৰেইনৰ স্বৰাষ্ট্ৰ মন্ত্ৰী এণ্টন গেৰাশ্বেংকোৱে কয় যে ৰাছিয়াই ক্ষেপণাস্ত্ৰৰে ৰাজধানী কীয়েভসহ খাৰ্ক’ভ আৰু ড্নেইপাৰ থকা সামৰিক বাহিনীৰ মূল ঘাটি, বিমানবন্দৰ, সামিৰক বাহিনীৰ গোদাম, অস্ত্ৰভাণ্ডাৰসমূহক লক্ষ্য কৰি লৈছে৷
ইউক্ৰেইনৰ ৰাষ্ট্ৰপতি কাৰ্যালয়ৰ সূত্ৰৰ উদ্ধৃতিৰে সংবাদ সংস্থা ৰয়টাৰ-এ প্ৰকাশ কৰিছে যে ৰাছিয়ান সেনাৰ আক্ৰমণত অতি কমেও ৪০ গৰাকী ইউক্ৰেইন সৈন্য নিহত হোৱাৰ লগতে কেবাডজনো সৈনিক আহত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
