উচ্চতম ন্যায়ালয় গৈ পালেগৈ বোলে বোম যাত্ৰাৰ নাম ফলক বিষয়, কাইলৈ শুনানি
উত্তৰ প্ৰদেশৰ কাঁৱড় যাত্ৰা তথা বোলে বোম যাত্ৰাৰ পথত খাদ্যৰ দোকানৰ বাহিৰত নাম প্লেট লগোৱাৰ বিষয় গৈ পালেগৈ উচ্চতম ন্যায়ালয়। সোমবাৰে ২২ জুলাই তাৰিখে এই বিষয়ত শুনানি গ্ৰহণ কৰিব উচ্চতম ন্যায়ালয়ে।
এছ’চিয়েশ্যন ফৰ প্ৰটেকচন অৱ চিভিল ৰাইটছ নামৰ এটা বেচৰকাৰী সংস্থাই এই গোচৰটোক প্ৰত্যাহ্বান জনাই উচ্চতম ন্যায়ালয়ত আবেদন দাখিল কৰিছিল, যি বিষয় কাইলৈ আদালতত শুনানিৰ বাবে তালিকাভুক্ত কৰা হৈছে।
অনুমান কৰা হৈছে যে ২২ জুলাইত উচ্চতম ন্যায়ালয়ৰ ন্যায়াধীশ হৃষিকেশ ৰায় আৰু ন্যায়াধীশ এছ ভি এন ভট্টীৰ বিচাৰপীঠে এই বিতৰ্কিত গোচৰৰ শুনানি গ্ৰহণ কৰি এটা ডাঙৰ সিদ্ধান্ত দিব পাৰিব। গুৰুত্বপূৰ্ণ কথাটো হ’ল শনিবাৰে ২০ জুলাই তাৰিখে দাখিল কৰা আবেদনখনত এছ’চিয়েশ্যন ফৰ প্ৰটেকচন অৱ চিভিল ৰাইটছ এন জি অ’ই যোগী চৰকাৰৰ নাম প্লেট অৰ্ডাৰ বাতিল কৰিবলৈ দাবী জনাইছিল।
আজি দেওবাৰ ২১ জুলাই তাৰিখে সংসদৰ বাজেট অধিৱেশনৰ পূৰ্বে চৰকাৰে সৰ্বদলীয় বৈঠক আহ্বান কৰে য’ত নাম প্লেটৰ বিষয়টো আহি পৰে। কংগ্ৰেছৰ পৰা গৌৰৱ গগৈ, আম আদমি পাৰ্টিৰ পৰা সঞ্জয় সিং, সমাজবাদী পাৰ্টিৰ পৰা ৰাম গোপাল যাদৱ, এআইএমআইএমৰ পৰা আছাদুদ্দিন ওৱেইছি আৰু বাওঁপন্থী দলকে ধৰি আন বহু ৰাজনৈতিক দলৰ নেতাসকলে কাৱড় যাত্ৰাৰ সময়ত যোগী চৰকাৰে ‘নেম প্লেট’ লগোৱাৰ সিদ্ধান্তৰ বিষয়ে আলোচনা কৰি সভাত উত্থাপন কৰে।
সৰ্বদলীয় বৈঠকৰ পৰা ওলাই অহাৰ পিছত এন চি পিৰ অজিত পাৱাৰ ফৈদৰ সাংসদ প্ৰফুল্ল পেটেলে সংবাদ মাধ্যমৰ সৈতে কথা পাতি থকাৰ সময়তে উত্তৰ প্ৰদেশৰ যোগী আদিত্যনাথ চৰকাৰক ‘নেম প্লেট’ সন্দৰ্ভত গ্ৰহণ কৰা সিদ্ধান্ত প্ৰত্যাহাৰ কৰিবলৈ দাবী জনায় ।
যোগী চৰকাৰে কাৱড় যাত্ৰাৰ পথত দোকানীৰ নাম লিখাৰ নিৰ্দেশৰ বিৰোধিতা কৰিছে এন ডি এৰ মিত্ৰ দলসমূহেও। প্ৰতিবাদ সাব্যস্ত কৰাসকলৰ ভিতৰত আছে কেন্দ্ৰীয় মন্ত্ৰী চিৰাগ পাছৱান, জে ডি ইউ নেতা কে চি ত্যাগী আৰু ৰাষ্ট্ৰীয় লোকদলৰ মুৰব্বী জয়ন্ত চৌধুৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
