শিপাৰে সৈতে উভালি পেলোৱাৰ সময় আহি পৰিছে, সমগ্ৰ বিশ্বক বিশেষ বাৰ্তা মোদীৰ
পহেলগাম সন্ত্ৰাসবাদী আক্ৰমণৰ পিছত বিহাৰ ভ্ৰমণলৈ যোৱা প্ৰধানমন্ত্ৰী নৰেন্দ্ৰ মোদীয়ে দেশৰ লগতে সমগ্ৰ বিশ্বকে এক বাৰ্তা দিছে যে সন্ত্ৰাসবাদক শিপাৰে সৈতে উভালি পেলোৱাৰ সময় আহি পৰিছে। প্ৰধানমন্ত্ৰী নৰেন্দ্ৰ মোদীয়ে স্পষ্টকৈ কয় যে দেশৰ শত্ৰুৱে ভাৰতৰ আত্মাক আক্ৰমণ কৰিবলৈ সাহস কৰিছে।
লগতে ইয়াকো কয় যে, – স্পষ্টকৈ কৈছো, যিসকল সন্ত্ৰাসবাদীয়ে এই আক্ৰমণ সংঘটিত কৰিছিল আৰু যিসকলে এই আক্ৰমণৰ ষড়যন্ত্ৰ ৰচনা কৰিছিল তেওঁলোকে কল্পনা কৰাতকৈও ডাঙৰ শাস্তি লাভ কৰিব। এতিয়া সময় আহি পৰিছে সন্ত্ৰাসবাদীয়ে যি সামান্য সাহস দেখুৱাই আছে, তাকো সমূলঞ্চে ধ্বংস কৰাৰ সময় সমাগত।
পহেলগামত নিৰীহ পৰ্যটকক হত্যা কৰা সন্ত্ৰাসবাদীক নিৰ্মূল কৰাৰ দাবী উত্থাপন কৰাৰ লগতে নাম নোলোৱাকৈয়ে পাকিস্তানক কঠোৰ সতৰ্কবাণী জাৰি কৰিছে প্ৰধানমন্ত্ৰী মোদীয়ে। কেৱল হিন্দীতে নহয় ইংৰাজীতো সদম্ভে এই কথা কয় প্ৰধানমন্ত্ৰীগৰাকীয়ে।
প্ৰধানমন্ত্ৰী মোদীয়ে কয় যে ২২ এপ্ৰিল তাৰিখে সংঘটিত হোৱা এই আক্ৰমণ নিৰীহ পৰ্যটকৰ ওপৰত নহয় বৰঞ্চ ভাৰতৰ আত্মাক আক্ৰমণ কৰাৰ এক সাহস। যিসকলে আক্ৰমণ কৰিছে, সেই সন্ত্ৰাসবাদী আৰু এই আক্ৰমণৰ ষড়যন্ত্ৰ কৰাসকলে তেওঁলোকে কল্পনা কৰাতকৈও ডাঙৰ শাস্তি পাব। ১৪০ কোটি ভাৰতীয়ৰ ইচ্ছাশক্তিৰে সন্ত্ৰাসবাদী আৰু সন্ত্ৰাসবাদ শিপাৰে সৈতে উভালিব লাগিব।
এই কথাৰে স্পষ্ট হৈ পৰিছে যে ভাৰতে আৰু সন্ত্ৰাসবাদ আৰু সন্ত্ৰাসবাদীক আশ্ৰয় দিয়াসকলক সহ্য নকৰে। এইদৰে প্ৰধানমন্ত্ৰী মোদীয়ে পাকিস্তানৰ নাম নোলোৱাকৈয়ে স্পষ্ট কৰি দিছে যে এইবাৰ পাকিস্তানৰ বিৰুদ্ধে এনে পদক্ষেপ লোৱা হ’ব যে পাকিস্তানে পুনৰ এনে কাৰ্য কৰিব পৰা অৱস্থাত নাথাকিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
