বলিউদ মানেই যেন ছবি উদ্যোগ আৰু যৌন নিৰ্যাতনৰ একেটা মুদ্ৰাৰ দুটা পিঠি৷ এপিঠিত যদি ছবি উদ্যোগৰ বিভিন্ন প্ৰসংগবোৰ আৰু আনটো পিঠি হৈছে অভিনেত্ৰীৰ ওপৰত চলোৱা যৌন উৎপীড়নৰ খবৰবোৰ৷ এই দুটা পিঠিৰ যৌন নিৰ্যাতনৰ খবৰে মাজে মাজে উত্তাল কৰি আহিছে বলিউদ৷
এইবাৰ পুনৰ যৌন নিৰ্যাতনৰ এক গুৰুতৰ অভিযোগ উত্থাপন কৰিছে এগৰাকী অভিনেত্ৰীয়ে৷ বিভিন্ন সময়ত বিভিন্ন কাৰণত বিতৰ্কৰ আৱৰ্তত সোমাই পৰা অভিনেত্ৰী উৰ্ফি জাভেদে এইবাৰ উত্থাপন কৰিছে যৌন উৎপীড়নৰ গুৰুতৰ অভিযোগ৷
অভিনেত্ৰী উৰ্ফি জাভেদে এইবাৰ এগৰাকী কাষ্টিং ডাইৰেক্টৰৰ বিৰুদ্ধে এই গুৰুতৰ অভিযোগ উত্থাপন কৰিছে৷ সোমবাৰে নিজৰ ইনষ্টাগ্ৰামৰ ষ্টৰীত বলিউদৰ এই অভিনেত্ৰীগৰাকীয়ে উবেদ আফ্ৰিদি নামৰ এগৰাকী কাষ্টিং ডাইৰেক্টৰ সৈতে হোৱা কিছুসংখ্যক কথোপকথনৰ স্ক্ৰীণশ্বট শ্বেয়াৰ কৰিছে৷
উক্ত কথোপকথনৰ এটাত দেখা গৈছে কাষ্টিং ডাইৰেক্টৰ গৰাকীয়ে কম্প্ৰ’মাইজৰ বিনিময়ত এটা গানৰ ভিডিঅ’ত অভিনয়ৰ সুযোগ দিয়া হ’ব বুলি উল্লেখ কৰিছে৷ উৰ্ফিয়ে আফ্ৰিদিৰ এই কাৰ্য ৰাজহুৱা কৰি দিম বুলি কোৱাত উৰ্ফিক কোনেও পাট্টা নিদিয়ে বুলি তাচ্ছিল্য কৰিছে৷
ইমানেই নহয়, অভিনেত্ৰীগৰাকীয়ে আফ্ৰিদিৰ বিৰুদ্ধে আৰু গুৰুতৰ অভিযোগ উত্থাপন কৰিছে৷ উৰ্ফিলৈ ভিডিঅ’ কলিং কৰি আফ্ৰিদিয়ে হস্তমৈথুন কৰা বুলিও বিস্ফোৰক অভিযোগ কৰিছে উৰ্ফিয়ে৷
‘‘আমি টকাৰ বাবে পৰিশ্ৰম কৰো৷ সয়ে পাৰিশ্ৰমিক বিচৰাতো অন্যায় নহয়, কিন্তু যৌন নিৰ্যাতন হৈছে অপৰাধ৷’’ অভিনেত্ৰী গৰাকীয়ে কয়৷
উৰ্ফি জাভেদে এই অভিযোগ অনাৰ পিছতে বলিউদৰ অভিনেতা প্ৰিয়ঙ্ক শৰ্মাও একেই অভিযোগ আনিছে৷ প্ৰিয়ঙ্ক শৰ্মায়ো কে’বাটাও স্ক্ৰীণশ্বট শ্বেয়াৰ কৰি আফ্ৰিদিৰ বিৰুদ্ধে তদ্ৰুপ অভিযোগ উত্থাপন কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
